ວັນທີ 11 ຕຸລາ 2019 ວິທະຍາໄລເຕັກນິກວິຊາຊີບແຂວງຄຳມ່ວນ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 25 ປີ ໂດຍມີທ່ານ ວຽງສະຫວັນ ພັດທະວົງ ຜູ້ອຳນວຍການວິທະຍາໄລເຕັກນິກວິຊາຊີບ ແຂວງຄຳມ່ວນ, ມີບັນດາທ່ານໃນຄະນະອຳນວຍການ, ພະນັກງານຄູ-ອາຈານ ແລະ ແຂກຖືກເຊີນຈາກພະແນກການ, ຂະແໜງການອ້ອມຂ້າງ ຕະຫຼອດເຖິງນັກຮຽນ-ນັກສຶກສາເຂົ້າຮ່ວມ.

ທ່ານ ເກດສະໜາ ສານີໄຊ ຮອງອຳນວຍການວິທະຍາໄລເຕັກນິກວິຊາຊີບ ໄດ້ຜ່ານບົດສະຫຼຸບການຮຽນ-ການສອນ ປະຈຳສົກປີ 2018-2019 ພ້ອມທັງທິດທາງແຜນການໃນສົກປີ 2019-2020 ວ່າ: ວິທະຍາໄລເຕັກນິກວິຊາຊີບ ແຂວງຄຳມ່ວນ ມີພະນັກງານຄູ-ອາຈານທັງໝົດ 132 ທ່ານ. ໃນນີ້ມີລະດັບປະລິນຍາໂທ 12 ທ່ານ, ປະລິນຍາຕີ 56 ທ່ານ, ຊັ້ນສູງ 61 ທ່ານ ແລະ ຊັ້ນກາງ 3 ທ່ານ, ໄດ້ຈັດຕັ້ງການຮຽນ-ການສອນໃນ 7 ພາກ ແລະ 17 ສາຂາວິຊາຄື: ແປຮູບອາຫານ, ອາຫານ-ໂຮງແຮມ, ທ່ອງທ່ຽວ, ຕັດຫຍິບ, ໄຟຟ້າເຕັກນິກ, ໄຟຟ້າເຄື່ອງເຢັນ, ກໍ່ສ້າງ, ຊ່າງໄມ້, ສ້ອມແປງທົ່ວໄປ, ລົດຍົນ, ໄອທີ, ພະນັກງານຂາຍ, ບັນຊີ, ຄອມພິວເຕີທຸລະກິດ, ເລຂານຸການ, ປູກຝັງ ແລະ ລ້ຽງສັດ.

ນອກຈາກຈັດຕັ້ງປະຕິບັດແຜນການຮຽນ-ການສອນໃນພາກປົກກະຕິແລ້ວ ທາງວິທະຍາໄລຍັງໄດ້ປະຕິບັດໂຄງການສ້າງຄວາມເຂັ້ມແຂງໃຫ້ແກ່ວຽກງານອາຊີວະສຶກສາ ໂດຍການສະໜັບສະໜູນການຝຶກອົບຮົມໃຫ້ໄວໜຸ່ມຜູ້ດ້ອຍໂອກາດທີ່ຢູ່ໃນລະຫວ່າງອາຍຸ 15-35 ປີ ໄດ້ເຂົ້າມາຝຶກອົບຮົມໄລຍະສັ້ນ ໂດຍສະເພາະສາຂາວິຊາ: ຕັດຫຍິບ, ເສີມສວຍ, ອາຫານ-ໂຮງແຮມ, ສ້ອມແປງທົ່ວໄປ ແລະ ສາຂາໄຟຟ້າ, ໂດຍທາງວິທະຍາໄລໄດ້ກຳນົດເອົາ 8 ແຜນຍຸດທະສາດຄື: ກໍ່ສ້າງ, ປັບປຸງ ແລະ ຂະຫຍາຍຄວາມອາດສາມາດຂອງສະຖານອາຊີວະສຶກສາ ເພື່ອສົ່ງເສີມການ ເຂົ້າຮຽນຢ່າງທົ່ວເຖິງ, ສົ່ງເສີມສັງຄົມ ແລະ ພາກສ່ວນທຸລະກິດ ປະກອບສ່ວນໃນການພັດທະນາອາຊີວະສຶກສາ ເພື່ອປຸກລະດົມສັງຄົມ ແລະ ພາກສ່ວນທຸລະກິດປະກອບສ່ວນໃນການພັດທະນາອາຊີວະສຶກສາ, ປັບປຸງຮູບແບບ ອາຊີວະສຶກສາ ແລະ ຝຶກອົບຮົມວິຊາຊີບ ເພື່ອປັບປຸງຄຸນນະພາບ ແລະ ຄວາມສອດຄ່ອງກັບຄວາມຕ້ອງການ ຂອງຕະຫຼາດແຮງງານໃນດ້ານຕ່າງໆ, ກໍ່ສ້າງ, ບຳລຸງຄູ ແລະ ພັດທະນາບຸກຄະລາກອນສຳລັບການຝຶກອົບຮົມວິຊາຊີບ, ເພື່ອຍົກລະດັບການສຶກສາໃຫ້ຄູສອນ, ບຸກຄະລາກອນໃຫ້ໄດ້ທັງປະລິມານ ແລະ ຄຸນນະພາບ, ພັດທະນາ ລະບົບຂໍ້ມູນຂ່າວສານ ເພື່ອສ້າງລະບົບຂໍ້ມູນທີ່ດີ ສຳລັບການຕັດສິນໃຈ ແລະ ການວາງແຜນ,

