ເພື່ອປະຕິບັດຕາມແຜນການຮ່ວມມືລະຫວ່າງ ຄະນະໂຄສະນາອົບຮົມແຂວງສາລະວັນ ກັບ ພະແນກໄປສະນີຄົມມະນາຄົມ ແລະ ການສື່ສານແຂວງ, ພະແນກສຶກສາທິການ ແລະ ກິລາແຂວງ, ພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ແລະ ກອງບັນຊາການ ປກສ ແຂວງສາລະວັນ ຈຶ່ງໄດ້ຈັດກອງປະຊຸມ ສະຫຼຸບຜົນສໍາເລັດ ການເຄື່ອນໄຫວໂຄສະນາ ເຜີຍແຜ່ການນໍາໃຊ້ສື່ສັງຄົມອອນລາຍໃຫ້ຖືກຕ້ອງຂຶ້ນໃນວັນທີ 9 ຕຸລາ 2019ນີ້ ຢູ່ທີ່ຫ້ອງປະຊຸມ ຊັ້ນ3 ຫ້ອງວ່າການແຂວງ ໃຫ້ກຽດເປັນປະທານໂດຍ ທ່ານ ສີເຮັງ ຫອມສົມບັດ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງສາລະວັນ, ມີທ່ານຫົວໜ້າພະແນກ ການທີ່ກ່ຽວຂ້ອງ ພ້ອມດ້ວຍຄະນະຮັບຜິດຊອບ ແລະ ວິທະຍາກອນ ແຕ່ລະພະແນກເຂົ້າຮ່ວມ.

ທ່ານ ນາງ ນູຄໍາ ສູນທອນສະຫວັດ ໄດ້ຂຶ້ນຜ່ານຮ່າງບົດສະຫຼຸບຜົນສໍາເລັດຂອງການເຄື່ອນໄຫວຄັ້ງນີ້ ເພື່ອເຮັດໃຫ້ນັກຮຽນ, ນັກສຶກສາ, ພະນັກງານ-ສະມາຊິກພັກ ຮັບຮູ້ເຂົ້າໃຈ ກ່ຽວກັບກົດໝາຍ, ລະບຽບຫຼັກການ ໃນການນໍາໃຊ້ສື່ສັງຄົມອອນລາຍໃຫ້ຖືກຕ້ອງ, ຮັບຮູ້ເຖິງດ້ານຕັ້ງໜ້າ ແລະ ດ້ານຫຍໍ້ທໍ້ ສາມາດຈໍາແນກເສບຂ່າວຢ່າງມີສະຕິ ເປັນຕົ້ນ ແມ່ນຂ່າວປອມ, ຂ່າວໂຈມຕີການໃສ່ຮ້າຍປ້າຍສີການນຳຂອງພັກ ແລະ ອື່ນໆທີ່ບໍ່ມີຂໍ້ມູນຄວາມຈິງ ເຂົ້າໃນຊີວິດປະຈຳວັນ, ໄດ້ຮັບຮູ້-ເຂົ້າໃຈກ່ຽວກັບກົດລະບຽບຈາລະຈອນ ແລະ ຜົນຮ້າຍ-ໄພອັນຕະລາຍຂອງສິ່ງເສບຕິດ ທັງເປັນການສຶກສາອົບຮົມການເມືອງ-ແນວຄິດໃຫ້ໜັກແໜ້ນ ສາມາດຕອບໂຕ້ປະກົດການຫຍໍ້ທໍ້ຕ່າງໆ ທີ່ເກີດຂຶ້ນຢ່າງວ່ອງໄວທັນການ ເຊິ່ງຜົນສໍາເລັດໃນການເຄື່ອນໄຫວໂຄສະນາເຜີຍແຜ່ການນຳໃຊ້ສື່ສັງຄົມອອນລາຍ ໃຫ້ຖືກຕ້ອງ ແລະ ຕອບຕ້ານປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນຄອບຄົວ, ສັງຄົມ ແລະ ໂຮງຮຽນ ໃຫ້ແກ່ນັກຮຽນ, ນັກສຶກສາ ແລະ ພະນັກງານຫຼັກແຫຼ່ງ(ຊຸດທີ01) ໃນ 8 ຈຸດ ມີຜູ້ເຂົ້າຮ່ວມຮັບຟັງທັງໝົດ 4.924 ຄົນ, ຍິງ 2.198 ຄົນ.

ພາບ-ຂ່າວ: ກິນດາວັນ
MediaLaos