ເມື່ອບໍ່ດົນມານີ້, ກອງບັນຊາການທະຫານ ແຂວງສາລະວັນ ຈັດກອງປະຊຸມສະຫລຸບ,ຖອດຖອນບົດຮຽນວຽກງານກອບກູ້ໄພພິບັດ ພາຍໃຕ້ການເປັນປະທານຂອງ ທ່ານ ພົນຈັດຕະວາ ພູວຽງ ລ່ຽມມະວົງສາ ຫົວໜ້າການທະຫານ ກອງບັນຊາການທະຫານແຂວງສາລະວັນ ແລະ ພາກສ່ວນກ່ຽວຂ້ອງເຂົ້າຮ່ວມ ເຊິ່ງເຫດການອຸທົກກະໄພນ້ຳຖ້ວມຢູ່ແຂວງສາລະວັນ ທີ່ເກີດຂຶ້ນຢ່າງກະທັນຫັນນັ້ນ ກຳລັງທະຫານຫລາຍຮອຍຄົນ ກໍໄດ້ເຂົ້າຊ່ວຍເຫລືອກອບກູ້ເອົາຊີວິດ ແລະ ຊັບສິນຂອງປະຊາຊົນ, ທັງໄດ້ຮັບຜົນສຳເລັດຫລາຍດ້ານ ແລະ ໄດ້ຖອດຖອນເອົາບົດຮຽນຄັ້ງນີ້ເປັນບັນຫາສຳຄັນ.

ທ່ານ ພັນໂທ ບົວໄລ ພົງສະຫວັດ ຮອງຫ້ອງເສນາທິການ ທະຫານແຂວງສາລະວັນ, ທັງເປັນອະນຸກຳມະການຊີ້ນຳພາກສະໜາມໄດ້ໃຫ້ຮູ້ວ່າ: ຕໍ່ກັບອຸທົກກະໄພດັ່ງກ່າວ ພວກເຮົາໄດ້ນຳໃຊ້ກຳລັງເຂົ້າກອບກູ້ໄພພິບັດທັງໝົດ 441 ສະຫາຍ, ນຳໃຊ້ພາຫະນະລົດ ແລະ ເຮືອ ໃນການລຳລຽງຂົນສົ່ງເຄື່ອນຍ້າຍປະຊາຊົນໄປສູ່ຂອບເຂດອົບພະຍົບ ແລະ ກັບຄືນພູມລຳເນົາເວລານ້ຳລົດລົງ ໄດ້ທັງໝົດ 337 ຖ້ຽວ ແລະ ຮັບປະກັນໄດ້ຄວາມປອດໄພດ້ານຊີວິດ ໄດ້ 100% ເຊິ່ງແຕ່ລະສະຫາຍ ແມ່ນມີຄວາມຮັບຜິຊອບສູງຕໍ່ໜ້າທີ່ການເມືອງຂອງຕົນ, ມີແນວຄິດການເມືອງໜັກແໜ້ນ, ອຸ່ນອ່ຽນທຸ່ນທ່ຽງ ບໍ່ທໍ້ຖອຍ ຫລື ຢ້ານກົວແຕ່ຢ່າງໃດ, ແຕ່ກໍປາສະຈາກບໍ່ໄດ້ຕໍ່ຂໍ້ຫຍຸ້ງຍາກ ໂດຍສະເພາະແມ່ນຍັງຂາດພາຫະນະອຸປະກອນຮັບໃຊ້ທີ່ຈຳເປັນ ໃນການເຂົ້າກອບກູ້ໄພພິບັດ ເປັນຕົ້ນ: ເຮືອລຳລຽງ, ເສື້ອຊູຊີບ ແລະ ປະຊາຊົນຈຳນວນໜຶ່ງບໍ່ໃຫ້ຄວາມຮ່ວມມືໃນການຊ່ວຍເຫລືອຕົນເອງ.

ພາບ-ຂ່າວ:ນັກຂ່າວທະຫານແຂວງສາລະວັນ
MEDIALAOS