ປັບປຸງກົງຈັກການຄຸ້ມຄອງ ເພື່ອສ້າງຄວາມເຂັ້ມແຂງໃຫ້ແກ່ການບໍລິຫານ-ຄຸ້ມຄອງວຽກງານອາຊີວະສຶກສາ ເພື່ອສ້າງຄວາມແຂງແຮງໃຫ້ແກ່ການ ບໍລິຫານ-ຄຸ້ມຄອງວຽກງານ, ສ້າງນະໂຍບາຍ ແລະ ເຄື່ອງມືຄຸ້ມຄອງອາຊີວະສຶກສາ ເພື່ອປັບປຸງເຄື່ອງມືໃນການບໍລິຫານ ຄຸ້ມຄອງໃຫ້ມີຄຸນນະພາບ. ສຳລັບສົກປີ 2018-2019 ຜ່ານມາວິທະຍາໄລສາມາດສ້າງນັກສຶກສາຈົບໃນສາຂາວິຊາ ຕ່າງໆຈຳນວນ 2.914 ຄົນ ເຊິ່ງເປັນການສ້າງບຸກຄະລາກອນ ເພື່ອຕອບສະໜອງເຂົ້າໃນບັນດາສຳນັກງານ, ອົງການ, ບໍລິສັດ ແລະ ຫົວໜ່ວຍທຸລະກິດຕ່າງໆ. ໃນໂອກາດດັ່ງກ່າວຍັງໄດ້ມອບໃບຍ້ອງຍໍໃຫ້ແກ່ຜູ້ທີ່ມີຜົນງານການສິດ ສອນດີເດັ່ນໃຫ້ແກ່ພະນັກງານຄູ-ອາຈານ ເຊິ່ງປະກອບມີ: ໃບຍ້ອງຍໍຂັ້ນກະຊວງສຶກສາທິການ ແລະ ກິລາ ຈຳນວນ 43 ທ່ານ ແລະ ຍ້ອງຍໍຂັ້ນເຈົ້າແຂວງໆຄຳມ່ວນ ຈຳນວນ 65 ທ່ານ ພ້ອມທັງ ເປີດຂະບວນແຂ່ງຂັນຍ້ອງຍໍ ພາຍໃຕ້ຄຳຂວັນ “ຮັກຊາດ ແລະ ພັດທະນາ” ໂດຍມີບັນດາຄູ-ອາຈານຈາກຂະແໜງການ ແລະ ຕາງໜ້ານັກສຶກສາແຕ່ລະພາກວິຊາ ຂຶ້ນຈັບມືເພື່ອຢັ້ງຢືນເຖິງການເປີດຂະບວນການ ແລະ ເປັນບ່ອນອີງໃນການຈັດຕັ້ງປະຕິບັດຂໍ້ແຂ່ງຂັນໃຫ້ໄດ້ຮັບຜົນ ສຳເລັດຕາມຄາດໝາຍ.

Medialaos