ໃນວັນທີ 3 ຕຸລາ 2019 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໆ ໄຊຍະບູລີ ພ້ອມດ້ວຍຄະນະນຳຂອງແຂວງ ໄດ້ລົງຢ້ຽມຢາມໂຄງການກໍ່ສ້າງອາຄານໂຮງຮຽນ ມ ສ ນາປຸ່ງ ເມືອງຫົງສາ ເຊິ່ງເປັນກຽດຕ້ອນຮັບຂອງທ່ານ ຄຳຫຼ້າ ຜິວວັນນາ ວ່າການເຈົ້າເມືອງຫົງສາ ພ້ອມດ້ວຍຄະນະ, ມີຫ້ອງການທີ່ກ່ຽວຂ້ອງ, ເຈົ້າຂອງໂຄງການ ແລະ ບໍລິສັດຜູ່ຮັບເໝົາກໍ່ສ້າງເຂົ້າຮ່ວມ.

ໃນໂອກາດນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບລີ ກໍ່ໄດ້ຮັບຟັງການລາຍງານຫຍໍ້ຈາກຕ່າງໜ້າບໍລິສັດຜູ່ຮັບເໝົາກໍ່ສ້າງໂຄງການດັ່ງກ່າວໃຫ້ຮູ້ວ່າ: ການກໍ່ສ້າງມາຮອດປັດຈຸບັນ ແມ່ນມີຄວາມຄືບໜ້າແລ້ວ 85%, ການກໍ່ສ້າງອາຄານໂຮງຮຽນ ມ ສ ນາປຸ່ງ ໄດ້ເລີ່ມລົງມືແຕ່ກາງເດືອນເມສາ ແລະ ຄາດວ່າພາຍໃນທ້າຍເດືອນຕຸລານີ້, ແມ່ນຈະໃຫ້ສຳເລັດ 100%. ໂດຍປະຕິບັດຕາມບົດບັນທຶກທີ່ໄດ້ເຊັນຮ່ວມກັນ ໃນຄັ້ງວັນທີ 12 ມີນາ 2019 ອຳນາດການປົກຄອງປະຊາຊົນແຂວງເຊີນລາ ສສ ຫວຽດນາມ ໄດ້ໃຫ້ທຶນຊ່ວຍເຫຼືອຫຼ້າກໍ່ສ້າງ ໂຮງຮຽນ ມສ ນາປຸ່ງ ມູນຄາ 5 ຕື້ດົງ. ໃນການກໍ່ສ້າງໂຮງຮຽນຫລັງໃຫມ່ນີ້, ໂດຍສ້າງເປັນອາຄານ 2 ຊັ້ນ ມີຂະຫນາດ 9×43,5 ແມັດ, ສູງ 10,5 ແມັດ, ໂຄງສ້າງເບຕົງເສີມເຫລັກ, ຝາກໍ່ດ້ວຍດິນຈີ່ພ້ອມໂບກ, ໂຄງຫລັງຄາໄມ້, ມຸງດ້ວຍກະເບື້ອງສີ, ປະກອບມີ 10 ຫ້ອງຮຽນ, ຫ້ອງນ້ຳ 4 ຫ້ອງ ໂດຍແມ່ນບໍລິສັດ ສົມປະສົງ ກໍ່ສ້າງ ເປັນຜູ້ຮັບເໝົາໂຄງການ. ພ້ອມດຽວກັນນີ້, ທ່ານ ພົງສະຫວັນ ສິດທະວົງ ໄດ້ເນັ້ນໜັກ ໃຫ້ຜູ້ຮັບຜິດຊອບໂຄງການ ຈົ່ງຮີບຮ້ອນໃນການກໍ່ສ້າງອາຄານໂຮງຮຽນ ມ ສ ນາປຸ່ງໃຫ້ສຳເລັດ ຕາມສັນຍາທີ່ໄດ້ກຳນົດໄວ້, ສ່ວນພາກລັດຈະສ້າງສີ່ງອຳນວຍຄວາມສະດວກດ້ານການພົວພັນຮ່ວມມື ແລະ ປະສານສົມທົບວຽກງານທີ່ປີ່ນອ້ອມ ເພື່ອເຮັດໃຫ້ໂຄງການກໍ່ສ້າງ ໄດ້ດຳເນີນຕາມແຜນການທີ່ກຳນົດໄວ້.

ຂ່າວ: ນັກຂ່າວ ເມືອງຫົງສາ
MEDIALAOS