ເມືອງມຸນລະປາໂມກ ແຂວງຈໍາປາສັກ ໄດ້ເປີດກອງປະຊຸມຝືກອົບຮົມພື້ນຖານການຂຽນຂ່າວໃຫ້ແກ່ນັກຂ່າວ ແລະໜ່ວຍງານຂ່າວສານຫ້ອງການການອ້ອມຂ້າງເມືອງ ໃນວັນທີ16 ຕຸລາ 2019 ຢູ່ທີ່ຫ້ອງວ່າການເມືອງ ໃຫ້ກຽດເປັນປະທານຂອງ ທ່ານ ສຳລີ ແກ່ນມະນີ ເຈົ້າເມືອງໆມຸນລະປາໂມກ,ທ່ານ ຄຳມ່ວນ ພິມສີວັນໂນ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ແຂວງ,ທ່ານ ສົມຈັນ ສີຈັນແດງ ຫົວໜ້າຫ້ອງການ ຖວທ ເມືອງ,ມີວິທະຍາກອນຈາກພະແນກ ຖວທ ,ບັນດາສໍາມະນາກອນທີ່ເປັນນັກຂ່າວຈາກ ຫ້ອງການ ຖວທ ເມືອງ,ໜ່ວຍງານຂ່າວສານຫ້ອງການອ້ອມຂ້າງເມືອງເຂົ້າຮ່ວມທັງໝົດ 46 ທ່ານ.

ທ່ານ ສໍາລີ ແກ່ນມະນີ ເຈົ້າເມືອງໆມຸນລະປາໂມກ ໄດ້ກ່າວໄຂຊຸດອົບຮົມວ່າ: ຊຸດອົບຮົມຄັ້ງນີ້ສຸດທີ່ມີຄວາມສໍາຄັນ ແລະ ຈໍາເປັນໃຫ້ແກ່ນັກຂ່າວ ແລະຜູ້ທີ່ເຮັດວຽກງານຂ່າວສານ ພາຍໃນເມືອງ ເພາະຈະເປັນການຍົກລະດັບວິຊາການຂອງຕົນໃຫ້ສູງຂຶ້ນ ຕອບສະໜອງຕາມຄວາມຮຽກຮ້ອງຕ້ອງການຂອງພັກໃນໄລຍະໃໝ່,ຈາກນີ້ກໍເປັນການຊຸກຍູ້ຈິດໃຈໃຫ້ນັກຂ່າວມີຄວາມຫ້າວຫັນຕໍ່ການເຄື່ອນໄຫວເອົາຂ່າວ; ນໍາສະເໜີເກດການທີ່ເກີດຂຶ້ນ ໂດຍສະເພາະໃນໄລຍະກະກຽມຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກເມືອງຄັ້ງທີ VIII ທີ່ຈະມາເຖິງນີ້ໃຫ້ມີບັນຍາກາດຟົດຟື້ນ ແລະເປັນຂະບວນການກ້ວາງຂວາງຫຼາຍກ່ວາເກົ່າ.

ໃນຊຸດອົບຮົມຄັ້ງນີ້ສໍາມະນາກອນໄດ້ຮຽນຮູ້ທັດສະນະຂອງພັກຕໍ່ວຽກງານສື່ມວນຊົນ,ລະບຽບ,ກົດໝາຍຂອງລັດ,ຂໍ້ຫ້າມ ແລະ ຈັນຍາບັນຂອງສື່ມວນຊົນລາວ,ໂຄງສ້າງພື້ນຖານຂອງຂ່າວ,ວິທີການຂຽນຂ່າວຕາມ 6 ປັດໄຈ : 5 W , 1 H, ການຂຽນຫົວຂໍ້ຂ່າວ,ວັກນໍາຂ່າວ, ການອ້າງອີງຂໍ້ມູນແຫຼ່ງຂ່າວປະເພດຕ່າງໆ,ເຕັກນິກການສຳພາດ,ການສົ່ງຂ່າວຈາກເມືອງມາກາແຂວງຜ່ານທາງລະບົບອິນເຕີເນັດ, ການເຊື່ອມຕໍ່ ແລະ ການນຳໃຊ້ເພສບຸກ,ເຟສເພຈ ແລະອື່ນໆ.

ໃນການຝຶກອົບຮົມຄັ້ງນີ້ ສໍາມະນາກອນແມ່ນໄດ້ຮຽນຮູ້ທາງດ້ານທິດສະດີ ແລະ ປະຕິບັດຕົວຈິງໄປພ້ອມ ເຊັ່ນ:ໄດ້ແບ່ງເປັນ 2 ຈຸ ລົງສໍາພາດ,ເກັບກຳຂໍ້ມູນຕົວຈິງມາຂຽນເປັນຂ່າວ,ລາຍງານຂ່າວ ເພື່ອປະເມີນຄວາມຮັບຮູ້ເຂົ້າໃຈຂອງສໍາມະນາກອນ ຈາກຊະດອົບຮົມໃນຄັ້ງນີ້ອີກດ້ວຍ.
ຊຸດການຝືກອົບຮົມພື້ນຖານໃນການຂຽນຂ່າວຢູ່ເມືອງມຸນລະປາໂມກຄັ້ງນີ້ ຈະໄດ້ດໍາເນີນໄປເປັນເວລາ 3 ວັນແຕ່ວັນທີ 16 -18 ຕຸລາ ຈິ່ງຈະສຳເລັດ.

ສື່ມວນຊົນແຂວງຈຳປາສັກ
ພາບ-ຂ່າວ: ເກດສະໜາ ແກ້ວສຸວັນນະແສງ
Medialaos