ທ່ານ ຈັນ ບຸບຜາລີວັນ ເຈົ້າເມືອງໆທ່າແຂກ ທັງເປັນຮອງປະທານຈັດງານບຸນອອກພັນສາ ແລະ ຊ່ວງເຮືອປະຈຳປີ 2019 ໃຫ້ສຳພາດຕໍ່ນັກຂ່າວທ້ອງຖິ່ນວ່າ: ສຳລັບປີ 2019 ໂດຍສະເພາະໃນເດືອນຕຸລາ ເມືອງທ່າແຂກ ແມ່ນໄດ້ຈັດງານປະເພນີທີ່ສຳຄັນ 2 ງານໄປພ້ອມໆກັນ ກໍ່ຄືງານສະເຫຼີມສະຫຼອງຫໍຫຼັກເມືອງ ແລະ ຂັ້ນໄດຂຶ້ນ-ລົງນໍ້າ ຫຼື ສ່ວນຫຼາຍເອີ້ນກັນວ່າຂັ້ນໄດພະຍານາກ ໂດຍໄດ້ເລີ່ມໃນວັນທີ 8-9 ຕຸລາ ໂດຍໄດ້ມີການຄົບງັນ ແລະ ຕັກບາດຖວາຍສັງຂະທານ ຕາມປະເພນີ.

ສ່ວນງານບຸນອອກພັນສາ ແລະ ຊ່ວງເຮືອ ແມ່ນໄດ້ກຳນົດເປັນເວລາ 3 ວັນ ເລີ່ມແຕ່ວັນທີ 11 ຫາ 13 ຕຸລາ ໂດຍກຳນົດເອົາ 3 ກິດຈະກຳໃຫຍ່ຄື: ການແຂ່ງຂັນເຮືອຊ່ວງ ໂດຍມີບັນດາເຮືອຊ່ວງສະໝັກເຂົ້າມາແຂ່ງຂັນແລ້ວຈຳນວນ 32 ລຳ. ໃນນັ້ນແບ່ງອອກເປັນ 3 ປະເພດຄື: ປະເພດ 55 ສີພາຍຈຳນວນ 4 ລຳ, ປະເພດ 35 ສີພາຍ ມີ 12 ລຳ ແລະ ປະເພດ 12 ສີພາຍມີ 16 ລຳ ພິເສດແມ່ນຍັງມີການແຂ່ງຂັນເຮືອຊ່ວງມິດຕະພາບ ຄຳມ່ວນ-ນະຄອນພະນົມ ມີເຮືອເຂົ້າຮ່ວມແຂ່ງຂັນ ຈຳນວນ 8 ລຳ, ກິດຈະກຳໄຫຼເຮືອໄຟ ເຊິ່ງຈະມີເຮືອໄຟເຂົ້າຮ່ວມຈຳນວນ 3 ລຳ ແລະ ກະໂທງສາຍ ຈຳນວນ 2019 ດວງ. ສຳລັບກິດຈະກຳວາງສະແດງ ແລະ ຈຳໜ່າຍສິນຄ້າ ເຊິ່ງປະຈຸບັນມີບັນດາຮ້ານຄ້າເຂົ້າມາວາງສະແດງແລ້ວຈຳນວນ 34 ຮ້ານ ແລະ ຍັງມີບັນດາຮ້ານຂາຍເຄື່ອງຍ່ອຍອີກຈຳນວນຫຼວງຫຼາຍ.

ທ່ານເຈົ້າເມືອງທ່າແຂກກ່າວຕື່ມວ່າ: ສຳລັບແຜນງົນປະມານລາຍຈ່າຍໃນງານບຸນອອກພັນສາ ແລະ ຊ່ວງເຮືອປີນີ້ ແມ່ນປະມານ 525 ລ້ານກວ່າກີບ. ໃນນີ້ແມ່ນນຳໃຊ້ເຂົ້າເປັນຂອງຂວັນລາງວັນເຮືອຊ່ວງ, ຄ່າສ້າງເຮືອໄຟ, ຄ່າທຽບທ່າ, ອັດຕາກິນສີພາຍ ແລະ ຄ່າສິ້ນເປືອງຮັບໃຊ້ບັນດາກິດຈະກຳຕ່າງໆ ເຊິ່ງມາຮອດປະຈຸບັນມີພາກສ່ວນຕ່າງໆປະກອບສ່ວນອຸປະຖຳແລ້ວຈຳນວນ 208 ລ້ານກວ່າກີບ. ພິເສດທາງບໍລິສັດເບຍລາວໄດ້ໃຫ້ການປະກອບສ່ວນວັດຖຸອຸປະກອນ ແລະ ເງິນສົດ ລວມມີມູນຄ່າ 55 ລ້ານກວ່າກີບ. ດັ່ງນັ້ນຈຶ່ງຮຽກຮ້ອງມາຍັງບັນດາເມືອງ, ພະແນກການ, ສະມາຄົມ, ຫ້ອງການ, ຫົວໜ່ວຍທຸລະກິດ, ຫ້າງຮ້ານ ແລະ ຜູ້ປະກອບການຕ່າງໆ ຈົ່ງໃຫ້ການປະກອບສ່ວນສະໜັບສະໜູນ ເພື່ອເຮັດໃຫ້ງານບຸນອອກພັນສາ ແລະ ຊ່ວງເຮືອ ປະຈຳປີ 2019 ໄດ້ປະສົບຜົນສຳເລັດ, ມີຄວາມສະຫງົບເປັນລະບຽບຮຽບຮ້ອຍ ແລະ ຮັກສາໄດ້ຮີດຄອງປະເພນີອັນດີງານຂອງທ້ອງຖິ່ນໄວ້ຕະຫຼອດໄປ.

MediaLaos