ກອງປະຊຸມໃຫຍ່ຜູ້ແທນຄະນະຊາວໜຸ່ມປະຊາຊົນປະຕິວັດລາວ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຄັ້ງທີ II ໄດ້ໄຂຂື້ນຢ່າງເປັນທາງການໃນວັນທີ 11 ຕຸລາ 2019 ນີ້, ທີ່ຫ້ອງປະຊຸມໃຫຍ່ ສຳນັກງານໃຫຍ່ບໍລິສັດລັດວິສາຫະກິດ ລາວໂທລະຄົມມະນາ ມະຫາຊົນ. ໂດຍການເປັນປະທານຮ່ວມຂອງ ສະຫາຍ ທັນສະໄໝ ກົມມະສິດ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງ ປທສ ແລະ ສະຫາຍ ອາລຸນໄຊ ສູນນະລາດ, ກຳມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະມາຊິກສະພາແຫ່ງຊາດຊຸດທີ VIII,  ພ້ອມດ້ວຍ ແຂກທີ່ຖືກເຊີນຈາກໜ່ວຍຊາວໜຸ່ມຮາກຖານອ້ອມຂ້າງກະຊວງ, ອົງການຈັດຕັ້ງແມ່ຍິງ, ກຳມະບານ, ແລະ ສະມາຊິກຊາວໜຸ່ມ ບັນດາຮາກຖານ ເຂົ້າຮ່ວມທັງໝົດ 320 ສະຫາຍ, ຜູ້ແທນກອງປະຊຸມ 300 ສະຫາຍ ແລະ ແຂກທີ່ຖືກເຊີນ 20 ສະຫາຍ.

      ກອງປະຊຸມໄດ້ຮັບຮອງເອົາບົດລາຍງານການເມືອງ ​ແລະ ທິດທາງ​ແຜນການແຕ່ນີ້ ຮອດປີ 2023 ແລະ ບົດສຳຫຼວດການນຳພາຂອງຄະນະບໍລິຫານງານຊາວໜຸ່ມ ປປລ ໃນໄລຍະທີ່ຜ່ານມາ ສະເໜີໂດຍ ສະຫາຍ ແກ້ວວິສຸກ ໂສລະພົມ ເລຂາຄະນະບໍລິຫານງານຊາວໜຸ່ມ ປປລ ກະຊວງ ປທສ ຊຶ່ງໄດ້ຕີລາຄາສູງເຖິງຜົນງານ ຂອງການຈັດຕັ້ງປະຕິບັດວຽກງານຊາວ ໜຸ່ມໃນໄລຍະຜ່ານມາ. ພ້ອມກັນນັ້ນ, ສະຫາຍໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ທີ່ຕ້ອງໄດ້ສືບຕໍ່ປັບປຸງແກ້ໄຂ ໃນຕໍ່ໜ້າ, ຊອກໃຫ້ເຫັນສາເຫດຕ່າງໆ ແລະ ສະຫຼຸບສັງລວມ ຖອດເປັນບົດຮຽນໃຫ້ແກ່ການນຳພາຂອງຄະນະບໍລິຫານງານຊາວໜຸ່ມ ປປລ. 

ໃນຕອນທ້າຍ ສະຫາຍ ທັນສະໄໝ ກົມມະສິດ ໄດ້ໃຫ້ກຽດໂອ້ລົມຕໍ່ກອງປະຊຸມ ຊຶ່ງກ່ອນອຶ່ນໝົດທ່ານໄດ້ຊົມເຊີຍຕໍ່ຜົນສຳເລັດທີ່ທາງຄະນະບໍລິຫານງານຊາວໜຸ່ມ ປປລ ກະຊວງ ປທສ ຍາດມາໄດ້ໃນໄລຍະທີ່ຜ່ານມາ ເຊິ່ງເປັນຜົນງານອັນໃຫ່ຍຫຼວງ ແລະ ເປັນພື້ນຖານອັນສຳຄັນໃຫ້ແກ່ການສຶບຕໍ່ກ້າວຂື້ນສູ່ຄວາມສີວິໄລ ແລະ ຫັນເປັນທັນສະໄໜ ໃນຂົງເຂດວຽກງານຂອງກະຊວງ ປທສ. ພ້ອມນີ້, ສະຫາຍໄດ້ເນັ້ນໜັກຕື່ມ ກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ທີ່ທາງກອງປະຊຸມໃຫ່ຍຜູ້ແທນຊາວລາວທົ່ວທັງປະເທດຄັ້ງທີ່ 7 ກຳນົດໄວ້, ເອົາໃຈໃສ່ຕັ້ງໜ້າຜັນຂະຫຍາຍເນື້ອໃນດັ່ງກ່າວໃຫ້ຕິດພັນກັບໜ້າທີ່ວິຊາສະເພາະຂອງຕົນ ແລະ ຕ້ອງເຮັດໃຫ້ເປັນລະບົບຢ່າງຕໍ່ເນື່ອງ ເພື່ອເຮັດໃຫ້ການຈັດຕັ້ງປະຕິບັດໄດ້ຮັບໜາກຜົນ ແລະ ປາກົດຜົນເປັນຈິງຫຼາຍທີ່ສຸດ ໃຫ້ສົມຄູ່ກັບຄຳຂັວນທີ່ວ່າ: ຊາວໜຸ່ມລາວແມ່ນແຂນຂວາຂອງພັກ. ​ນໍາເອົາ​ຂະ​ບວນການ 4 ບຸກ ​ເປັນ​ການ​ສົ່ງ​ເສີມສະຕິ​ປັນ​ຍາ, ຫົວຄິດ​ປະດິດ​ສ້າງ​ເປັນ​ເວທີ​ແຫ່ງ​ການສະ​ແດງ​ຄວາມ​ຮູ້​-ຄວາມ​ສາມາດ​ຂອງຄະນະຊາວໜຸ່ມ, ​ສະມາຊິກ​ຊາວ​ໝຸ່ມ ​ແລະ ​ເປັນ​ບ່ອນ​ເຕົ້າ​ໂຮມ​ຄວາມ​ສາມັກຄີ​, ແຂ່ງຂັນ​ກັນ​ສ້າງ​ຜົນງານ, ປະສານສົມທົບ​ທີ່​ດີ​ລະຫວ່າງ​ສະມາຊິກ​ຊາວໝຸ່ມກັບ​ອົງການ​ຈັດ​ຕັ້ງ​ຕ່າງໆ​ໃຫ້​ມີ​ຄວາມ​ຄ່ອງ​ຕົວ​ຍິ່ງ​ຂື້ນ ຄຽງຄູ່ກັບການ ​ເອົາ​ໃຈ​ໃສ່​ຄົ້ນຄວ້າ​ວຽກງານວິຊາສະເພາະຂອງຕົນ ເປັນຕົ້ນ ການປະຕິບັດໜ້າທີ່ເປັນເສນາທິການໃຫ້ຄະນະພັກ, ຄະນະນໍາຂອງກະຊວງ ປທສ ຕາມພາລະບົດບາດໜ້າທີ່ຂອງຕົນທີ່ໄດ້ຮັບການມອບໝາຍຢ່າງຕັ້ງໜ້າ.

ຂ່າວ: ຄະນະບໍລິຫານງານຊາວໜຸ່ມກະຊວງ ປທສ.