ກອງປະຊຸມໃຫຍ່ຄັ້ງທີ V ຂອງຜູ້ແທນອົງຄະນະພັກ ເມືອງ ໄຊພູທອງ ແຂວງສະຫວັນນເຂດ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 8 -9 ຕຸລາ 2019 ນີ້, ທີ່ສະໂມສອນໃຫຍ່ຂອງເມືອງດັ່ງກ່າວ, ໂດຍເປັນກຽດເຂົ້າຮ່ວມຂອງ ສະຫາຍ ສັນຕິພາບ ພົມວິຫານ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆ ສະຫວັນນເຂດ, ສະຫາຍ ຄໍາວິໃສ ຜຸຍຍະວົງ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆໄຊພູທອງ ,ສະຫາຍ ທອງທ່ຽງ ສີດາວົງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງມີບັນດາ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ມີນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ, ມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງທີ່ເປັນຕົວແທນໃຫ້ແກ່ສະມາຊິກພັກທັງໝົດ 155 ສະຫາຍ, ຍິງ 31 ເຂົ້າຮ່ວມ
ກອງປະຊຸມໃຫຍ່ຜູ້ແທນຄັ້ງນີ້ແມ່ນໄດ້ພ້ອມກັນທົບທວນຕີລາຄາຄືນຜົນງານ ແລະ ໄຊຊະນະທີ່ຍາດມາໄດ້, ຍົກໃຫ້ເຫັນຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງ ໃນໄລຍະ 5 ປີຜ່ານມາ ແລະ ພ້ອມກັນກຳນົດທິດທາງຄາດໝາຍຍຸດທະສາດແຕ່ລະດ້ານໃນການປົກປັກຮັກສາ ແລະ ພັດທະນາເມືອເມືອງໄຊພູທອງແຕ່ນີ້ຮອດປີ 2024, ໂດຍລວມແລ້ວເມືອງ ໄຊພູທອງ ແມ່ນມີການປ່ຽນແປງຢ່າງຕັ້ງໜ້າເປັນຕົ້ນແມ່ນ:

ສາມາດຮັກສາສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດ້ານສັງຄົມໂດຍພື້ນຖານ, ເສດຖະກິດ, ວັດທະນະທໍາ-ສັງຄົມໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຊຸກຍູ້ສົ່ງເສີມນັບມື້ດີຂື້ນ, ເສດຖະກິດຂະຫຍາຍຕົວໃນລະດັບ 5,69% ຖ້າທຽບໃສ່ແຜນການຫຼຸດ5,31%(ແຜນ ການ 11%), ລວມຍອດມູນຄ່າຜະລິດຕະພັນພາຍໃນບັນລຸໄດ້ 779,5 ຕື້ກີບ.