ປະທານສະຫະພັນກຳມະບານແຂວງສະຫວັນນະເຂດລົງເຜີຍແຜ່ມະຕິກອງປະຊຸມວິສາມັນ

0
207

ໃນລະຫວ່າງວັນທີ 14-15 ຕຸລາ 2019 ນີ້ຄະນະສະຫະພັນກຳມະບານແຂວງ ພ້ອມດ້ວຍພະນັກງານວິຊາການຂະແໜງຂະບວນການ-ແຂ່ງຂັນຍ້ອງຍໍ, ຂະແໜງໂຄສະນາ-ສື່ມວນຊົນ, ຂະແໜງຈັດຕັ້ງ-ກວດກາ ແລະ ກອງທຶນ, ໄດ້ລົງເຄື່ອນໄຫວຊຸກຍູ້ວຽກງານກຳມະບານຮອບດ້ານ ຢູ່ເມືອງນອງ ແລະ ເມືອງເຊໂປນ, ເພື່ອເປັນການອ້າງອີງເຖິງຜົນງານການເຄື່ອນໄຫວວຽກງານກຳມະບານຮອບດ້ານຂອງຄະນະບໍລິຫານງານສະຫະພັນກຳມະບານເມືອງໃນໄລຍະຜ່ານມາ ທ່ານປະທານສະຫະພັນກຳມະບານເມືອງນອງ ແລະ ເມືອງເຊໂປນກໍ່ໄດ້ຂຶ້ນຜ່ານບົດລາຍງານໂດຍຫຍໍ້ ຊຶ່ງມີຜູ້ເຂົ້າຮ່ວມຮັບຟັງທັງໝົດ 189 ຄົນ, ຍິງ 114ຄົນ.

ໃນວາລະດັ່ງກ່າວກໍໄດ້ມີການເຜີຍແຜ່ມະຕິກອງປະຊຸມວິສາມັນ 6 ເດືອນຕົ້ນປີ 2019 ຂອງສະຫະພັນກຳມະບານແຂວງສະຫັວນນະເຂດ ໂດຍແມ່ນ ທ່ານ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ ຊຶ່ງທ່ານໄດ້ເນັ້ນໜັກ ຫຼາຍບັນຫາ ໂດຍສະເພາະແມ່ນການປະຕິບັດນະໂຍບາຍຕໍ່ສະມາຊິກກຳມະບານ, ກຳມະກອນ ກໍຄືສະມາຊິກກອງທຶນ ກຊທ ແລະ ຄວາມສະເໝີພາບບົດບາດຍິງ – ຊາຍ.

ນອກນັ້ນ , ທ່ານຍັງໄດ້ເນັ້ນໃຫ້ບັນດາເມືອງເອົາໃຈໃສ່ຕໍ່ວຽກງານປັບປຸງການຈັດຕັ້ງ ຂະຫຍາຍສະມາຊິກກຳມະບານ ແລະ ສະມາຊິກກອງທຶນໃຫ້ຫຼາຍຂຶ້ນ ແລະ ສຸດທ້າຍກໍ່ໄດ້ມີການແລກປ່ຽນຄຳຄິດຄຳເຫັນຂອງບັນດາຄະນະກຳມະບານຮາກຖານ ແລະ ສະມາຊິກກຳມະບານຈຳນວນໜຶ່ງເພື່ອໃຫ້ໄດ້ຄວາມເປັນເອກະພາບໃນການຈັດຕັ້ງປະຕິບັດລະບຽບກອງທຶນໃຫ້ດີຂຶ້ນໃນຕໍ່ໜ້າ.

ພາບ-ຂ່າວ: ຂັນຄຳ ກຸລະວົງສາ
MEDIALAOS