ກອງປະຊຸມໃຫຍ່ຄັ້ງທີ່ 11 ຂອງອົງຄະນະພັກ ເມືອງຊໍາໃຕ້ ແຂວງຫົວພັນໄດ້ໄຂຂື້ນຢ່າງເປັນທາງການ ໃນຕອນເຊົ້າ ວັນທີ່ 10 ຕຸລາ 2019 ນີ້ ຢູ່ທີ່ສະໂມສອນຂອງເມືອງ ໂດຍການເປັນປະທານຂອງ ສະຫາຍ ພອນຈັນ ຂະທຸມພົມ ຮັກສາການເລຂາຄະນະບໍລິຫານງານພັກເມືອງ ຮັກສາການເຈົ້າເມືອງຊໍາໃຕ້, ເປັນກຽດເຂົ້າຮ່ວມຂອງສະຫາຍ ທອງຢ້ຽວ ພັດມະນີຈັນ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີບັນດາສະຫາຍ ຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ແຂກຖືກເຊີນຈາກພະແນກການຂັ້ນແຂວງ ແລະ ການນໍາເມືອງອ້ອມຂ້າງໃນທົ່ວແຂວງ ພ້ອມດ້ວຍຜູ້ແທນກອງປະຊຸມເຂົ້າຮ່ວມທັງໝົດ 193 ສະຫາຍ, ຍິງ 10 ສະຫາຍ ໃນນີ້ຜູ້ແທນສົມບູນ 145 ສ/ຫ ຍິງ 8 ສ/ຫ.

ໃນໄລຍະ 5 ປີທີ່ຜ່ານມາ ອົງຄະນະພັກເມືອງຊໍາໃຕ້ ຄັ້ງທີ່ 10 ໄດ້ເອົາໃຈໃສ່ຊີ້ນໍາ – ນໍາພາໃນການພັດທະນາເສດຖະກິດ ແລະ ແກ້ໄຂຄວາມທຸກຍາກ ໂດຍຍຶດຖືເອົາການພັດທະເສດຖະກິດເປັນໃຈກາງ ເພື່ອແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າຢູ່ພາຍໃນເມືອງໃຫ້ນັບມື້ດີຂື້ນ, ໄດ້ສຸມໃສ່ນໍາພາ – ຊີ້ນໍາການຈັດຕັ້ງປະຕິບັດຕາມທິດທາງ ແລະ ຄາດໝາຍທີ່ມະຕິກອງປະຊຸມຄັ້ງທີ່ 10 ໄດ້ຮັບຮອງ ໂດຍໄດ້ສຸມໃສ່ ການລົງທຶນຂອງນັກທຸລະກິດທັງພາຍໃນ ແລະ ຕ່າງປະເທດ, ກໍ່ສ້າງ ພື້ນຖານໂຄງລ່າງ ໂດຍສະເພາະເສດຖະກິດຂອງເມືອງ ມີການຂະຫຍາຍຕົວຕໍ່ເນື່ອງເຊັ່ນ: ອັດຕາການຂະຫຍາຍຕົວ ເສດຖະກິດ ໂດຍສະເລ່ຍ 7,76% ຕໍ່ປີ, ລວມຍອດຜະລິດຕະພັນພາຍໃນເມືອງ ສົກປີ 2019, ບັນລຸ 3 ຮ້ອຍ 34 ຕື້ກີບ ລາຍໄດ້ສະເລ່ຍຕໍ່ຄົນບັນລຸ 7 ລ້ານ 341 ພັນກວ່າກີບ ຫຼື 918 ໂດລາ/ຄົນ/ປີ, ທຽບໃສ່ປີ2015 ເພີ່ມຂຶ້ນ 280 ໂດລາ, ຈໍານວນບ້ານທີ່ມີໄຟຟ້າເຂົ້າເຖີງມີ 76 ບ້ານ, ມີຜູ້ຊົມໃຊ້ໄຟຟ້າໃນຕາຂ່າຍກວມ ເອົາ 64% ຂອງຈໍານວນຄົວເຮືອນທັງຫມົດ ທຽບໃສ່ປີ 2015 ເພີ່ມຂື້ນ 34%, ມີທາງລົດເຂົ້າເຖີງຫມູ່ບ້ານໄດ້ 100%, ມີຄວາມຍາວຂອງທາງທັງຫມົດ 672 ກວ່າກິໂລແມັດ, ໃນນີ້: ມີທາງປູຢາງ 155 ກມ, ທາງດິນແດງ 386,6 ກມ ແລະ ທາງໄປສູ່ ເຂດທໍາການຜະລິດ 130 