ອາດສະພອນ ຈັດກອງປະຊຸມອົງການປົກຄອງເມືອງ ຄັ້ງທີ V

0
189

ກອງປະຊຸມອົງການປົກຄອງເມືອງອາດສະພອນ ຄັ້ງທີ V ໄດ້ຈັດຂື້ນໃນວັນທີ 15 ຕຸລາ 2019 ນີ້ ຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງອາດສະພອນ ແຂວງສະຫວັນນະເຂດ ໂດຍການເປັນປະທານຂອງ ທ່ານ ຄຳແພງ ເພັດທຸມພອນ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ມີບັນດາທ່ານໃນຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

ໂອກາດດັ່ງກ່າວ ທ່ານ ກອງແລ ອ່ອນຈັນທະລືໄຊ ກຳມະການພັກເມືອງ ຫົວໜ້າຫ້ອງວ່າການປົກຄອງເມືອງອາດສະພອນ ກໍ່ໄດ້ຜ່ານຮ່າງບົດສະຫຼຸບ ການຈັດຕັ້ງແຜນພັດທະນາເສດຖະກິດ-ສັງຄົມ ປະຈຳເດືອນຕຸລາ ແລະ ທິດທາງແຜນການປະຈຳເດືອນ ພະຈິກ 2019 ເຊິ່ງໄດ້ມີການສະຫຼຸບຕີລາຄາຜົນສຳເລັດແຫ່ງການນຳພາວຽກງານໃນແຕ່ລະດ້ານແຕ່ລະຂົງເຂດ,ໂດຍສະເພາະດ້ານເສດຖະກິດ, ທາງດ້ານກະສິກຳ ເມືອງອາດສະພອນສາມາດປັກດຳເຂົ້ານາປີໄດ້ໃນເນື້ອທີ່ 19.500 ເຮັກຕາ, ມາຮອດປະຈຸບັນແມ່ນເລີ່ມເກັບກ່ຽວແລ້ວໃນບາງທ້ອງຖິ່ນ, ພ້ອມນີ້ຍັງໄດ້ເກັບກຳຜົນເສຍຫາຍຈາກໄພນ້ຳຖ້ວມເຊິ່ງມີ 42 ບ້ານ, 1.652 ຄອບຄົວ ໄດ້ຮັບຜົນກະທົບ, ມີເນື້ອທີ່ຖືກຖ້ວມ 1.632 ເຮັກຕາ, ເສຍຫາຍ 505,14 ເຮັກຕາ, ດ້ານການເງິນ ການຈັດເກັບລາຍຮັບເຂົ້າງົບປະມານຮອດປະຈຸບັນປະຕິບັດໄດ້ 2.188 ລ້ານກວ່າກີບ, ເທົ່າກັບ 78,48% ແລະລາຍຈ່າຍປະຕິບັດໄດ້ 2.310 ລ້ານກວ່າກີບ ເທົ່າກັບ 67,57%, ການສະໜອງສິນເຊື່ອຂອງທະນາຄານນະໂຍບາຍ ໜ່ວຍບໍລິການເມືອງອາດສະພອນ ຮອດທ້າຍເດືອນກັນຍາ ເທົ່າກັບ 34.459 ລ້ານກວ່າກີບ, ກວມເອົາ 4 ໂຄງການ, 14 ເປົ້າໝາຍ, ສຳລັບທິດທາງແຜນການໃນຕໍ່ໜ້້າແມ່ນສືບຕໍ່ຊຸກຢູ່ພໍ່ແມ່ປະຊາຊົນເກັບກ່ຽວເຂົ້ານາປີ ໃຫ້ທ່ວງທັນຕາມລະດູການ, ສືບຕໍ່ຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນຄາດຄະເນ, ດ້ານທະນາຄານນະໂຍບາຍກໍ່ໄດ້ກະກຽມປ່ອຍເງິນກູ້ເປົ້າໝາຍລ້ຽງງົວ ຈຳນວນ 2 ບ້ານ, ຈຳນວນ 16 ຄອບຄົວ ໃນວົງເງິນ 335 ລ້ານກວ່າກີບ. ໃນກອງປະຊຸມ ທ່ານ ຖາວອນ ໄຊຍະເຄື່ອງ ຮອງຫົວໜ້າຫ້ອງວ່າການເມືອງ ກໍ່ໄດ້ຜ່ານຂໍ້ຕົກລົງຂອງທ່ານເຈົ້າເມືອງອາດສະພອນ ວ່າດ້ວຍການແຕ່ງຕັ້ງຄະນະຮັບຜິດຊອບລວມ ແລະອະນຸກຳມະການຕ່າງໆໃນການຈັດງານບຸນປະເພນີຊ່ວງເຮືອ ຕິດພັນກັບການທ່ອງທ່ຽວ ປະຈຳປີ ພສ 2562.
ໃນຕອນທ້າຍຂອງ ກອງປະຊຸມ ທ່ານ ຄຳແພງ ເພັດທຸມພອນ ກໍ່ໄດ້ມີຄຳເຫັນໂອ້ລົມຕໍ່ກອງປະຊຸມເຊິ່ງທ່ານກໍ່ໄດ້ກ່າວຍ້ອງຍໍຊົມເຊີຍຜົນງານການປະຕິບັດວຽກງານຂອງແຕ່ລະຂົງເຂດ ພ້ອມນີ້ ທ່ານກໍ່ຍັງໄດ້ ໃຫ້ແຕ່ລະພາກສ່ວນ ແຕ່ລະຫ້ອງການປະກອບຄຳເຫັນເພີ່ມເຕີມ ເພື່ອຍົກເອົາບັນຫາ ແລະຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຂອງຂະແໜງການຂອງຕົນ, ເພື່ອນໍາມາພິຈາລະນາແກ້ໄຂ ແລະ ນຳໄປເປັນບົດຮຽນໃນການຈັດຕັ້ງປະຕິບັດວຽກງານໃນຕໍ່ໜ້າ ໃຫ້ບັນລຸຕາມເປົ້າໝາຍທີ່ວາງໄວ້, ພ້ອມນີ້ ທ່ານ ກໍ່ຍັງໄດ້ມີຄຳເຫັນຕື່ມໃນການຈັດງານບຸນຊ່ວງເຮືອປະຈຳປີ ທີ່ຕິດພັນກັບການທ່ອງທ່ຽວ ໃນວັນທີ 24-25 ຕຸລາ ທີ່ຈະມາເຖິງນີ້ ຈຶ່ງໄດ້ຮຽກຮ້ອງໃຫ້ທຸກພາກສ່ວນເອົາໃຈໃສ່ ຮັກສາຄວາມສະຫງົບ-ປອດໄພ, ຊ່ວຍກັນຮັກສາຄວາມສະອາດຈົບງາມເພື່ອດຶງດູດນັກທ່ອງທ່ຽວ ໃຫ້ມາທ່ອງທ່ຽວ ມາໃຊ້ຈ່າຍໃນເມືອງອາດສະພອນຫຼາຍຂຶ້ນ ເຊິ່ງມັນຈະເປັນຜົນດີຢ່າງຍິ່ງຕໍ່ເສດຖະກິດ ການຊື້ຂາຍພາຍໃນເມືອງຂອງພວກເຮົາ.

ພາບ ແລະ ຂ່າວ
ສົມຈິດ ແກ້ວສີຖາທິລາດ
Medialaos