ຂະບວນທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ ໄດ້ດຳເນີນມາ 3 ວັນ ໃນວັນທີ 17 ຕຸລາ 2019 ນີ້, ຂະບວນທຳມະຍາດຕາ ຍັງສຶບຕໍ່ກິດຈະກຳຢູ່ ປະເທດມຽນມາ ໄດ້ເດີນທາງຈາກ ເມືອງທ່າຂີ້ເຫຼັກ ຫາ ເມືອງຊຽງຕຸງ ເຂດລັດສານ. ຈາກນັ້ນ, ໃນວັນດຽວກັນ ຂະບວນທຳມະຍາດຕາ ກໍໄດ້ເດີນທາງໄປວັດພະທາດມະຫາມຸນີ ຈັດພິທີໃສ່ບາດ ແລະ ໂຮງຮຽນຫົວຂ່ວງປະລິຍະຕິທຳ ກຳລັງກໍ່ສ້າງເປັນໂຮງຮຽນສົງ ເພື່ອປູກຕົ້ນໄມ້ພະສີມະຫາໂພ ຫລື ຕົ້ນໂພ ແລະ ວັດຫົວຂ່ວງປະລິຍະຕິທຳ.

ໃນໂອກາດນີ້, ທ່ານ ຄິນຊວຍ ປະທານສະມາພັນພຸດເທລະວາດ ແຫ່ງ ມຽນມາ ໄດ້ໃຫ້ສຳພາດຕໍ່ສື່ມວນຊົນວ່າ: ໂຄງການທຳມະຍາດຕາ 5 ແຜ່ນດິນ ລຸ່ມແມ່ນໍ້າຂອງນີ້, ບັນດາຜູ້ນຳ ແລະ ປະຊາຊົນມຽນມາ ແມ່ນໄດ້ໃຫ້ຄວາມສຳຄັນ ແລະ ເຂົ້າຮ່ວມໃສ່ບາດ ຫລາຍກວ່າ 40.000 ຄົນ ເຊິ່ງມັນໄດ້ສະແດງເຖິງສັດທາອັນແຮງກ້າຕໍ່ສາສະໜາພຸດຂອງພວກເຮົາ.

ສາສະໜາພຸດ ມີຄວາມສຳຄັນຫລາຍ ໃນປະເທດມຽນມາ, ປະຊາຊົນສວນໃຫຍ່ແມ່ນນັບຖືສາສະໜາພຸດ ເທວະລາດ ໂດຍມີພະສົງຈຳນວນ 5 ແສນອົງ ແຕ່ຫລັງຈາກທີ່ມຽນມາຖືກສັດຕູຍຶດຄອງ ເຮັດໃຫ້ການນັບຖືສາສະໜາຫຼຸດລົງ ຈາກນັ້ນ ປີ 1947 ຈຶ່ງໄດ້ກໍ່ຕັ້ງສະມາພັນພຸດເທລະວາດຂຶ້ນ ເພື່ອຟື້ນຟູສາສະໜາພຸດໃຫ້ກັບຄືນມາອີກຄັ້ງໜຶ່ງ ໂດຍປະທານສະມາພັນພຸດເທລະວາດ ແຫ່ງປະເທດມຽນມາ ໄດ້ຕັ້ງເປົ້າໝາຍວ່າ ຢາກຮ່ວມສາສະໜາພຸດໃຫ້ເປັນໜຶ່ງດຽວ ຈຶ່ງເປັນທີ່ມາຂອງການສ້າງຕັ້ງປະຊາຄົມພຸດທະນາສະນິກະຊົນ ແຫ່ງອາຊີ ທີ່ໄດ້ຮ່ວມກັບ 10 ປະເທດ ແລະ ມະຫາວິທະຍາໄລຈຸລາລົງກອນ ລາດຊະວິທະຍາໄລ ແລະ ສະຖາບັນໂພທິຄະຍາວິຊາໄລ ຮ່ວມລົງນາມ ເພື່ອສ້າງຄວາມເຂັ້ມແຂງທາງພຸດທະສາສະໜາ ໃນອາຊີ.

Medialaos