ໃນວັນທີ 9 ຕຸລາ 2019 ນີ້ ກອງບັນຊາການ ປກສ ແຂວງສະຫວັນນະເຂດ,ໄດ້ຈັດກອງປະຊຸມ ຊຸກຍູ້ຕິດຕາມ ແລະການເຄື່ອນໄຫວວຽກງານຕ້ານການຄ້າມະນຸດ, ຂອງຄະນະກຳມະການຕ້ານການຄ້າມະນຸດລະດັບຊາດ,ຢູ່ທີ່ຫ້ອງປະຊຸມກອງບັນຊາການ ປກສ ແຂວງ,ໂດຍການເຂົ້າຮ່ວມເປັນປະທານຂອງທ່ານ ສີມູນ ອຸ່ນລາສີ ຮອງປະທານສູນກາງສະຫະພັນກຳມະບານລາວ ຄະນະກຳມະການຕ້ານການຄ້າມະນຸດລະດັບຊາດ ,ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ ປະທານຄະນະກຳມະການຕ້ານການຄ້າມະນຸດຂັ້ນແຂວງ,ທ່ານ ພັອ ວັນໄຊ ລີໄຊຍະລາດ ຮອງກອງບັນຊາການ ປກສ ແຂວງ,ມີຄະນະກອງເລຂາຕ້ານການຄ້າມະນຸດ,ຄະນະກຳມະການຕ້ານການຄ້າມະນຸດຂັ້ນແຂວງ ແລະ ພະແນກການກ່ຽວຂອງເຂົ້າຮ່ວມ.

ພັທ ສີນະຄອນ ນາມມະລາດ ຮອງຫ້ອງຕຳຫຼວດ ປກສແຂວງ ທັງເປັນຜູ້ຊີ້ນຳວຽກງານຕ້ານການຄ້າມະນຸດ ໄດ້ຂຶ້ນລາຍງານຕໍ່ກອງປະຊຸມວ່າ: ສະພາບການເຄື່ອນໄຫວວຽກງານຕ້ານການຄ້າມະນຸດພາຍໃນແຂວງສະຫວັນນະເຂດໃນໄລຍະຜ່ານມາ ແຂວງສະຫວັນນະເຂດເປັນແຂວງໜຶ່ງທີ່ມີຊາຍແດນຕິດຈອດກັບຣາຊະນາຈັກໄທ ແລະ ສສ ຫວຽດນາມ,ເປັນແຂວງທີ່ມີເສັ້ນທາງຜ່ານຈາກຣາຊະນາຈັກໄທ ມາສູ່ ສສ ຫວຽດນາມ,ມີຄວາມສະດວກສະບາຍໃນການດຳເນີນທຸລະກິດ ການຄ້າ ແລະການບໍລິການ,ເຊິ່ງເປັນພື່ນທີ່ໜຶ່ງທີ່ກຸ່ມຄົນບໍ່ດີສວຍໃຊ້ເປັນເສັ້ນທາງຜ່ານແອບແຝງ,ການຄ້າມະນຸດດ້ວຍຫຼາຍຮູບແບບ, ດັ່ງນັ້ນ,ໃນໄລຍະຜ່ານມາ ພັກ ແລະລັດຖະບານກໍຄືການນຳ ແຂວງສຫວັນນະເຂດ,ໄດ້ເອົາໃຈໃສ່ຕໍ່ການສ້າງທຸກເງື່ອນໄຂອຳນວຍຄວາມສະດວກໃຫ້ແກ່ການພັດທະນາ,ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ ເຊິ່ງໃນໄລຍະຜ່ານມາໄດ້ລົງກວດກາເກັບກຳຂໍ້ມູນຫ້າງຮ້ານກິນດື່ມ,ຮ້ານບັນເທິ່ງ-ຄາຣາໂອເກະ,ຮ້ານອາຫານທີ່ມີສາວບໍລິການ ພາຍໃນນະຄອນໄກສອນ ພົມວິຫານໄດ້ 23 ຮ້ານ,ສາວບໍລິການ 172 ຄົນ ໃນນີ້ອາຍຸຕຳກ່ວາ 18 ປີ ມີ 11ຄົນ, ໄດ້ຮັບແຈ້ງຄວາມ 1ເລື່ອງ, ໄດ້ເຂົ້າຮ່ວມຄົ້ນຄວ້າ ໄກ່ເກ່ຍບັນຫາຕ່າງໆທີ່ພົວພັນເຖິງສິດຜົນປະໂຫຍດຂອງແມ່ຍິງ-ເດັກນ້ອຍໄດ້ 5ຄັ້ງ, ມີ 8 ເລື່ອງ,ດຳເນີນຄະດີ 3ເລື່ອງ, ມີ 4ລາຍ, ຜູ່ຖືກຫາ 6ຄົນ, ຍິງ 2ຄົນ, ຜູ່ເຄາະຮ້າຍເປັນເພດຍິງທັງໝົດ 6ຄົນ, ຂົ່ມຂືນກະທໍາສໍາເລົາເດັກ 2 ລາຍ, ຜູ້ຖືກຫາ 4ຄົນ, ມີຜູ່ເຄາະຮ້າຍ 2ຄົນ, ຄ້າປະເພນີ 1ລາຍ, ຜູ່ຖືກຫາ 1ຄົນ, ຜູ່ເຄາະຮ້າຍ 1ຄົນ, ຄ້າມະນຸດ 1ລາຍ, ຜູ່ຖືກຫາ 1ຄົນ, ມີຜູ່ເຄາະຮ້າຍ 1ຄົນ, ຈາກສະພາບຄື ດັ່ງກ່າວ ຄະນະພັກຄະນະບັນຊາກໍ່ຄືຄະນະກຳມະການຕ້ານການຄ້າມະນຸດຂັ້ນແຂວງໄດ້ຊຸກຍູ້ເລົ່າລົບວິຊາສະເພາະທີ່ກ່ຽວຂອງລົງສົມທົບກັບອຳນາດການປົກຄອງຂັ້ນຕ່າງໆ,ກໍ່ໄດ້ເອົາໃຈໃສ່ສຶບຕໍ່ເຮັດວຽກງານປ້ອງກັນສະກັດກັ້ນສ້າງຄວາມເຂັ້ມແຂງວຽກງານໂຄສະນາໃຫ້ພະນັກງານແລະທົ່ວສັງຄົມທຸກຊັ້ນຄົນໃຫ້ເຂັ້ມແຂງ,ຮັບຮູ້ແລະເຂົ້າໃຈຢ່າງຈະແຈ້ງເຖິ່ງຜົນຮ້າຍຂອງການຄ້າມະນຸດຢ່າງກ່ວາງຂວາງພ້ອມທັງຊຸກຍູ້ໃຫ້ການຈັດຕັ້ງທຸກພາກສ່ວນໃນສັງຄົມເປັນເຈົ້າການປະກອບສ່ວນຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິຜົນສູງ,ຈາກນັ້ນ ໃນກອງປະຊຸມບັນດາພາກສວນຍັງໄດ້ປະກອບຄຳຄິດຄຳເຫັນໃສ່ບົດລາຍງານຢ່າງກົງໄປກົງມາເພື່ອເຮັດໃຫ້ມີເນື້ອໃນຖືກຕ້ອງສົມບູນ ແລະ ຄົບຖ້ວນ.

ພາບ:ຂ່າວ ປກສ ແຂວງສະຫວັນນະເຂດ
MediaLaos