ພິທີ ຮັບເອົາມະຫາຊົນກ້າວໜ້າເຂົ້າເປັນສະມາຊິກພັກປະຊາຊົນປະຕິວັດລາວ ຂອງໜ່ວຍພັກໂຄສະນາ, ໜ່ວຍພັກກວດກາ ແລະ ໜ່ວຍພັກອົງການຈັດຕັ້ງມະຫາຊົນ ຮາກຖານເມືອງອຸທຸມພອນ ໄດ້ຈັດຂຶ້ນໃນວັນທີ 9 ຕຸລາ 2019 ທີ່ຜ່ານມາ ຢູ່ທີ່ສະໂມສອນຂອງເມືອງ ໂດຍພາຍໃຕ້ການເຂົ້າຮ່ວມຂອງສະຫາຍ ຄຳເຫວີຍ ເພັງພະຈັນ ຄະນະປະຈຳພັກເມືອງ ປະທານກວດກາພັກ-ລັດເມືອງ, ມີບັນດາທ່ານ-ບັນດາສະຫາຍ ກຳມະການພັກເມືອງ, ເລຂາ ໜ່ວຍພັກ, ຄະນະໜ່ວຍພັກ, ແຂກຖືກເຊີນ ຕະຫຼອດຮອດສະມາຊິກພັກ ແລະ ມະຫາຊົນກ້າວໜ້າທີ່ກ່ຽວຂ້ອງເຂົ້າ ຮ່ວມ.

ໃນພິທີ ພາຍຫຼັງທີ່ມະຫາຊົນກ້າວໜ້າທັງສາມໜ່ວຍພັກ ໄດ້ຜ່ານໃບຄຳຮ້ອງຂໍເຂົ້າເປັນສະມາຊິກພັກປະຊາ ຊົນປະຕິວັດລາວ ຢ່າງເປັນທາງການແລ້ວ ບັນດາສະຫາຍສະມາຊິກພັກສົມບູນຜູ້ຕິດຕາມ ກໍ່ໄດ້ຜັດປ່ຽນກັນຂຶ້ນປະ ກອບຈຸດດີ ແລະ ກ່າວຈຸດອ່ອນ ຂອງມະຫາຊົນກ້າວໜ້າແຕ່ລະສະຫາຍ. ຈາກນັ້ນ ສະຫາຍ ກິນດາວົງ ອຸ່ນມະນີ ເລຂາໜ່ວຍພັກກວດກາ ກໍ່ໄດ້ຕາງໜ້າໃຫ້ຄະນະປະທານ ຜ່ານມະຕິຕົກລົງຂອງຄະນະປະຈຳພັກເມືອງ ວ່າດ້ວຍການອະນຸມັດຮັບເອົາສະມາຊິກພັກໃໝ່ ພ້ອມທັງໃຫ້ກຽດມອບມະຕິຕົກລົງ, ຈັບມືຮັບເອົາສະມາຊິກພັກໃໝ່, ອະທິບາຍ ພິທີ ແລະ ຜ່ານກົດລະບຽບສະໄໝສຳຮອງ ໃຫ້ສະມາຊິກພັກໃໝ່ໄດ້ຮັບຮູ້. ເຊິ່ງພິທີ ຮັບເອົາມະຫາຊົນ ກ້າວໜ້າເຂົ້າເປັນສະມາຊິກພັກປະຊາຊົນປະຕິວັດລາວໃນຄັ້ງນີ້ ມີທັງໝົດ 4 ສະຫາຍ, ຍິງ 1 ສະຫາຍ ໃນນັ້ນມີ ໜ່ວຍພັກໂຄສະນາ 1 ສະຫາຍ, ໜ່ວຍພັກກວດກາ 1 ສະຫາຍ ແລະ ໜ່ວຍພັກອົງການຈັດຕັ້ງມະຫາຊົນ 2 ສະ ຫາຍ, ຍິງ 1 ສະຫາຍ. ໃນຕອນທ້າຍຂອງພິທີ ຜູ້ເຂົ້າຮ່ວມຍັງໄດ້ຮັບຟັງການໂອ້ລົມໃຫ້ທິດຊີ້ນໍາ ຈາກສະຫາຍ ຄຳເຫວີຍ ເພັງພະຈັນ ຄະນະປະຈຳພັກເມືອງ. ເຊິ່ງສະຫາຍໄດ້ເນັ້ນໃຫ້ບັນດາສະມາຊິກພັກ ຕ້ອງເອົາໃຈໃສປະຕິບັດລະບຽບຂອງພັກ, ປະຕິບັດບັນດາແຈ້ງການ ແລະ ຄຳສັ່ງຂອງຂັ້ນເທິງໃນແຕ່ລະຂັ້ນ ຢ່າງເຂັ້ມງວດ, ເປັນແບບຢ່າງໃຫ້ແກ່ມະຫາຊົນ ແລະພະນັກງານ-ລັດຖະກອນ, ເພີ່ມທະວີການນໍາພາ ຂອງພັກໃຫ້ເຂັ້ມແຂງ ແລະເອົາໃຈໃສ່ປະຕິບັດໜ້າທີ່ຕາມພາລະບົດບາດວິຊາສະເພາະຂອງຕົນ ຢ່າງສຸດຄວາມສາມາດ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ
MediaLaos