ເພື່ອເປັນການສ້າງຂະບວນການ ຂໍານັບຮັບຕ້ອນໃຫ້ແກ່ວັນສຳຄັນຕ່າງໆຂອງຊາດ, ຂອງພັກ ເວົ້າລວມ ເວົ້າສະເພາະ ກໍ່ເພື່ອສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ ທີ່ຈະໄຂຂຶ້ນໃນມໍ່ໆນີ້ ໃຫ້ມີບັນຍາກາດ ແລະ ຜົນງານອັນຟົດຟື້ນ.
ດັ່ງນັ້ນ ໃນວັນທີ 5 ຕຸລາ 2019 ທີ່ຜ່ານມາ ທ່ານ ຄຳຈັນ ລຽນວົງສາ ກຳມະການພັກເມືອງ ຫົວໜ້າຫ້ອງການສຶກສາທິການ-ກິລາເມືອງ ທັງແມ່ນຮອງຫົວໜ້າອະນະກຳມະການຂະບວນການ, ແຂ່ງຂັນ ແລະ ຍ້ອງຍໍ ກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ ໄດ້ລົງປະສານ ສົມທົບກັບຄະນະອຳນາດການປົກຄອງບ້ານ ແລະ ພໍ່ແມ່ປະຊາຊົນພາຍໃນບ້ານໂພນຕູມ ຈຳນວນ 200 ກວ່າຄົນ ສ້າງຂະບວນການອອກແຮງງານລວມ ໂດຍການໃຊ້ຈົກ, ຊວ້ານຂອງໃຜລາວ ສ້ອມແປງເສັ້ນທາງເຂົາຫາບ້ານ ຕາມຈຸດທີ່ເປັນຮ່ອງເປັນຂຸມ ອັນເກີດຈາກການກັດເຊາະຂອງນ້ຳ ໃນໄລຍະຝົນຕົກໜັກທີ່ຜ່ານມາ.

ທ່ານ ຄຳຕັນ ຈັນຄຳແພງ ນາຍບ້ານໆໂພນຕູມ ໄດ້ໃຫ້ຮູ້ວ່າ: ໃນການສ້ອມແປງທາງຄັ້ງນີ້ ແມ່ນເປັນພຽງການແກ່ໄຂໃນຂັ້ນເບື້ອງຕົ້ນ ເພື່ອໃຫ້ສາມາດສັນຈອນ ໄປມາໄດ້ສະດວກຂຶ້ນ. ສ່ວນໃນອະນາຄົດອັນມໍ່ໆນີ້ ທາງບ້ານກໍ່ໄດ້ມີແຜນທີ່ຈະສ້ອມແປງຍົກລະດັບເສັ້ນທາງດັ່ງກ່າວ ໃຫ້ສາມາດສັນຈອນ ໄປມາໄດ້ຢ່າງສະດວກສະບາຍ ເຊິ່ງປະຈຸບັນແມ່ນຢູ່ໃນໄລຍະການຄົ້ນຄວ້າ ຂ້ອງແໜງການທີ່ກ່ຽວຂ້ອງ ເພາະງົບປະມານທີ່ບ້ານມີແມ່ນຍັງບໍ່ພຽງພໍ ຕາມການຄິດໄລຂອງພະນັກງານ-ວິຊາການທີ່ກ່ຽວຂ້ອງ.
ໂອກາດນີ້ ທ່ານ ຄຳຈັນ ລຽນວົງສາ ຮອງຫົວໜ້າອະນະກຳມະການຂະບວນການ, ແຂ່ງຂັນ ແລະ ຍ້ອງຍໍ ກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ ກໍ່ໄດ້ສະແດງຄວາມຍ້ອງຍໍ້ຊົມເຊີຍ ຕໍ່ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນ ທີ່ໄດ້ສະຫຼະເວລາ ຕື່ນຕົວປະກອບສ່ວນເຂົ້າໃນພາລະກິດພັດທະນາສ້າງສາປະເທດຊາດ ກໍ່ຄືການເປັນເຈົ້າການ ໃນການປົກປັກຮັກສາ ແລະ ສ້ອມແປງເສັ້ນທາງໃນຂອບເຂດຂອງບ້ານ.

ນັກຂ່າວເມືອງອຸທຸມພອນ: ພອນປະເສີດ ແຜນພັກດີ
MEDIALAOS