ໃນວັນທີ 13 ຕຸລາ ທີ່ຜ່ານມາ, ຊຶ່ງກົງກັບມື້ເພັງ 15 ຄ່ຳ ເດືອນ 11 ແລະ ເປັນວັນບຸນອອກພັນສາ ປະວໍລະນາ ຕາມຮີດ 12 ຄອງ 14 ຂອງຊາວພຸດລາວເຮົາທີ່ເຄີຍປະຕິບັດມາ ແລະ ຢູ່ຕາມວັດວາອາຣາມຕ່າງໆທົ່ວປະເທດ ພວກເຮົາຈະເຫັນອອກຕົນຍາດໂຍມຊາວພຸດທັງຫຼາຍ ມາຮ່ວມກັນໃສ່ບາດ, ຖວາຍສັງຄະທານ ແກ່ພຣະສົງຕາມປະເພນີ. ໂດຍສະເພາະຢູ່ທີ່ວັດສີຈອມແຈ້ງໂພທິຍາລາມບ້ານທົ່ງ ເມືອງອຸທຸມພອນ ກໍ່ໄດ້ມີພິທີໃສ່ບາດ, ຖວາຍສັງຄະທານ ເຊັ້ນດຽວກັນ ໂດຍການໃຫ້ຄວາມເມດຕາກະລຸນາເຂົ້າຮ່ວມຂອງຍາທ່ານ ກ້ອນ ໂພທິລາດ ປະທານອົງການພຸດທະສາສະໜາສຳພັນລາວເມືອງອຸທຸມພອນ. ເປັນກຽດເຂົ້າຮ່ວມໃນພິທີໃສ່ບາດຄັ້ງນີ້ ນຳໂດຍທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ, ບັນດາທ່ານ ການນຳພັກ-ລັດເມືອງ, ພະນັກງານການນຳອາວຸໂສບຳນານ, ເຖົ້າແກ່ແນວໂຮມ, ອົງການຈັດຕັ້ງມະຫາຊົນ ແລະ ພຸດທະສາສະນິກະຊົນ ເຂດກຸ່ມບ້ານທົ່ງ-ບ້ານນາ ເຂົ້າຮ່ວມຢ່າງຫຼວງຫຼາຍ.

ຄຳວ່າ ອອກພັນສາ ນັ້ນໄດ້ແກ່ ການອະນຸຍາດ ໃຫ້ພະພິກຂຸສົງ ອອກຈາກເຂດຈຳກັດ ຫຼັງຈາກການ ເຂົ້າຈຳພັນສາຄົບ 3 ເດືອນ ເພື່ອອອກໄປ ປະຕິບັດໜ້າທີ່ ຢູ່ບ່ອນອ່ື່ນໄດ້ ເອີ້ນອີກຢ່າງໜຶ່ງວ່າ ການອອກຈາກ ລະດູຝົນ. ເມ່ືອເຖິງມື້ຂຶ້ນ 14 ຄ່ຳ ຂອງເດືອນ 11 ຊາວພຸດທັງຫລາຍ ພາກັນຈັດຫາ ວັດຖຸທານຕ່າງໆ ມາໄວ້ຖວາຍທານ ຕາມກຳລັງສັດທາ ຂອງຕົນ. ເມ່ືອເຖິງມື້ເພັງ 15 ຄ່ຳ ເດືອນ 11 ຕອນເຊົ້່າມວນຊົນ ຊາວພຸດກໍມາ ເຕົ້າໂຮມກັນ ຖວາຍຂອງທານ ທີ່ໄດ້ກະກຽມໄວ້ ດ້ວຍການໃສ່ບາດຢູ່ ໃນວັດພ້ອມ ທັງຖວາຍ ວັດຖຸທານຕ່າງໆ ໃຫ້ແກ່ພະພິກຂຸສົງ.

ຂ່າວ ພອນປະເສີດ ແຜນພັກດີ
Medialaos