ເພື່ອເປັນການຮັກສາຂະນົບທຳນຽນຮີດຄອງປະເພນີອັນດີງາມທີ່ເຄີຍສືບທອດກັນມາແຕ່ດຶກດຳບັນໃຫ້ຢືນຍົງຕະຫຼອດໄປດັ່ງນັ້ນ ວັນໃນຕອນເຊົ້າຂອງວັນທີ 14 ຕຸລາ 2019 ຢູ່ທີ່ສວນສຸຂະພາບ ໝູຮັກພູມສະຫວັນ ນະຄອນໄກສອນພົມວິຫານ ແຂວງສະຫວັນນະເຂດ ໄດ້ມີພິທີເປີດງານປະເພນີ ອອກພັນສາ ແລະ ຊ່ວງເຮືອປະຈຳປີ 2019 ໂດຍການເຂົ້າຮ່ວມຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ປອ ແສງທອງ ວັງແກ້ວມະນີ ເຈົ້ານະຄອນໄກສອນພົມວິຫານ ມີບັນດາທ່ານແຂກທີ່ຖືກເຊີນ ຕະຫຼອດຮອດພໍ່ແມ່ປະຊາຊົນອ້ອມຂ້າງແຂວງເຂົ້າຮ່ວມ

ທ່ານ ປອ ແສງທອງ ວັງແກ້ວມະນີ ກໍ່ໄດ້ຂຶ້ນເປີດງານງານບຸນປະເພນີອອກພັນສາ-ຊ່ວງເຮືອເຊິ່ງປີນີ້ແຂວງສະຫວັນນະເຂດ ໄດ້ປະສົບກັບໄພພິບັດນ້ຳຖ້ວມຄັ້ງໃຫຍ່ຫາກໍ່ຜ່ານພົ້ນໄປນັ້ນການກະກຽມ ແລະ ການຈັດງານບຸນປະເພນີອອກພັນສາປີນີ້ແມ່ນບໍໄດ້ເຮັດໃຫຍ່ຄືປີທີ່ຜ່ານມາ ແລະ ອີກປະການໜຶ່ງສະຖານທີ່ຈັດງານທີ່ເຄີຍຈັດກໍ່ມີການກໍ່ສ້າງຕະຝັ່ງເຈື່ອນແຕ່ເຖິງຢ່າງໃດກໍ່ຕາມເພື່ອເປັນການອະນຸລັກຮັກສາຮີດຄອງປະເພນີອັນດີງາມຂອງຊາດ ພວກເຮົາກໍ່ໄດ້ຍ້າຍສະຖານທີ່ຂຶ້ນມາຈັດຢູ່ສວນສຸຂະພາບ ໜູຮັກ ພູມສະຫວັນ ເຊິ່ງງານບຸນດັ່ງກ່າວແມ່ນໄດ້ເລີ່ມມາແຕ່ວັນທີ 8 ຕຸລາ ຈົນເຖິງວັນທີ 14 ຕຸລາ 2019 ຢູ່ໃນງານແມ່ນມີຫຼາຍກິດຈະກຳເຮັດໃຫ້ງານມີສີສັນມ່ວນຊື່ນ ແລະ ໃນປີນີ້ມີບັນດາບໍລິສັດ, ຫ້າງຮ້ານຫົວໜ່ວຍທຸລະກິດທັງພາຍໃນ ແລະ ຕ່າງແຂວງເຂົ້າມາວາງສະແດງ ແລະ ຈຳໜ່າຍສິນຄ້າ ມີທັງໝົດ 100 ກວ່າຫ້າງຮ້ານ.

ກິດຈະກຳໃນງານບຸນອອກພັນສາແມ່ນປະກອບມີ ຕອນເຊົ້າວັນທີ 13 ຕຸລາ 2019 ຈັດໃຫ້ມີການຕັກບາດຖວາຍສັງກະທານຢູ່ຕາມວັດຕ່າງໆ, ຕອນກາງຄືນມີພິທີໄຫຼເຮືອໄຟຂອງກຸ່ມບ້ານທີ 3 ສ່ວນຕອນເຊົ້າວັນທີ 14 ຕຸລາ ບັນດາມວນຊົນແມ່ນໄດ້ຮັບການຟ້ອນປະເພນີຈາກ 6 ກຸ່ມບ້ານ ແລະ ນ້ອງນັກຮຽນຈາກໂຮງຮຽນຕ່າງໆອ້ອມຂ້າງນະຄອນໄກສອນ ພົມວິຫານ ຈາກນັ້ນກໍ່ຍັງຊົມການເປີດໜ້ານ້ຳຂອງສີພາຍເຮືອປະເພນີຂອງກຸ່ມບ້ານພັດທະນາທີ 1 ແລະ ກຸ່ມບລ້ານພັດທະນາທີ 2 ຕາດ້ວຍການແຂ່ງຂັນເຮືອຮອບຕີຊ້າງນ້ຳນອງ ແລະ ຊົມການແຂ່ງຂັນເຮືອຊ່ວງ 2 ປະເພດຄື: ປະເພດ 31-40 ສີພາຍ ມີ 8 ລຳ, ປະເພດ 9-12 ສີພາຍ ມີ 8 ລຳ ລວມເຮືອທີ່ເຂົ້າຮ່ວມການແຂ່ງຂັນທັງໝົດ 16 ລໍາ.
ໃນໂອກາດດຽວກັນ ທ່ານ ທ່ອນແກ້ວ ພຸດທະໄກຍະລາດ ພ້ອມບັນດາແຂກທີ່ເຂົ້າຮ່ວມ ກໍ່ໃຫ້ກຽດຂຶ້ນລັ່ນຄ້ອງ 9 ເພື່ອເປັນສີລິມຸງຄຸນທັງເປັນການເປີດງານປະເພນີ ອອກພັນສາ ແລະ ຊ່ວງເຮືອປະຈຳປີ 2019 ຢ່າງເປັນທາງການ.

Medialaos