ພາຍຫຼັງໄດ້ດໍາເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກເມືອງຕຸ້ມລານ ແຂວງສາລະວັນ ເປັນເວລາ 2 ວັນ 10-11 ຕຸລາ 2019 ທີ່ຫ້ອງປະຊຸມສະໂມສອນເມືອງ ດ້ວຍບັນຍາການທີ່ມີຄວາມໝາຍຄວາມສຳຄັນ ແລະ ກໍ່ໄດ້ສໍາເລັດລົງຢ່າງຈົບງາມ ພາຍໃຕ້ການເປັນປະທານຂອງ ສະຫາຍ ຈັນສະໝອນ ພົມມະແສງ ກໍາມະການພັກແຂວງ ເລຂາພັກເມືອງ ເຈົ້າເມືອງໆຕຸ້ມລານ, ເປັນກຽດເຂົ້າຮ່ວມຂອງ ສະຫາຍ ສີສຸວັນ ວົງຈອມສີ ກໍາມະການສູນກາງພັກ ເລຂາພັກແຂວງ ເຈົ້າແຂວງສາລະວັນ, ສະຫາຍ ບຸນທຽມ ແກ້ວໄຊຍະວົງ ຫົວໜ້າຄະນະຈັດຕັ້ງແຂວງ, ມີບັນດາແຂກຖືກເຊີນຈາກບັນດາເມືອງພາຍໃນ ແລະ ຕ່າງແຂວງ, ຜູ້ແທນສົມບູນ ຈໍານວນ 121 ສະຫາຍ ເຊິ່ງເປັນຕົວແທນໃຫ້ສະມາຊິກພັກ,ພະນັກງານ, ທະຫານ, ຕໍາຫຼວດຕະຫຼອດຮອດປະຊາຊົນບັນດາເຜົ່າ, ຊັ້ນຄົນຕ່າງໆ ທົ່ວເມືອງ ເຂົ້າຮ່ວມ.

ບົນພື້ນຖານຜົນສຳເລັດຫຼາຍດ້ານໃນການປະຕິບັດມະຕິກອງປະຊຸມໃຫຍ່ ຄັ້ງທີ 9 ຂອງອົງຄະນະພັກເມືອງ ຕາມເງື່ອນໄຂທ່າແຮງບົ່ມຊ້ອນ ແລະ ສະພາບຄວາມເປັນຈິງຂອງເມືອງ ແລະ ຕີລາຄາບັນຫາດ້ານດີ, ດ້ານອ່ອນ, ຂໍ້ຄົງຄ້າງ ແລະ ການຖອດຖອນບົດຮຽນຈາກການປະຕິບັດຕົວຈິງໃນ 5 ປີຜ່ານມາ ແລະ ໄດ້ວາງທິດທາງໜ້າທີ່ລວມ, ຄາດໝາຍສູ້ຊົນ ແຜນພັດທະນາເສດຖະກິດສັງຄົມ ໄລຍະ 5 ປີຕໍ່ໜ້າ (2020-2024) ເພື່ອສ້າງເງື່ອນໄຂເຮັດໃຫ້ເມືອງຕຸ້ມລານ ກ້າວໄປສູ່ຄວາມເຂັ້ມແຂງຮອບດ້ານເທື່ອລະກ້າວ. ພ້ອມດຽວກັນຍັງໄດ້ຮັບຟັງບົດປະກອບຄຳເຫັນອົງການຈັດຕັ້ງຕົວແບບ ແລະ ຄອບຄົວຕົວແບບດ້ານຕ່າງໆ ແລະ ຮ່າງບົດສໍາຫຼວດການນໍາພາ ຂອງຄະນະບໍລິຫານງານພັກເມືອງ ຊຸດເກົ່າ, ພ້ອມທັງກ່າວລາໜ້າທີ່.

ກອງປະຊຸມໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງ ຊຸດໃໝ່ ເຊິ່ງມີຈໍານວນຜູ້ສະໝັກທັງໝົດ 27 ສະຫາຍ, ຍິງ 4 ສະຫາຍ, ເລືອກເອົາ 23 ສະຫາຍ. ຜ່ານການປ່ອນບັດຄັດເລືອກ ແລະ ຕາມການຕົກລົງໃນກອງປະຊຸມຄັ້ງປະຖົມມະລຶກ ໄດ້ຄັດເລືອກເອົາຄະນະປະຈຳພັກເມືອງ 7 ສະຫາຍ, ໃນນັ້ນໄດ້ເປັນເອກະພາບເລືອກເອົາ ສະຫາຍ ທອງໃສ ເພັດລາສີ ເປັນເລຂາພັກເມືອງ, ສະຫາຍ ບົວແກ້ວ ວົງຄຳຈັນ ເປັນຮອງເລຂາ ທັງເປັນປະທານກວດກາ ແລະ ສະຫາຍ ສົມຄິດ ກອງໄຊສະຫວັດ ເປັນຮອງເລຂາ. ພ້ອມນັ້ນກໍ່ໄດ້ປ່ອນບັດຄັດເລືອກເອົາຜູ້ແທນສົມບູນໄປຮ່ວມກອງປະຊຸມໃຫຍ່ອົງຄະນະພັກແຂວງ ຄັ້ງທີ IX ຈຳນວນ 18 ສະຫາຍ ແລະ ສຳຮອງ 4 ສະຫາຍ. ພິເສດກອງປະຊຸມຈະໄດ້ຮັບຟັງການໂອ້ລົມຂອງ ສະຫາຍ ສີສຸວັນ ວົງຈອມສີ ກໍາມະການສູນກາງພັກ ເລຂາພັກແຂວງ ເຈົ້າແຂວງໆສາລະວັນ ເພື່ອເປັນເຂັມຊີ້ທິດເຍືອງທາງທີ່ສໍາຄັນໃຫ້ແກ່ການຈັດຕັ້ງປະຕິບັດມະຕິກອງປະຊຸມໃຫ້ໄດ້ຮັບຜົນສໍາເລັດອັນຈົບງາມ.

ຂ່າວ-ພາບ: ວິໄລວອນ ສິດທິໄຊ
Medialaos