ໃນອາທິດທີ່ຜ່ານມາ ທີ່ເມືອງກະລຶມ ແຂວງ ໄດ້ມີ 3 ພາກສ່ວນຄື: ຄະນະພັກ-ຄະນະນໍາເມືອງລະມາມ, ເມືອງທ່າແຕງ ແລະພະແນກສາທາລະນະສຸກແຂວງ ໄດ້ນໍາເອົາເຄື່ອງອຸປະໂພກ-ບໍລິໂພກ ແລະເງິນສົດ ລວມມູນຄ່າທັງໝົດ 43,45 ລ້ານກີບ, ໃນນີ້ເມືອງລະມາມ 17 ລ້ານກີບ, ເມືອງທ່າແຕງ 15 ລ້ານກີບ ແລະພະແນກສາທາລະນະສຸກແຂວງ 11,45 ລ້ານກີບມາມອບໃຫ້ການນໍາເມືອງກະລຶມ ເພື່ອນໍາໄປຊ່ວຍເຫຼືອປະຊາຊົນ #ຜູ້ປະສົບໄພນໍ້າຖ້ວມ.

ຊຶ່ງຕາງໜ້າການນໍາເມືອງລະມາມກ່າວມອບໂດຍແມ່ນທ່ານ ຂັນຕີ ສີລະວົງສາ ເຈົ້າເມືອງໆລະມາມ; ຕາງໜ້າການນໍາເມືອງທ່າແຕງມອບໂດຍທ່ານ ສົມເພັດ ເອີດລັດດາ ເຈົ້າເມືອງໆທ່າແຕງ ແລະຕາງໜ້າພະແນກສາທາລະນະສຸກມອບໂດຍແມ່ນ ທ່ານ ວິສັນ ອິນທະວົງ ຫົວໜ້າພະແນກສາທາລະນະສຸກແຂວງ ແລະກ່າວຮັບແມ່ນທ່ານ ອໍບົວລາ ອ່ອນມະໄລວົງ ເຈົ້າເມືອງໆກະລຶມ ໂດຍມີພາກສ່ວນກ່ຽວຂ້ອງເຂົ້າຮ່ວມ.
ໂອກາດດຽວກັນທ່ານ ອໍບົວລາ ອ່ອນມະໄລວົງ ກໍໄດ້ສະແດງຄວາມຂອບໃຈຕໍ່ສາມພາກສ່ວນທີ່ນໍາເງິນສົດ ແລະເຄື່ອງອຸປະໂພກ-ບໍລິໂພກມາມອບເທື່ອນີ້, ພ້ອມດຽວກັນນັ້ນ ກໍຍັງໃຫ້ຄໍາໝັ້ນວ່າ ຄະນະພັກ-ການນໍາເມືອງກະລຶມຈະນໍາໃຊ້ເງິນທຸກກີບເຂົ້າໃນການແກ້ໄຂໄພພິບັດທັງໄລຍະບັນເທົາທຸກສຸກເສີນ ແລະໄລຍະຂອງການຟື້ນຟູໃຫ້ເກີດປະໂຫຍດສູງສຸດ, ການນໍາເມືອງຈະສູ້ຄຽງຂ້າງປະຊາຊົນຜູ້ທີ່ໄດ້ຮັບຜົນກະທົບຈາກເຫດການຊຸດນີ້ໃຫ້ສາມາດພົ້ນຜ່ານວິກິດໄປໄດ້, ສ່ວນເຄື່ອງທີ່ໄດ້ຮັບໃນໄລຍະຜ່ານມາທາງການນໍາເມືອງແມ່ນໄດ້ມີການຈັດສັນແບ່ງປັນໃຫ້ກັບຄອບຄົວທີ່ໄດ້ຮັບຜົນກະທົບຕາມເຫັນສົມຄວນ, ແຕ່ເຖິງຢ່າງໃດກໍຕາມ ປີນີ້ຖືວ່າເປັນອີກປີໜຶ່ງທີ່ເມືອງກະລຶມໄດ້ຮັບຜົນກະທົບໜັກສົມຄວນ, ດັ່ງນັ້ນ ເພື່ອສຸມໃສ່ແກ້ໄຂ ແລະການຟື້ນຟູຄືນໃໝ່ເຫັນວ່າຍັງມີຄວາມຕ້ອງການຫຼາຍສົມຄວນ ໂດຍສະເພາະແມ່ນງົບປະມານ ແລະຄວາມຕ້ອງການດ້ານອື່ນໆ.

ຂ່າວ: ຖວທ ກະລຶມ
Medialaos