ໃນຕອນເຊົ້າ ວັນທີ 11 ກັນຍາ 2019 ຢູ່ທີ່ຂະແໜງປິ່ນປົວ-ຮັກສາສຸຂະພາບຕາ ແຂວງສະຫວັນນະເຂດ ໄດ້ຈັດພິທີສະເຫຼີມສະຫຼອງວັນສາຍຕາໂລກ ຄົບຮອບ 106 ປີ ໂດຍການເປັນປະທານຂອງ ທ່ານນາງ ບຸນເຍືອງ ທິດພຸດທະວົງ ປະທານກວດກາພັກລັດແຂວງ, ທ່ານ ດຣ ຈັນດອນ ມະນີພູໄສ ຮອງຫົວໜ້າ ສາທາລະນະສຸກແຂວງ ມີບັນດາ ທ່ານຫົວໜ້າ ຮອງຫົວໜ້າຂະແໜງປິ່ນປົວ-ຮັກສາສຸຂະພາບຕາ, ຕ່າງໜ້າພະແນກການອ້ອມຂ້າງແຂວງ ແລະ ພໍ່ແມ່ປະຊາຊົນທີ່ມາຮັບການບໍລິການຢູ່ຂະແໜງດັ່ງກ່າວເຂົ້າຮ່ວມ.

ທ່ານ ສູນທອນ ເຮືອງສະຫວັນ ຫົວໜ້າຂະແໜງ ປິ່ນປົວ-ຮັກສາສຸຂະພາບຕາ ກໍ່ໄດ້ລາຍງານການເຄື່ອນໄຫວວຽກງານໃນໄລຍະ 8 ເດືອນ ຕົ້ນປີ ແລະ ແຜນການ 4 ເດືອນ ທ້ານປີ 2019 ເຊິ່ງຂະແໜງປິ່ນປົວ-ຮັກສາຕາປະກອບມີ 5 ໜ່ວຍງານຄື ໜ່ວຍງານ ຫ້ອງການບໍລິຫານ, ໜ່ວຍງານປິ່ນປົວ, ໜ່ວຍງານການຢາ, ໜ່ວຍງານແວ່ນຕາ ແລະ ໜ່ວຍງານສົ່ງເສີມຟື້ນຟູ ພະນັກງານທັງໝົດ 24 ຄົນ, ໃນຜ່ານມາເຫັນຂະແໜງດັ່ງກ່າວໄດ້ຮັບການປະຕິບັດຕາມແນວທາງນະໂຍບາຍຂອງແຂວງກໍ່ຄືແຜນຍຸດທະສາດຂອງສາທາລະນະສຸກຫລືພະແນກສາທາລະນະສຸກແຂວງດ້ານການບໍລິການ, ການກວດພະຍາດ ແລະ ປິ່ນປົວພະຍາດໃຫ້ພໍ່ແມ່ປະຊາຊົນໄດ້ຮັບການບໍລິການດີຂຶ້ນ ແລະ ທົ່ວເຖິງ ການນຳຂອງຂະແໜງໄດ້ສຸ່ມໃສໃນການຊອກຄົ້ນຫາແຫຼ່ງທືນ ແລະ ອຸປະກອນທີ່ທັນສະໄໝ ແລະ ທຶນຮອນອັນຈຳເປັນເພື່ອເຮັດໃຫ້ການບໍລິການການກວດພະຍາດ ແລະ ປິ່ນປົວພະຍາດຕາໃຫ້ພໍ່ແມ່ປະຊາຊົນໄດ້ຮັບການບໍລິການດີຂຶ້ນເຊິ່ງມັນສະແດງອອກມີ ໂຄງການເຊັ່ນ ມູນນິທິສະມຸມໄພຄູ່ແຜນດີໄທຂອງຣາຊະອານາຈັກໄທ ເປັນຜູ້ຊ່ວຍເຫຼືອ ແລະ ອຸປະຖໍາ ມີໂຄງການຮັກສາສຸຂະພາບຕາແບບຢືນຢົງຂອງ ມູນນິທິ ເຟຮດໂຮໂລ ອົດສະຕາລີ ປະຈຳລາວ ເປັນຜູ້ສະໜັບສະໜູນທາງດ້ານການກໍ່ສ້າງບຸກຄະລາກອນແພດຕາ, ພະຍາບານ ໃນ 14 ໂຮງໝໍເມືອງ ນອກນັ້ນຍັງຊ່ວຍທຶນຮອນໃນການຊອກຄົ້ນຫາຄົນທີ່ເປັນພະຍາດຕາ ແລະ ສາຍຕາບົກຜ່ອງເພື່ອໃຫ້ເຂົ້າມາບໍລິການກວດ ແລະ ປິ່ນປົວຕາມສະຖານທີ່ບໍລິການ, ປິ່ນປົວຕາຢູ່ບ່ອນທີ່ມີເງື່ອນໄຂ ໃນນັ້ນຍັງໃຫ້ທຶນຜ່າຕັດແກ່ນຕາຂຸ້ນໃສ່ແກ່ນຕາທຽມໃຫ້ພໍ່ແມ່ປະຊາຊົນບ່ອນທີ່ຫ່າງໄກສອກຫຼີກຢູ່ 14 ເມືອງຂອງແຂວງສະຫວັນນະເຂດ. ສຳລັບວຽກງານຊຸກຍູ້ ອົບຮົມວິຊາການ ພະຍາບານຕາໃຫ້ແກ່ໂຮງໝໍເມືອງໃນ 14 ເມືອງ ແລະ ວິຊາການ ພະຍາບານຢູ່ສຸກສາລາໃນ 14 ເມືອງ ແລະ 142 ສຸກສາລາເຂົ້່າຮ່ວມ ພ້ອມກັນນັ້ນຍັງໄດ້ມອບອຸປະກອນ ແລະ ເອກະສານຄູ່ມືຈຳນວນໜຶ່ງເພື່ອໄປສຶກສາຄົ້ນຄວ້າໃນເວລາພົບບັນຫາໃນການປິ່ນປົວຄົນເຈັບທີ່ເຂົ້າມາບໍລິການຢູ່ໂຮງມໍເມືອງ ແລະ ສຸກສາລາ ວຽກງານປິ່ນປົວກວດເຂດນອກໄດ້ 4.230 ຄົນ, ຄົນເຈັບໃໝ່ 3.508 ຄົນ, ຄົນເຈັບເກົ່າ 722 ຄົນເຈັບນອນໂຮງໝໍ 320 ຄົນ, ຜ່າຕັດໃສ່ເລນທຽມ 279 ຄົນ, ຜ່າຕັດໃຫຍ່ 287 ຄົນ, ຜ່າຕັດຳກາງ 124 ຄົນ, ຜ່າຕັດນ້ອຍ 163 ຄົນ, ຜະລິດເລນແວ່ນຕາໄດ້ທັງໝົດ 668 ຂອບ.