ກວ່າກິໂລແມັດ, ລະບົບໄປສະນີໂທລະຄົມມະນາຄົມ ແລະ ການສື່ສານໄດ້ພັດທະນາແລະຂະຫຍາຍຕາຫນ່າງໄປສະນີ ກວມ 97% ຂອງພື້ນທີ່ທົ່ວເມືອງ. ສີນຄ້ານໍາເຂົ້າບັນລຸ 21 ຕື້ກວ່າກີບ ທຽບໃສ່ແຜນການປະຕິບັດໄດ້ລື່ນຄາດຫມາຍ 59,82%, ໃນນີ້ສີນຄ້າສົ່ງອອກບັນລຸ 12 ຕື້ກວ່າກີບ ທຽບໃສ່ແຜນປະຕິບັດໄດ້ 66,90% ຂາດດູນການຄ້າ 9 ຕື້ກວ່າກີບ, ອັດຕາຄວາມທຸກຍາກຂອງປະຊາຊົນຍັງເຫຼືອ 12,84% ຕາມດໍາລັດເລກທີ 093/ລບ, ແຕ່ຖ້າ ທຽບໃສ່ມາດຖານໃຫມ່ຕາມດໍາລັດເລກທີ 348/ລບ, ອັດຕາຄົວເຮືອນທຸກຍາກກວມເອົາ 36,79%.ນອກນີ້ພາກເອກະ ຊົນກໍ່ໄດ້ມີການລົງທຶນຢ່າງຫຼວງຫຼາຍເປັນຕົ້ນແມ່ນລົງທຶນກໍ່ສ້າງທີ່ຢູ່ອາໄສ, ຫ້າງຮ້ານ ແລະ ສົ່ງເສີມການຕ່ໍາຫູກທໍໄຫມ, ລ້ຽງສັດ-ປູກຝັງຫຼາຍຢ່າງໄດ້ເຮັດໃຫ້ປະຊາຊົນມີລາຍໄດ້ເພີ່ມຂື້ນເປັນດໍາລັບ. ກອງປະຊຸມຍັງໄດ້ວາງຄາດໝາຍສູ້ຊົນ 2019-2024 ໂດຍຈະເອົາໃຈໃສ່ສ້າງເງື່ອນໄຂ ແລະ ເພີ່ມທະວີການຂຸດຄົ້ນທຸກທ່າແຮງບົ່ມຊ້ອນເຂົ້າໃສ່ການພັດທະນາເສດຖະກິດໃຫ້ມີການຂະຫຍາຍຕົວຕໍ່ເນື່ອງໃນລະດັບ 7,27% ຂຶ້ນໄປ, ຍອດຜະລິດຕະພັນພາຍໃນ (GDP) ໃນປີ 2024 ໃຫ້ບັນລຸ 1 ພັນຕື້ 732 ລ້ານກີບ.ສະເລ່ຍຕໍ່ຫົວຄົນບັນລຸ 8 ລ້ານກວ່າກີບ, ເທົ່າກັບ 1 ພັນ 8 ໂດລາ/ຄົນ/ປີ, ເອົາໃຈໃສ່ແກ້ ໄຂຄວາມທຸກຍາກໃຫ້ຍັງເຫຼືອ 15,38% ຂອງຈໍານວນຄອບຄົວທີ່ຍັງທຸກຍາກທັງຫມົດ, ໂຄງປະກອບເສດຖະກິດໃຫ້ ມີການຫັນປ່ຽນຢ່າງເຂັ້ມແຂງ ໃນນີ້ຂະແຫນງກະສິກາ ແລະ ປ່າໄມ້ ກວມເອົາ 66,30% ຂອງ GDP; ຂະແຫນງອຸດສາຫະກາ – ຫັດຖະກາ ກວມເອົາ 15,61% ຂອງ GDP ແລະ ຂະແຫນງບໍລິການ
ກວມເອົາ 18,09% ຂອງ GDP;
ພ້ອມນີ້ບັນດາຜູ້ແທນທີ່ເຂົ້າຮ່ວມກອງປະຊຸມ ຍັງໄດ້ພ້ອມກັນປະກອບຄໍາຄິດຄໍາເຫັນໃສ່ ບົດລາຍງານການເມືອງ ແລະ ແຜນພັດທະນາເສດຖະກິດ – ສັງຄົມ 5 ປີໃນຕໍ່ໜ້າ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງອົງຄະນະພັກເມືອງຄັ້ງທີ່ 12 ໄດ້ຮັບການຈັດຕັ້ງປະຕິບັດໃຫ້ປະກົດຜົນເປັນຈິງ ແລະ ໄດ້ຕາມແຜນທີ່ວາງໄວ້. ເຊິ່ງກອງປະຊຸມຈະໄດ້ດໍາເນີນເປັນເວລາ 2 ວັນຈິ່ງສຳເລັດ.

ຂ່າວ-ພາບ:ອາລຸນໄຊ
MediaLaos