ເຊກອງປິດຊຸດອົບຮົມກົດໝາຍ 45 ວັນ ຮຸ່ນທີ VIII

0
190

ວັນທີ 10 ຕຸລາ 2019 ທີ່ພະແນກຍຸຕິທໍາແຂວງເຊກອງໄດ້ຈັດພິທີປິດຊຸດອົບຮົມກົດໝາຍ 45 ວັນຮຸ່ນທີ VIII ຂຶ້ນ ໂດຍມີທ່ານ ພອນເພັດ ຄິວລະວົງ ປະທານສະພາປະຊາຊົນແຂວງ, ທ່ານ ຄໍາພຽມ ບົວລະພາ ຮອງເລຂາພັກແຂວງ; ພ້ອມນີ້ ກໍມີຄະນະພັກ-ຄະນະພະແນກ, ຄະນະຊີ້ນໍາ, ບັນດາແຂກຖືກເຊີນ, ນັກວິທະຍາກອນ ແລະນັກສໍາມະນາກອນເຂົ້າຮ່ວມ.

ໃນພິທີດັ່ງກ່າວ, ທ່ານ ຄໍາບາງ ພະສະຫວງ ໃຫ້ຮູ້ວ່າ: ຊຸດອົບຮົມກົດໝາຍ 45 ວັນຮຸ່ນທີ VIII ໄດ້ດໍາເນີນມາແຕ່ວັນທີ 31 ກໍລະກົດ 2019 ຫາວັນທີ 2 ຕຸລາ 2019 ໂດຍມີຜູ້ເຂົ້າຮ່ວມຝຶກອົບຮົມທັງໝົດ 43 ຄົນ, ຍິງ 8 ຄົນ ໃນນີ້ມາຈາກຂະແໜງການອ້ອມຂ້າງແຂວງເຊິ່ງປະກອບມີບັນດາພະແນກການ, ທະນາຄານ, ລັດວິສາຫະກິດ ແລະສອງກໍາລັງປະກອບອາວຸດຈໍານວນ 23 ຄົນ, ຍິງ 5 ຄົນ ແລະຈາກອົງການຈັດຕັ້ງຂັ້ນຕ່າງໆຂອງ 4 ເມືອງ 20 ຄົນ,ຍິງ 3 ຄົນ ໂດຍຜ່ານການຮຽນການສິດສອນນັກສໍາມະນາກອນໄດ້ສຸມໃສ່ຮຽນຮູ້ຕາມຫຼັກສູດຝຶກອົບຮົມ ໂດຍມີ 32 ວິຊາ 22,5 ໜ່ວຍກິດເທົ່າກັບ 360 ຊົ່ວໂມງ.

ການຝຶກອົບຮົມດັ່ງກ່າວ ແມ່ນມີຄວາມໝາຍສໍາຄັນ ແລະຈໍາເປັນພາວະວິໃສ, ເພື່ອແນ່ໃສ່ເພີ່ມທະວີຍົກລະດັບຄວາມຮູ້ ແລະຄວາມສາມາດທາງດ້ານກົດໝາຍໃຫ້ແກ່ພະນັກງານນໍາພາຫຼັກແຫຼ່ງຂອງແຂວງໃຫ້ສູງຂຶ້ນ, ແນໃສ່ເພື່ອໃຫ້ເຊື່ອມຊຶມເຂົ້າໃຈ, ກໍາແໜ້ນແນວທາງນະໂຍບາຍ ແລະການນໍາພາຂອງພັກ, ການຄຸ້ມຄອງດ້ວຍລັດຖະທໍາມະນູນ ແລະກົດໝາຍຂອງລັດໃຫ້ສອດຄ່ອງກັບສະພາບຕົວຈິງໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍລະບຽບກົດໝາຍໃນປະຈຸບັນ, ໂດຍສະເພາະຊຸດນີ້ ເປັນຊຸດທີ VIII ເພື່ອໃຫ້ນັກສໍາມະນາກອນໄດ້ຮູ້ ແລະນໍາໄປໝູນໃຊ້ໃຫ້ຖືກຕ້ອງສອດຄ່ອງກັບຕົວຈິງ.

ຂ່າວ : ບູ້ສຸວັນ
Medialaos