ໃນໂອກາດດ່ຽວກັນ ທ່ານ ດຣ ຈັນດອນ ມະນີພູໄສ ກໍ່ກ່າວເປີດງານພ້ອມທັງໃຫ້ຮູ້ວ່າ ການສະເຫຼີມສະຫຼອງວັນສາຍຕາໂລກປີນີ້ ແມ່ນເພື່ອນຳສະເໜີຜົນງານການຈັດຕັ້ງປະຕິບັດໂຄງການ ແລະ ວິໄສທັດປີ 2020 ທັງເປັນການປຸກລະດົມໃຫ້ທຸກພາກສ່ວນໄດ້ເຂົ້າຮ່ວມໃນຂະບວນການປ້ອງກັນ ແລະ ປິ່ນປົວການເປັນຕາບອດ. ການເປັນຕາບອດສາມາດຫຼີກລ້ຽງໄດ້ 80% ໃນນັ້ນ 20% ແມ່ນການປ້ອງກັນຕາບອດແຕ່ຫົວທີ ແລະ 60% ແມ່ນໄດ້ຈາກການປິ່ນປົວການເປັນຕາບອດ ເຮັດໃຫ້ຄົນເຈັບສາມາດກັບມາເບິ່ງໄດ້ເປັນປົກກະຕິ ຈາກສະຖິຕິຂອງໂລກສາມາດໃຫ້ຮູ້ວ່າທຸກໆ 1 ວິນາທີໃດ ມີກໍລະນີທີ່ເປັນຕາບອດ 1 ຄົນ.
ຈາກນັ້ນ ທ່ານນາງ ບຸນເຍື້ອງ ທິດພຸດທະວົງ ກໍ່ໄດ້ມີຄຳເຫັນພ້ອມທັງໃຫ້ຮູ້ວ່າ ຕາເປັນອະໄວຍະວະສຳຄັນໃນການເບິ່ງເຫັນ ຍົກສູງຄວາມເຂົ້າໃຈໃນການ ຮັກສາ ແລະ ປ້ອງກັນບໍໃຫ້ຕາບອດ ອີກປະການໜຶ່ງການສະເຫຼີມສະຫຼອງວັນສາຍຕາໂລກເປັນການກະຕຸນສັນຍາຂອງແຕ່ລະປະເທດ ທີ່ໄດ້ຮັບຮອງເອົາໃນວາລະກອງປະຊຸມໃຫຍ່ ຂອງອົງການອານາໄມໂລກ ຄັ້ງທີ 56 ເພື່ອຮັບປະກັນໃນການຮັກສາສຸຂະພາບຕາ ມີການຂະຫຍາຍຕົວຢ່າງຕໍ່ເນື່ອງ ເອົາໃຈໃສ່ວຽກງານປ້ອງກັນ ແລະ ປິ່ນປົວຢ່າງທົ່ວເຖິງ ເພື່ອເປັນການຫຼຸດຜ່ອນການເປັນຕາບອດ ແລະ ມັນແມ່ນພັນທະໜຶ່ງທີ່ທຸກຄົນທົ່ວສັງທີ່ຈະຕ້ອງເອົາໃຈໃສໃນການຈັດຕັ້ງປະຕິບັດເພື່ອບັນລຸໃຫ້ທຸກຄົນມີສຸຂະພາບຕາທີ່ດີ.
ເຊິ່ງກິດຈະກຳໃນງານດັ່ງກ່າວປະຊາຊົນ ຫຼື ບຸກຄົນທົ່ວໄປແມ່ນຈະໄດ້ການກວດສຸຂະພາບຕາໂດຍບໍໄດ້ເສຍຄ່າຕະຫຼອດວັນ.

Medialaos