ວັນທີ 10 ຕຸລານີ້ ກອງປະຊຸມໃຫຍ່ຜູ້ແທນອົງຄະນະພັກ ເມືອງຕຸ້ມລານ ຄັ້ງທີ X ໄດ້ໄຂຂື້ນຢ່າງເປັນທາງການ, ໂດຍການເຂົ້າຮ່ວມຂອງ ສະຫາຍ ສີສຸວັນ ວົງຈອມສີ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ, ພາຍໄຕ້ການເປັນປະທານຂອງ ສະຫາຍ ຈັນສະໝອນ ພົມມະແສງ ກຳມະການພັກແຂວງ ເລຂາພັກ ເຈົ້າເມືອງໆຕຸ້ມລານ, ມີ ທ່ານ ບຸນທຽມ ແກ້ວໄຊຍະວົງ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ພ້ອມດ້ວຍຄະນະປະຈຳພັກ-ກຳມະການພັກເມືອງ ແລະ ຜູ້ແທນກອງປະຊຸມໃຫຍ່ ຈຳນວນ 121 ສະຫາຍ, ຍິງ 14 ສະຫາຍ ທີ່ເປັນຕົວແທນໃຫ້ສະມາຊິກພັກໃນທົ່ວເມືອງທັງໝົດ 700 ກວ່າສະຫາຍ ແລະມີບັນດາແຂກຖືກເຊີນຈາກເມືອງອ້ອມຂ້າງແຂວງ ແລະ ແຂວງສະຫວັນນະເຂດ ຕະຫຼອດຮອດພະນັກງານອາວຸໂສບຳນານ, ແຂກຖືກເຊີນ ເຂົ້າຮ່ວມ.

ສະຫາຍ ຈັນສະໝອນ ພົມມະແສງ ເລຂາຄະນະບໍລິຫານງານພັກເມືອງຕຸ້ມລານ ໄດ້ກ່າວໄຂກອງປະຊຸມ ພ້ອມທັງຜ່ານຮ່າງລາຍງານການເມືອງທັງສອງພາກ, ຊື່ງຈະໄດ້ພ້ອມກັນທົບທວນຄືນ, ຕີລາຄາການຈັດຕັ້ງປະຕິບັດວຽກງານໃນໄລຍະສະໄໝຜ່ານມາ, ພ້ອມກັນຄົ້ນຄວ້າເສີມຂະຫຍາຍຈຸດດີ, ຂໍ້ຄົງຄ້າງ ທີ່ຕ້ອງດັດແກ້, ປັບປຸງ ແລະ ຖອດຖອນເອົາບົດຮຽນອັນດີທີ່ເປັນແບບຢ່າງ ເພື່ອສືບຕໍ່ຈັັດຕັ້ງປະຕິບັດໃຫ້ບັນລຸຄາດໝາຍຕ່າງໆໃນຕໍ່ໜ້າ. ຈາກນັ້ນບັນດາຜູ່ແທນ ແລະ ແຂກເຂົ້າຮ່ວມ ຍັງຈະໄດ້ຮັບຟັງບົດລາຍງານແຜນພັດທະນາເສດຖະກິດ-ສັງຄົມຂອງເມືອງ ແຕ່ປີ 2015-2019 ແລະທິດທາງ ແຜນການ 2020-2024.

ກອງປະຊຸມຄັ້ງນີ້ ຈະດຳເນີນເປັນເວລາ 2 ວັນຈື່ງຈະສຳເລັດ ໃນນັ້ນຈະມີການປະກອບຄຳເຫັນໃນການຈັດຕັ້ງປະຕິບັດວຽກງານບາງຂົງເຂດວຽກງານ, ຮັບຟັງການຜ່ານບົດສຳຫຼວດການນຳພາລວມຂອງຄະນະບໍລິຫານງານພັກເມືອງ ຊຸດທີ IX ແລະ ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງ ຊຸດທີ X. ໂອກາດດຽວກັນນັ້ນກໍ່ຈະໄດ້ຮັບຟັງການໂອ້ລົມຈາກສະຫາຍເລຂາຄະນະບໍລິຫານງານພັກແຂວງສາລະວັນ ທີ່ຈະເປັນທິດຊີ້ນຳໃຫ້ແກ່ອົງຄະນະພັກເມືອງ ເພື່ອສືບຕໍ່ຊີ້ນຳ-ນຳພາ ການປະຕິບັດມະຕິກອງປະຊຸມໃນຕໍ່ໜ້າ.

ຂ່າວພາບ: ວິໄລວອນ ສິດທິໄຊ
Medialaos​ salavan