ທ້າຍເດືອນ ກັນຍາ 2019 ທີ່ຜ່ານມາ, ສະຫະພັນກຳມະບານແຂວງສະຫວັນນະເຂດ ຮ່ວມກັບ ອົງການຈີລາບ ( JILAF ) ໄດ້ມີການຈັດກອງປະຊຸມ ສຳມະນາຄະນະຮັບຜິດຊອບສາມຝ່າຍຂັ້ນແຂວງ ໃນໂຄງການ SGRA ເພື່ອປັບປຸງ-ຍົກລະດັບຄວາມເປັນຢູ່ຂອງແຮງງານນອກລະບົບ ຂຶ້ນຢ່າງເປັນທາງການທີ່ຫ້ອງປະຊຸມຂອງຕົນ,

ໂດຍການເຂົ້າຮ່ວມຂອງທ່ານ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ, ມີ ທ່ານ ນາງ ຢູກິ ອອັດສະຈິ ຜູ້ຕາງໜ້າອົງການຈີລາບ ປະຈຳປະເທດໄທ, ມີຕາງໜ້າຈາກສູນກາງສະຫະພັນກຳມະບານລາວ, ອົງການ 3 ຝ່າຍ ຂອງແຂວງສະຫວັນນະເຂດ, ແຂວງຄຳມວນ, ແລະ ກຸ່ມປູກຜັກປອດສານພິດ ນະຄອນໄກສອນພົມວິຫານ ແລະ ກຸ່ມປູກອ້ອຍເມືອງໄຊບູລີ ເຂົ້າຮ່ວມຈຳນວນ 19 ທ່ານ, ຍິງ 7 ທ່ານ. ໃນພິທີ ທ່ານ ວຽງໄຊ ສີສຸດຕາ ຫົວໜ້າຂະແໜງປົກປ້ອງແຮງງານ ຂອງສະຫະພັນກຳມະບານແຂວງ ຍັງໄດ້ຍົກໃຫ້ເຫັນສະພາບການເຄື່ອນໄຫວ ຂອງວຽກງານ 3 ຝ່າຍຂັ້ນແຂວງ ຕໍ່ກັບໂຄງການ SGRA ເພື່ອປັບປຸງ-ຍົກລະດັບຄວາມເປັນຢູ່ຂອງແຮງງານນອກລະບົບ

ໃນໄລຍະຜ່ານມາໂດຍສັງເຂບ ຊຶ່ງມີທັງຜົນໄດ້ຮັບຂອງການຈັດຕັ້ງປະຕິບັດໂຄງການ ແລະ ສິ່ງທ້າທາຍຫຼາຍດ້ານ ທີ່ຄະນະຮັບຜິດຊອບສາມຝ່າຍຈະຕ້ອງໄດ້ສຸມທຸກສະຕິປັນຍາ ຮ່ວມກັບ ອົງການຈີລາບ ສືບຕໍ່ຫາທາງແກ້ໄຂ ແລະ ເສີມຂະຫຍາຍໃຫ້ມີທ່າອ່ຽງທີ່ດີຂຶ້ນ ເພື່ອແນໃສ່ປົກປ້ອງສິດຜົນປະໂຫຍດຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານບັນດາເຜົ່າເວົ້າລວມ, ເວົ້າສະເພາະກໍ່ຄື ກຸ່ມເປົ້າໝາຍແຮງງານນອກລະບົບປູກຜັກປອດສານພິດນະຄອນໄກສອນພົມວິຫານ ແລະ ກຸ່ມປູກອ້ອຍ ເມືອງໄຊບູລີ ໃຫ້ໄດ້ຮັບສິດຜົນປະໂຫຍດ ແລະ ການຜະລິດທີ່ດີຂຶ້ນເປັນກ້າວໆໃນອານາຄົດ.

ສະຫະພັນກຳມະບານແຂວງສະຫວັນນະເຂດ
ຂ່າວ – ພາບ:ວັນນະເລດ ມະນີວົງ.
Medialaos