ພິທີສະເຫຼີມສະຫຼອງ ວັນທີ 7 ຕຸລາ ວັນຄູແຫ່ງຊາດ ຄົບຮອບ 25 ປີ (1994-2019) ຂອງເມືອງອຸທຸມພອນ ໄດ້ຈັດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 7 ຕຸລາ 2019 ຢູ່ທີ່ສະໂມສອນສຶກສາ ສາມັກຄີ ໂດຍພາຍໃຕ້ການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເລຂາຄະນະບໍລິຫານງານພັກເມືອງ ເຈົ້າເມືອງອຸທຸມພອນ, ທ່ານ ໂພໄຊ ອິນທະວົງສາ ຮອງເຈົ້າເມືອງ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ-ກິລາແຂວງ, ບັນດາທ່ານ ຫົວໜ້າຫ້ອງການ, ຄະນະຫ້ອງການ, ພະນັກງານອາວຸໂສພັກຜ່ອນບຳນານ, ພະນັກງານ-ຄູອາຈານ ຕະຫຼອດຮອດນັກຮຽນຮູ້ ປັນຍາຊົນພາຍໃນເມືອງເຂົ້າຮ່ວມ.

ໃນພິທີ ທ່ານ ປະສົງສິນ ຈະເລີນສຸກ ກໍ່ໄດ້ໃຫ້ກຽດຜ່ານບົດປາໄສ ເນື່ອງໃນໂອກາດສະເຫຼີມສະຫຼອງ ວັນຄູແຫ່ງຊາດ ຄົບຮອບ 25 ປີ ວ່າ: ການພັດທະນາເສດຖະກິດ-ສັງຄົມຂອງຊາດໜຶ່ງ ທີ່ມີຄວາມຈະເລີນຮຸ່ງເຮືອງ ນັ້ນມັນຂຶ້ນກັບຫຼາຍປັດໃຈ, ແຕ່ປັດໃຈທີ່ມີລັກສະນະຕັດສິນກວ່າໝູ່ແມ່ນ ປັດໃຈກ່ຽວກັບຄົນ ເຊິ່ງຄົນນັ້ນປະກອບດ້ວຍຄວາມຮູ້ຄວາມສາມາດ, ແນວຄິດຄຸນສົມບັດ ແລະ ສຸຂະພາບແຂງແຮງດີ. ແຕ່ວ່າແນວຄິດ ຄຸນສົມບັດ ຄວາມຮູ້ຄວາມສາມາດນັ້ນ ມັນບໍ່ແມ່ນຈະເກີດຂຶ້ນໄດ້ເອງຈາກຄົນຜູ່ໃດຜູ່ໜຶ່ງ ຫຼື ເກີດມາແຕ່ກຳເນີດ ແຕ່ມັນຫາກເກີດຂຶ້ນບົນເສັ້ນທາງແຫ່ງການສິດສອນ, ການສຶກສາຮຽນຮູ້ ສິ່ງນັ້ນກໍ່ຄື: ຄູ-ອາຈານນັ້ນເອງ ເປັນປັດໃຈຕັດສິນກວ່າໝູ່ ໃນການສຶກສາກໍ່ຄືການພັດທະນາຄົນ ໃຫ້ມີຄວາມຮູ້ ຄວາມສາມາ, ມີແນວຄິດ ຄຸນສົມບັດທີ່ດີ, ມີລະບຽບວິໃນ ແລະ ມີສຸຂະພາບແຂງແຮງ. ສຳລັບປະເທດລາວຂອງພວກເຮົາ ລັດຖະບານຍາມໃດກໍ່ເປັນຮ່ວງເປັນໃຍ, ໃຫ້ຄວາມສຳຄັນແກ່ຄູຢູ່ສະເໝີ ແລະ ໄດ້ຢືນຢັນຢ່າງຈະແຈ້ງວ່າ: ຄູ ເປັນຕົ້ນຕໍໃນການພັດທະນາຊັບພະຍາກອນມະນຸດ ເພື່ອໃຫ້ເຂົາເຫຼົ່ານັ້ນປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມຂອງຊາດ ກໍ່ຄືການພັດທະນາການສຶກສາໃຫ້ມີທ່າກ້າວຂຶ້ນ, ຜົນສຳເລັດຂອງການພັດທະນາ ການສຶກສາກໍ່ແມ່ນຄູ ເປັນຜູ່ຕັດສິນ, ຄູເປັນຜູ່ສ້າງຜົນລະເມືອງດີຂອງຊາດ ສ້າງໃຫ້ຄົນມີນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ ເປັນຜູ່ປະກອບສ່ວນໃນການສ້າງສາພັດທະນາປະເທດຊາດ ໃຫ້ມີຄວາມອຸດົມ ສົມບູນ ໃຫ້ປະຊາຊົນຮັ່ງມີຜາສຸກ ປະເທດຊາດມັ້ງຄັ້ງເຂັ້ມແຂງ.

