ໃນວັນທີິ 8-10 ຕຸລາ 2019 ທີ່ຜ່ານມາ, ສະຫະພັນກໍາມະບານແຂວງສະຫວັນນະເຂດ ນຳໂດຍທ່ານ ນາງ ພົມມາ ທອງເພັງ ຮອງປະທານຄະນະບໍລິຫານງານສະຫະພັນກຳມະບານແຂວງ ພ້ອມດ້ວຍຜູ້ຮັບຜິດຊອບ ວຽກງານໂຄສະນາ-ສື່ມວນຊົນ, ວຽກງານປົກປ້ອງແຮງງານ, ວຽກງານກອງທຶນ, ວຽກງານຂະບວນການແຂ່ງຂັນ ແລະ ຍ້ອງຍໍ ໄດ້ມີການລົງເຄື່ອນໄຫວ ເພື່ອຊຸກຍູ້ວຽກງານກຳມະບານຮອບດ້ານຢູ່ເມືອງອາດສະພັງທອງ, ເມືອງພະລານໄຊ ແລະ ເມືອງພີນ ໂດຍມີປະທານ, ຮອງປະທານ ຕະຫຼອດຮອດວິຊາການຂອງເມືອງດັ່ງກ່າວເຂົ້າຮ່ວມຈຳນວນ 20 ທ່ານ, ຍິງ 8 ທ່ານ.

ໃນພິທີ ທ່ານ ນາງ ພົມມາ ທອງເພັງ ຍັງໄດ້ໃຫ້ກຽດໂອ້ລົມ ແລະ ເນັ້ນໜັກໃຫ້ບັນດາເມືອງຕ້ອງໄດ້ເອົາໃຈໃສ່ ໃນການສຶກສາອົບຮົມທາງດ້ານການເມືອງແນວຄິດ ໃຫ້ແກ່ຖັນແຖວສະມາຊິກກຳມະບານທີ່ຢູ່ໃນຄວາມຮັບຜິດຊອບຂັ້ນຂອງຕົນ ໃຫ້ມີຄວາມເຊື່ອໝັ້ນຕໍ່ການນຳພາຂອງພັກ, ລະບຽບກົດໝາຍຂອງລັດໃຫ້ເປັນປົກກະຕິ, ເປັນເຈົ້າຕົນເອງເຂົ້າໃນການປັບປຸງການຈັດຕັ້ງໃຫ້ມີຄວາມເຂັ້ມແຂງ, ມີຄວາມເປັນເອກະພາບພາຍໃນ ສອດຄ່ອງກັບໜ້າທີ່ວຽກງານທີ່ຕົນຮັບຜິດຊອບ, ຍົກສູງທາງດ້ານລະດັບວິຊາສະເພາະຂອງຕົນໃຫ້ມີຄຸນນະພາບ ເພື່ອປະກອບສ່ວນທາງດ້ານຫົວຄິດປະດິດສ້າງເຂົ້າໃນການປະຕິບັດໜ້າທີ່ວຽກງານກຳມະບານ ທີ່ຂັ້ນເທິງມອບໝາຍໃຫ້ຢ່າງຮອບດ້ານ ແລະ ທົ່ວເຖິງ, ພ້ອມນີ້ຜູ້ຮັບຜິດຊອບ ວຽກງານໂຄສະນາ-ສື່ມວນຊົນ, ວຽກງານປົກປ້ອງແຮງງານ, ວຽກງານກອງທຶນ, ວຽກງານຂະບວນການແຂ່ງຂັນ ແລະ ຍ້ອງຍໍ ຍັງໄດ້ມີການສຶບຕໍ່ແນະນຳວຽກງານວິຊາສະເພາະຂອງຕົນ ໃຫ້ແກ່ວິຊາການຂັ້ນເມືອງ ເພື່ອສ້າງຄວາມເຂັ້ມແຂງໃຫ້ແກ່ເມືອງດັ່ງກ່າວຕື່ມອີກດ້ວຍ.

ຂ່າວ – ພາບ : ວັນນະເລດ ມະນີວົງ
Medialaos