ໃນຕອນເຊົ້າຂອງວັນທີ 14 ຕຸລາ 2019 ທີ່ກະຊ. ວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດກອງປະຊຸມພົບປະແລກປ່ຽນບົດຮຽນດ້ານຂໍ້ມູນຂ່າວສານ ແລະ ການຄຸ້ມຄອງສື່ມວນຊົນໃນໄລຍະໃໝ່ ລະຫວ່າງ ສປປ ລາວ ແລະ ສສ ຫວຽາດນາມ ເຊິ່ງຕາງໜ້າຝ່າຍລາວໂດຍ ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ດັ້ງ ທັກ ເລີ້ຍ ຮອງຫົວໜ້າກົມສື່ສານມວນຊົນ, ກະຊວງຖະ ແຫຼງຂ່າວ ແລະ ການສື່ສານ ພ້ອມດ້ວຍຄະນະສື່ມວນຊົນ ຈາກ ສສ ຫວຽດນາມ ເຂົ້າຮ່ວມ.
ຈຸດປະສົງກໍ່ແມ່ນເພື່ອເປັນການແລກບົດຮຽນໃນຂົງເຂດວຽກງານສື່ມວນຊົນລະຫວ່າງສອງປະເທດ ເປັນຕົ້ນແມ່ນ ການຄຸ້ມຄອງສື່ມວນຊົນໃນຍຸກປະຈຸບັນ, ການຖອດຖອນບົດຮຽນວຽກງານສື່ມວນຊົນທ້ອງຖິ່ນ ແລະ ການນຳໃຊ້ເຕັກໂນໂລຊີສະໄໝໃໝ່ ເຂົ້າໃນການພັດທະນາວຽກງານສື່ມວນຊົນ, ການແກ້ໄຂບັນຫາຂ່າວປອມ ແລະ ຂ່າວໃສ່ຮ້າຍປ້າຍສີທີ່ບໍ່ເປັນຄວາມຈິງ ເພື່ອຍົກສູງຄວາມຮູ້ໃຫ້ກັບສື່ມວນຊົນ ແລະ ສັງຄົມໃນການບໍລິໂພກຂໍ່ມູນຂ່າວສານທີ່ຖືກຕ້ອງ ແລະ ຫຼຸດຜ່ອນບັນຫາຫຍໍ້ທໍ້ໃນຂະແໜງການສື່ມວນຊົນ.
ພາຍໃນກອງປະຊຸມຍັງໄດ້ ແລກປ່ຽນບົດຮຽນກ່ຽວກັບລະບຽບກົດໝາຍສື່ມວນຊົນ ແລະ ການປະຕິບັດລະ ບຽບວິໄນຕໍຜູ້ກະທຳຜິດ ພ້ອມດຽວກັນນັ້ນກໍ່ເປັນການຊຸກຍູ້ສົ່ງເສີມໃຫ້ມີການຜັນຂະຫຍາຍ ແນວທາງຂອງພັກ-ລັດ ໃຫ້ລົງສູ່ລວງເລິກ. ນອກຈາກນີ້ຍັງມີການວາງແຜນຮ່ວມມືກັນທາງດ້ານຂໍ້ມູນຂ່າວສານ ແລະ ວຽກງານສື່ມວນຊົນ ໃນອະນາຄົດ ໃຫ້ປາກົດຜົນເປັນຈິງ.