ໃນວັນທີ 11 ຕຸລາ 2019 ນີ້; ຢູ່ທີ່ສະໂມສອຍຂອງເມືອງ ອາດສະພັງທອງ ກອງບັນຊາການປ້ອງກັນຄວາມສະຫງົບສຸກເມືອງ ອາດສະພັງທອງ ໄດ້ຈັດພິທີສະຫຼຸບການເຄື່ອນໄຫວວຽກງານໃນໄລຍະ 6 ເດືອນຜ່ານມາ ແລະ ວາງທິດທາງແຜນການໃນ 6 ເດືອນຕໍ່ໜ້າຢ່າງເປັນທາງການ. ໂດຍພາຍໃຕ້ການເຂົ້າຮ່ວມໃນພິທີຂອງທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ທັງເປັນປະທານປ້ອງກັນຊາດ – ປ້ອງກັນຄວາມສະຫງົບ ຂັ້ນເມືອງ, ມີທ່ານ ພັທ ຄໍາສະໝອງດີ ແກ້ວມະນີວົງ ຫົວໜ້າກອງບັນຊາການປ້ອງກັນຄວາມສະຫງົບສຸກເມືອງພ້ອມດ້ວຍຄະນະ, ຕະຫຼອດນາຍ ແລະ ພົນຕໍາຫຼວດໃນກອງບັນຊາການ ແລະ ປ້ອງກັນຄວາມສະຫງົບສຸກໃນ 5 ກຸ່ມບ້ານກໍ່ໄດ້ເຂົ້າຮ່ວມ.

ໃນພິທີທ່ານ ພັທ ພິມມະສອນ ຂັດຕິຍະລາດ ຮອງຫົວໜ້າກອງບັນຊາການປ້ອງກັນຄວາມສະຫງົບສຸກເມືອງ ອາດສະພັງທອງ ກໍ່ໄດ້ຂຶ້ນລາຍງານບົດລາຍງານການເຄື່ອນໄຫວວຽກງານໃນໄລຍະ 6 ເດືອນຜ່ານມາ ແລະ ທິດທາງແຜນການໃນ 6 ເດືອນຕໍ່ໜ້າໃນນັ້ນ;ໄດ້ມີຫຼາຍຜົນງານທີ່ໂດດເດັ່ນເປັນຕົ້ນກໍ່ແມ່ນວຽກງານຄຸ້ມຄອງສໍາມະໂນຄົວ – ກໍ່ສ້າງຮາກຖານເຊິ່ງສະແດງອອກແມ່ນໄດ້ລົງເກັບກໍາສະຖິຕິຈໍານວນບ້ານຈໍານວນຫຼັງຄາເຮືອນ ແລະ ຈໍານວນພົນລະເມືອງໃນທົ່ວເມືອງມີທັງໝົດ 40 ບ້ານ, ມີ 7.510 ຫຼັງຄາເຮືອນ ແລະ ມີພົນລະເມືອງທັງໝົດ 51.295 ຄົນ, ຍິງ 25.552 ຄົນ, ລົງປະເມີນບ້ານປ້ອງກັນຄວາມສະຫງົບດີໄດ້ 1 ບ້ານຄືບ້ານດົງໝາກກໍ່, ໄດ້ລົງປະກາດກອງຮ້ອຍ ໝວດ ໝູ່ ມີຈໍານວນ 2 ກຸ່ມບ້ານຄືກຸ່ມບ້ານທີ 8 ດົງເຫັນ ແລະ ກຸ່ມບ້ານທີ 7 ນາແຜກ ມີຈໍານວນ 2 ກອງຮ້ອຍ, ມີ 6 ໝວດ, ມີ 18 ໝູ່, ເຊິ່ງມີ ປກສ ກຸ່ມບ້ານທັງໝົດ 124 ສະຫາຍ, ເປີດຝຶກອົບຮົມໃຫ້ແກ່ ປກສ ບ້ານຈໍານວນ 1 ກຸ່ມບ້ານຄືກຸ່ມບ້ານໂພນຜາງມີ ປກສ ກຸ່ມບ້ານເຂົ້າຮ່ວມທັງໝົດ 51 ສະຫາຍ, ປະກາດບ້ານຮັບ ປກສ ບ້ານໃໝ່ໃນຈໍານວນ 2 ກຸ່ມຄືກຸ່ມບ້ານທີ 2 ນາໄລ່ດົງ ແລະ ກຸ່ມບ້ານທີ 7 ນາແຜກມີຈໍານວນ ປກສ ບ້ານທັງໝົດ 27 ສະຫາຍ, ດັດແກ້ປຶ້ມສໍາມະໂນຄົວຄືນໃໝ່ມີ 102 ຫົວ ແລະ ໄດ້ສະເໜີຊື່ເຂົ້າປຶ້ມສໍາມະໂນຄົວຈໍານວນ 72 ຄົນ, ຍິງ 25 ຄົນ.

ພ້ອມດຽວກັນນີ້; ໃນພິທີກໍ່ໄດ້ມີການປະກາດເລື່ອນຊັ້ນ ແລະ ປະດັບຊັ້ນໃຫ້ແກ່ນາຍ ແລະ ພົນຕໍາຫຼວດຜູ້ທີ່ມີຜົນງານທີ່ດີເດັ່ນ ແລະ ຮອດເວລາເລື່ອນ. ໃນນັ້ນ; ເລື່ອນຊັ້ນ ຮ້ອຍຕີ ຂຶ້ນຊັ້ນ ຮ້ອຍໂທ ຈໍານວນ 03 ສະຫາຍ, ເລື່ອນຊັ້ນ ວາທີ ຂຶ້ນຊັ້ນ ຮ້ອຍຕີ ຈໍານວນ 04 ສະຫາຍ ແລະ ໄດ້ປະກາດເລື່ອນຊັ້ນ ສິບເອກ ຂຶ້ນຊັ້ນ ວາທີ ຈໍານວນ 01 ສະຫາຍ, ຍິງ 01 ສະຫາຍ. ໃຫ້ກຽດປະດັບຊັ້ນໃຫ້ແກ່ນາຍ ແລະ ພົນຕໍາຫຼວດໃນຄັ້ງນີ້; ໂດຍທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ໃຫ້ກຽດປະດັບຢ່າງສົມກຽດ ໂດຍ ເປັນສັກຂີພິຍານຂອງບັນດານາຍ ແລະ ພົນຕໍາຫຼວດທີ່ເຂົ້າຮ່ວມນໍາດ້ວຍ.
ໃນຕອນທ້າຍຂອງພິທີ ທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ກໍ່ໃຫ້ກຽດໂອ້ລົມເຊິ່ງທ່ານໄດ້ຮຽກຮ້ອງໃຫ້ບັນດານາຍ ແລະ ພົນຕໍາຫຼວດຈົ່ງເອົາໃຈໃສ່ໃນການປະຕິບັດໃນໜ້າທີ່ວຽກວານຂອງຕົນໄດ້ຮັບຜິດຊອບຢ່າງເຕັ່ມສວນ, ເພື່ອປົກຮັກສາຄວາມສະຫງົບສຸກໃນສັງຄົມໃຫ້ມີຄວາມສະຫງົບສຸກ ຮັບໃຊ້ປະຊາຊົນຕາມແນວທາງຂອງຂັ້ນເທິງວາງອອກໃຫ້ປະກົດຜົນເປັນຈິງ.

ພາບຂ່າວ: ສາຍສະໝຸດ ສິມພະລີວົງ
Medialaos