ກອງປະຊຸມໃຫຍ່ຜູ້ແທນອົງຄະນະພັກເມືອງໂຂງຄັ້ງທີ 8 ໄຂຂຶ້ນຢ່າງເປັນທາງການ ໃນວັນທີ 10 ຕຸລາ 2019 ນີ້ ຢູ່ທີ່ສະໂມສອນເມືອງ. ໂດຍການໃຫ້ກຽດເຂົ້າຮ່ວມຂອງສະຫາຍ ປອ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ, ສະຫາຍ ນິພອນ ວຽງປະເສີດ ຮອງເລຂາພັກແຂວງ,ຫົວໜ້າຄະນະຈັດຕັ້ງແຂວງ,ບັນດາຄະນະບໍລິຫານງານພັກແຂວງ,ສະຫາຍເລຂາພັກເມືອງ,ເຈົ້າເມືອງ, ບັນດາຄະນະປະຈຳພັກເມືອງ, ກຳມະການພັກເມືອງ, ຄະນະພັກ 1 ນະຄອນ, 8 ເມືອງ, ພະແນກການກົມກອງອ້ອມຂ້າງແຂວງ, ພະນັກງານປະຕິວັດອາວຸໂສ,ບໍານານ ເຂົ້າຮ່ວມທັງໝົດ 200 ກວ່າສະຫາຍ.ໃນນັ້ນຜູ້ແທນສົມບູນຕົວແທນຮາກຖານພັກທົ່ວເມືອງໂຂງ 177 ສະຫາຍ.

ໃນວາລະດຳເນີນກອງປະຊຸມ ສະຫາຍ ສະໜັ່ນ ສີພາພົມມະຈັນ ເລຂາພັກເມືອງເຈົ້າເມືອງໂຂງ ໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ການດຳເນີນກອງປະຊຸມໃຫຍ່ ຄັ້ງທີ 8 ຂອງອົງຄະນະພັກເມືອງໂຂງແມ່ນໄດ້ຈັດຕັ້ງປະຕິບັດກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່ເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ. ຜູ້ແທນກອງປະຊຸມໃຫຍ່ ຈະໄດ້ພ້ອມກັນຄົ້ນຄວ້າຮັບຮອງເອົາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງສະໄໝທີ8 , ຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນແກນນຳຂອງອົງຄະນະພັກທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາເສດຖະກິດ-ສັງຄົມຕະຫຼອດສະໄໝທີ 8 (ແຕ່ປີ 2020-2024) ໃຫ້ປະກົດຜົນເປັນຈິງ, ນໍາພາເມືອງໂຂງກ້າວຂຶ້ນເປັນເມືອງມີຄວາມສະຫງົບ, ສະອາດສວຍງາມ, ມີສິ່ງແວດລ້ວມທີ່ດີເປັນເມືອງທ່ອງທ່ຽວ.

ຈາກນີ້ ສະຫາຍ ສະໜັ່ນ ສີພາພົມມະຈັນ ຍັງໄດ້ຜ່ານບົດລາຍງານການເມືອງທັງສອງພາກຍົກໃຫ້ເຫັນຜົນງານຜ່ານມາຂອງອົງຄະນະພັກເມືອງໃນໄລຍະ 5 ປີທີ່ຜ່ານມາ 2015-2019 ໂດຍຍົກໃຫ້ເຫັນທົ່ວເມືອງມີຄວາມເປັນສະຖຽນລະພາບທາງດ້ານການເມືອງ, ຮັບປະກັນຄວາມສະຫງົບໂດຍພື້ນຖານ,ດ້ານເສດຖະກິດ-ສັງຄົມ ສືບຕໍ່ຂະຫຍາຍຕົວຕໍ່ເນື່ອງ ໂດຍສະເລ່ຍໃນລະດັບ 8,2% ລວມຍອດຜະລິດຕະພັນ 5 ປີ ປະຕິບັດໄດ້ 6.610 ຕື້ກີບ ສະເລ່ຍໃສ່ພົນລະເມືອງເພີ່ມຂຶ້ນຈາກ 11 ລ້ານ 2 ແສນກີບ ຫຼື 1 400 ໂດລາ ໃນປີ 2014 ມາເປັນ 21 ລ້ານ 2 ແສນກີບ ຫຼື ເທົ່າກັບ 2 655 ໂດລາ ຕໍ່ຄົນໃນປີ 2019 ການລະດົມທຶນເພື່ອພັດທະນາຂອງເມືອງ ປະຕິບັດໄດ້ 4 616 ຕື້ກວ່າກີບ. ເຮັດໃຫ້ໂຄງປະກອບເສດຖະກິດຂອງເມືອງຫັນປ່ຽນໄປຕາມທິດທີ່ຕັ້ງໜ້າຕາມທ່າແຮງບົ່ມຊ້ອນຂອງທ້ອງຖິ່ນ.

ໃນກອງປະຊຸມຄັ້ງນີ້ ຍັງໄດ້ຜ່ານແຜນພັດທະນະເສດຖະກິດ-ສັງຄົມ 5 ປີຕໍ່ໜ້າ 2020-2024 ສະເໜີໂດຍສະຫາຍ ນາງ ຄຳພູ ລິດທິສັກ ຮອງເລຂາພັກເມືອງຮອງເຈົ້າເມືອງເມືອງໂຂງ ການປະກອບຄຳຄິດຄຳເຫັນຂອງພາກສ່ວນຕ່າງໆເຊັ່ນ: ຮາກຖານພັກດີເດັ່ນໃນການຊີ້ນໍານຳພາ,ຫົວໜ່ວຍທຸລະກິດການຜະລິດ,ບໍລິການ,ປູກຝັງລ້ຽງສັດ ຄອບຄົວຕົວແບບດ້ານອື່ນໆ ຕະຫຼອດຮອດອົງການຈັດຕັ້ງຕ່າງໆເຮັດໃຫ້ບັນຍາກາດການດໍາເນີນກອງປະຊຸມໃຫຍ່ຜູ້ແທນອົງຄະນະພັກເມືອງໂຂງຄັ້ງທີ 8 ນີ້ ມີເນື້ອໃນອຸດົມສົມບູນ,ກ້ວາງຂວາງເລິກເຊິ່ງ. ກອງປະຊຸມໃຫຍ່ຄັ້ງນີ້ ຈະໄດ້ດຳເນີນໄປເປັນເວລາ 2 ວັນຈິ່ງຈະໄດ້ອັດລົງ.

MediaLaos
ສື່ມວນຊົນແຂວງຈຳປາສັກ