ສາລະວັນ ສະເຫຼີມສະຫຼອງ ແລະ ຫວນຄືນມູນເຊື້ອວັນຄູແຫ່ງຊາດ ຄົບຮອບ 25 ປີ

0
355

ພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ ( 7 ຕຸລາ 1994 – 7 ຕຸລາ 2019) ໄດ້ຈັດຂຶ້ນໃນວັນທີ 8 ຕຸລາ 2019 ຢູ່ທີ່ ສະໂມສອນໃຫຍ່ ໃຫ້ກຽດເປັນປະທານ ໂດຍ ທ່ານ ຄຳຈັນ ແຈ່ມສະໝອນ ປະທານກວດກາພັກ-ລັດແຂວງ, ມີ ພຣະອາຈານ ສີປະເສີດ ໄຊປັນຍາ ຫົວໜ້າກຳມະທິການສຶກສາສົງແຂວງ, ບັນດາທ່ານຄະນະປະຈໍາພັກແຂວງ, ຫົວໜ້າພະແນກສຶກສາທິການ ແລະ ກິລາ, ພະແນກການອ້ອມຂ້າງ, ທ່ານຜູ້ບໍລິຫານການສຶກສາຂັ້ນຕ່າງໆ, ພະນັກງານຄູ-ອາຈານ, ນັກຮຽນ, ນັກສຶກສາ, ພິເສດພະນັກງານບໍານານ, ຜູ້ຊົງຄຸນວຸດທິ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ສີລິສັກ ຖະໜອມຮັກ ຫົວໜ້າພະແນກ ສຶກສາທິການ ແລະ ກິລາແຂວງ ໄດ້ຂຶ້ນຜ່ານບົດລາຍງານ ເນື່ອງໃນໂອກາດວັນທີ 7 ຕຸລາ ວັນຄູແຫ່ງຊາດ ຄົບຮອບ 25 ປີ ເພື່ອເຮັດໃຫ້ວັນດັ່ງກ່າວ ໄດ້ມີຄວາມໝາຍຄວາມສຳຄັນ ທັງເປັນການສະແດງຄວາມຮູ້ບຸນຄຸນ, ຄວາມກະຕັນຍູກະຕະເວທີ ທີ່ມີຕໍ່ຄູອາຈານ, ການເຊີດຊູກຽດສັກສີ, ຄຸນງາມຄວາມດີ, ຖານະບົດບາດຂອງຄູທີ່ມີຕໍ່ສັງຄົມ ແລະ ປະເທດຊາດ ເຊິ່ງຄຳວ່າ: “ ຄູ “ ແມ່ນເປັນຄຳສືບທອດຫຼາຍເຊັ່ນຄົນ, ຄູໝາຍເຖິງຄົນທີ່ມີຄວາມຮູ້ ແລະ ປະສົບການ, ເປັນຜູ້ສິດສອນ ຖ່າຍຄວາມຮູ້ ແລະ ສຶກສາອົບຮົມໃຫ້ແກ່ນັກຮຽນ, ນັກສຶກສາ, ເປັນເສນາທິການໃຫ້ແກ່ອຳນາດການປົກຄອງທ້ອງຖິ່ນ, ເປັນຜູ້ນຳເອົານະໂຍບາຍ ແລະ ນະວັດຕະກຳໃໝ່ໆລົງສູ່ຊຸມຊົນ ແລະ ອື່ນໆ ເຊິ່ງສາມາດຖ່າຍທອດຄວາມຮູ້ ແລະ ປະສົບການນັ້ນໄປສູ່ຜູ້ອື່ນໆ, ຮູບການຖ່າຍທອດຄວາມຮູ້ແມ່ນ ຈາກຜູ້ຮູ້ໄປສູ່ຜູ້ບໍ່ຮູ້ເອີ້ນວ່າ: ການສອນ ແລະ ການຮຽນ ຕະຫຼອດໄລຍະຜ່ານມາ ພະນັກງານຄູອາຈານຂອງແຂວງສາລະວັນ ໄດ້ປະກອບສ່ວນຢ່າງໄຫຍ່ຫຼວງ ຕໍ່ການຮຽນ-ການສຶກສາ.

ພາບ-ຂ່າວ:ກິນດາວັນ
MEDIALAOS