ຕອນເຊົ້າວັນທີ 14 ຕຸລາ 2019 ນີ້ ທີ່ສະໂມສອນສະພາປະຊາຊົນແຂວງ ເຊກອງ ໄດ້ມີຊຸດຝຶກອົບຮົມເພື່ອຍົກລະດັບຂີດຄວາມສາມາດໃຫ້ໜ່ວຍ ສສຂ ປະຈໍາເຂດເລືອກຕັ້ງຂັ້ນເມືອງ ແລະກົງຈັກຊ່ວຍວຽກຄະນະ ສສຊ ປະຈໍາເຂດເລືອກຕັ້ງທີ 16 ແຂວງ ເຊກອງ, ເຂດ 17 ແຂວງ ອັດຕະປື ໂດຍການເປັນປະທານຂອງທ່ານ ພົງສະເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ, ມີ ສສຊ ປະຈໍາເຂດທີ 16; 17, ສສຂ ປະຈໍາໜ່ວຍເລືອກຕັ້ງ ຂັ້ນເມືອງ, ພະນັກງານວິຊາການກົງຈັກຊ່ວຍວຽກຄະນະ ສສຊ ປະຈໍາເຂດເລືອກຕັ້ງເຂົ້າຮ່ວມ.

ຊຸດອົບຮົມຈະໄດ້ຮັບຟັງ ແລະຮຽນຮູ້ກ່ຽວກັບບັນດາເນື້ອໃນເອກກະສານທີ່ສໍາຄັນໃນຂົງເຂດວຽກງານ ສສຊ-ສສຂ ປະຈໍາເຂດ ໂດຍສະເພາະການຈັດຕັ້ງ ແລະການເຄື່ອນໄຫວວຽກງານຂອງຂະແໜງຊ່ວຍວຽກຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ທັກສະໃນການຊັກຖາມ ຕໍ່ກອງປະຊຸມຂອງ ສສຊ-ສສຂ, ຫຼັກການພື້ນຖານໃນການພົບປະ ປະຊາຊົນຂອງ ສສຂ, ການຈັດຕັ້ງປະຕິບັດວຽກງານຂອງຂະແໜງຊ່ວຍວຽກຄະນະ ສສຊ ປະຈໍາເຂດເລືອກຕັ້ງ. ໂດຍນັກວິທະຍາກອນມີປະສົບການສູງທີ່ມາຈາກສະພາແຫ່ງຊາດມາຖ່າຍທອດແນະນໍາ.
ພ້ອມນີ້, ປະທານກອງປະຊຸມຍັງຈະໄດ້ມີຄໍາຖາມເຈາະຈີ້ມ ແລະຜັດປ່ຽນກັນປະກອບຄໍາຄິດເຫັນແລກປ່ຽນບົດຮຽນບາງບັນຫາທີ່ບໍ່ທັນເຂົ້າໃຈ.
ທັງນີ້, ກໍເພື່ອເປັນການຍົກລະດັບຄວາມຮູ້, ຄວາມສາມາດໃຫ້ໜ່ວຍ ສສຂ ແລະກົງຈັກຊ່ວຍວຽກ ສສຊ ປະຈໍາເຂດທີ 16; 17 ໂດຍສະເພາະຄວາມຮູ້ທາງດ້ານທິດສະດີ, ເພື່ອມາສົມທຽບກັບພຶດຕິກຳຕົວຈິງໃນການເຄື່ອນໄຫວວຽກງານ, ທັງເປັນການຍົກສູງຄຸນນະພາບວຽກງານຂອງໜ່ວຍ ສສຂ ຂັ້ນເມືອງ ແລະກົງຈັກຊ່ວຍວຽກຄະນະ ສສຊ ປະຈໍາເຂດ, ໃຫ້ຮູ້ເຄື່ອນໄຫວວຽກງານຕາມພາລະບົດບາດ, ສິດໜ້າທີ່ ແລະຂອບເຂດຄວາມຮັບຜິດຊອບຂອງຕົນໃຫ້ນັບມື້ດີຂຶ້ນກວ່າເກົ່າ.
ຊຸດອົບຮົມຈະໄດ້ດໍາເນີນໄປເປັນເວລາ 2 ວັນເຕັມ ໂດຍເລີ່ມແຕ່ວັນທີ 14-15 ຕຸລາ 2019 ຈິ່ງຈະສໍາເລັດ.

ໂດຍ:ນາລີວັນ
Medialaos