ໂອກາດດຽວກັນນີ້ ທ່ານເຈົ້າເມືອງອຸທຸມພອນ ກໍ່ຍັງໄດ້ສະແດງຄວາມສາມັກຄີຮັບແພງ ແລະ ຝາກຄວາມຢ້ຽມຢາມຖາມຂ່າວອັນອົບອຸ່ນ ມາຍັງຜູ່ບໍລິຫານການສຶກສາ, ຄູ-ອາຈານ ທັງພາກລັດ ແລະ ເອກະຊົນ ທົ່ວເມືອງ ພ້ອມທັງອ່ວຍພອນໃຫ້ ຄູ-ອາຈານ ທຸກໆທ່ານ ຈົ່ງມີພະລານະໄມສົມບູນ ປະສະຈາກພະຍາດໂລຄາ ມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ການ ທັງສ່ວນລວມ ແລະ ສ່ວນຕົວທຸກປະການ.
ນອກນີ້ ໃນພິທີ ຍັງໄດ້ມີການມອບຂອງຂວັນ ແລະ ໃບຍ້ອງຍໍ້ຂັ້ນຕ່າງໆ ໃຫ້ກັບບຸກຄົນທີ່ມີຜົນງານດີເດັ່ນ ໃນການປະກອບສ່ວນ, ເຄື່ອນໄຫວ ແລະ ຈັດຕັ້ງປະຕິບັດ ວຽກງານການສຶກສາໃນໄລຍະ 01 ປີທີ່ຜ່ານມາ.
ຂ່າວແຈ້ງໃຫ້ຮູ້ຕື່ມວ່າ: ໃນຕອນເຊົ້າຂອງວັນດຽວກັນ ເພື່ອເປັນການລະນຶກວັນທີ 7 ຕຸລາ ວັນຄູແຫ່ງຊາດ ຄົບຮອບ 25 ປີ (1994-2019) ໃຫ້ມີຄວາມໝາຍຄວາມສຳຄັນ. ດັ່ງນັ້ນ ທາງຫ້ອງການສຶກສາທິການ-ກິລາເມືອງ ອຸທຸມພອນ ຈຶ່ງໄດ້ປະສານສົມທົບກັບຄະນະອຳນາດການປົກຄອງເມືອງ, ພະນັກງານ-ຄູອາຈານ ຕະຫຼອດຮອດນັກຮຽນຮູ້ປັນຍາຊົນພາຍໃນເມືອງ ເຂົ້າວາງກະຕ່າດອກໄມ້ ແລະ ດອກໄມ້ສົດ ຢູ່ຕໍ່ໜ້າອະນຸສອນສະຖານ ປະທານ ໄກສອນ ພົມວິຫານ ປະຈຳເມືອງ ນຳອີກດ້ວຍ.

ນັກຂ່າວເມືອງອຸທຸມພອນ: ພອນປະເສີດ ແຜນພັກດີ
MEDIALAOS