ໃນນັ້ນ: ຂະແໜງກະສິກໍາເພີ້ມຂຶ້ນ 5,34% ກວມເອົາ 77,74%, ຂະແໜງອຸດສະຫະກໍາ ເພີ້ມຂຶ້ນ 8,18 % ກວມເອົາ 14,99% ແລະ ຂະແໜງບໍລິການເພີ້ມຂຶ້ນ 5,41% ກວມເອົາ7,27%; ສະເລ່ຍລາຍໄດ້ຕໍ່ຫົວຄົນເທົ່າກັບ15.400.000 ກີບ ຫຼືເທົ່າກັບ1.855 ໂດລາສະຫະລັດຕໍ່ຄົນຕໍ່ປີ ຖ້າທຽບໃສ່ແຜນການຫຼຸດ 195 ໂດລາສະຫະລັດ(ແຜນການ 2.050 ໂດລາສະຫະລັດ);ສໍາລັບການຈັດເກັບລາຍຮັບເຂົ້າງົບປະມານຂອງລັດປະຕິບັດໄດ້ທັງໝົດ11,89ຕື້ກີບ ເທົ່າກັບ 75,28%,ສົມທຽບໃສ່ກອງປະຊຸມໃຫຍ່ຄັ້ງທີ IV ປະຕິບັດໄດ້ 86,93% ຂອງແຜນການ, ການຊົມໃຊ້ໄຟຟ້າຂອງປະຊາຊົນກວມ 100%, ອັດຕາເຂົ້າຮຽນສຸດທິຊັ້ນປະຖົມບັນລຸໄດ້ 99,9 % ຊັ້ນມັດທະຍົມຕົ້ນບັນລຸໄດ້ 88,9%(ລື່ນຄາດໝາຍSDG 13,9%) ສົມທຽບໃສ່ແຜນກອງປະຊຸມໃຫຍ່ປະຕິບັດໄດ້ລື່ນ13,9%; ຊັ້ນມັດທະຍົມປາຍແລະສົມບູນ 65% (ລື່ນຄາດໝາຍ SDG 5,7%) ,ສ້າງໂຮງຮຽນຕົວແບບປອດຢາເສບຕິດໄດ້ 08 ແຫ່ງ, ການຊົມໃຊ້ວິດຖ່າຍໃນໂຮງຮຽນໄດ້ 100%. ທົ່ວເມືອງໄດ້ປະກາດຈົບຊັ້ນມັດທະຍົມຕົ້ນບຳລຸງໃນປີ 2015 ເປັນເມືອງລະດັບທີ 01 ຂອງແຂວງ, ແຫຼ່ງທ່ອງທ່ຽວທາງດ້ານວັດຖຸບູຮານແລະ ທໍາມະຊາດມີ 6 ແຫ່ງ, ໃນນັ້ນ: ມີແຫຼ່ງທ່ອງທ່ຽວທາງດ້ານວັດຖຸບູຮານ-ວັດທະນະທຳ 1 ແຫ່ງ, ວັດຖຸບູຮານ 3 ແຫ່ງ ແລະ ແຫຼ່ງທ່ອງທ່ຽວທໍາມະຊາດ 02 ແຫ່ງ; ໄດ້ປັບປຸງບູລະນະກໍ່ສ້າງບໍລິເວນພຣະທາດໂຜ່ນເຊັ່ນ: ການປະຕິສັງຂອນລານພຣະທາດ, ສ້າງກຳແພງແກ້ວ, ສ້າງສວນວັດທະນະທຳ, ໄດ້ຈັດຊື້ແລະຖົມທີ່ດິນໃນເນື້ອທີ່ 7,5 ຮຕ, ສ້າງຜາມໄຊແລະອື່ນໆ. ບູລະນະປະຕິສັງຂອນຜາສາດເຮືອນຫິນ;ທັງນີ້ ກໍເພື່ອເປັນການສ້າງສິ່ງຈູງໃຈ,ອຳນວຍຄວາມສະດວກແລະດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດມາທ່ອງທ່ຽວເພີ່ມຂຶ້ນສະເລ່ຍ 200.000 ກວ່າຄົນໃນແຕ່ລະປີ,ສ້າງບ້ານວັດທະນະທຳໄດ້ 40 ບ້ານ, ເທົ່າກັບ 100% ຂອງບ້ານທົ່ວເມືອງແລະມີຄອບຄົວວັດທະນະທຳ 10.202 ຄອບຄົວ,ເທົ່າກັບ99,07% ຂອງຈໍານວນຄອບຄົວທັງໝົດ, ສ້າງບ້ານສາທາລະນະສຸກແບບຢ່າງໄດ້ 40 ບ້ານເທົ່າກັບ 100% ອັດຕາການຊົມໃຊ້ວິດຖ່າຍປະຊາຊົນໄດ້100%, ອັດຕາຊົມໃຊ້ນ້ຳສະອາດໄດ້ 100% ຂອງຈໍານວນຄອບຄົວທັງໝົດ.
ກອງປະຊຸມຄັ້ງນີ້ ຍັງຈະໄດ້ຮັບຟັງການໂອ້ລົມຂອງ ສະຫາຍ ສັນຕິພາບ ພົມວິຫານ ແລະ ຈະໄດ້ດຳເນີນໄປເປັນເວລາ 2 ວັນຈິ່ງຈະສໍາເລັດ.