ພະນັກງານສະມາຊິກພັກ ໜ່ວຍພັກຈາລະຈອນ-ມອດໄຟ ຮາກຖານພັກ ກອງບັນຊາການ ປກສ ເມືອງອຸທຸມພອນ ຈັດກອງປະຊຸມໃຫຍ່ຄັ້ງທີ I

0
100

ກອງປະຊຸມໃຫຍ່ສະມາຊິກພັກ ຄັ້ງທີ I ຄະນະໜ່ວຍພັກຈາລະຈອນ-ມອດໄຟ ຮາກຖານພັກກອງບັນຊາການ ປກສ ເມືອງອຸທຸມພອນ ໄດ້ຈັດຂຶ້ນໃນຕອນເຊົ້າຂອງວັນທີ 17 ຕຸລາ 2019 ທີ່ຜ່ານມາ ຢູ່ທີ່ສະໂມສອນກອງບັນຊາການ ປກສ ເມືອງ ໂດຍພາຍໃຕ້ການເຂົ້າຮ່ວມເປັນປະທານຂອງ ສະຫາຍ ຄຳເຫວີຍ ເພັງພະຈັນ ຄະນະປະຈຳພັກເມືອງ ປະທານກວດກາພັກ-ລັດເມືອງ, ສະຫາຍ ພັນໂທ ບຸນເດັດ ແສນລາດ ຮັກສາການເລຂາຄະນະພັກຮາກຖານກອງບັນຊາການ ປກສ ເມືອງ. ຈາກນີ້ກໍ່ມີບັນດາສະຫາຍ ເລຂາໜ່ວຍພັກ, ຄະນະໜ່ວຍພັກ, ແຂກຖືກເຊີນ ຕະຫຼອດຮອດສະມາຊິກພັກສົມບູນ ແລະ ສຳຮອງຂອງໜ່ວຍພັກດັ່ງກ່າວເຂົ້າຮ່ວມ.

ຕໍ່ກອງປະຊຸມ ສະຫາຍ ພັນໂທ ຄຳໄພ ໄຊຍະສີຫາ ເລຂາໜ່ວຍພັກ ໄດ້ຜ່ານບົດລາຍງານການເມືອງ ແລະ ບົດສຳຫຼວດການຊີ້ນຳໆພາຂອງຄະນະໜ່ວຍພັກ ວ່າ: ໜ່ວຍພັກຈາລະຈອນ-ມອດໄຟ ແມ່ນໜ່ວຍພັກໜຶ່ງທີ່ຂຶ້ນກັບ ຮາກຖານພັກກອງບັນຊາການ ປກສ ເມືອງອຸທຸມພອນ ມີພາລະບົດບາດການຊີ້ນຳໆພາວຽກງານກອງຈາລະຈອນ ແລະ ຈຸສະກັດກັ້ນ-ຕ້ານອັກຄີໄພ ແລະ ທັງເປັນເສນາທິການໃຫ້ຄະນະພັກຮາກຖານ, ມີຄວາມຮັບຜິດຊອບໂດຍກົງ ຕໍ່ການຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມໃນທົ່ວເມືອງ ໜ່ວຍພັກຈາລະຈອນ-ມອດໄຟ ປະກອບມີຄະນະໜ່ວຍພັກ 3 ສະຫາຍ, ໂດຍໄດ້ແຍກອອກຈາກໜ່ວຍພັກ ຕຳຫຼວດ ໃນຄັ້ງວັນທີ 15/8/2015. ມາຮອດປະຈຸບັນໜ່ວຍພັກ ມີສະມາຊິກພັກທັງໝົດ 30 ສະຫາຍ, ຍິງ 1 ສະຫາຍ, ສົມບູນ 29 ສະຫາຍ, ຍິງ 1 ສະຫາຍ ແລະ ສຳຮອງ 1 ສະຫາຍ.

ຕະຫຼອດໄລຍະຜ່ານມາ ຄະນະໜ່ວຍພັກ ໄດ້ເລັ່ງໃສ່ຄວາມເປັນລະບຽບຮຽບຮ້ອຍຂອງສັງຄົມ ໂດຍຕິດພັນກັບການເຄື່ອນໄຫວວຽກງານວິຊາສະເພາະ ເຊັ່ນ: ລົງໂຄສະນາກົດລະບຽບການສັນຈອນຕາມເສັ້ນທາງຫຼວງເລກທີ 9, ເສັ້ນທາງເລກທີ 13 ແລະ ຢູ່ຕາມບັນດາ ໂຮງຈັກ-ໂຮງງານ ແລະ ໂຮງຮຽນ ພາຍໃນເມືອງ. ນອກນັ້ນຍັງໄດ້ເອົາໃຈໃສ່ໃນວຽກງານປະຈຳປ້ອມ ແລະ ແກ້ໄຂ ຄະດີອຸປະຕິເຫດທີ່ເກີດຂຶ້ນ. ສ່ວນວຽກງານສະກັດກັ້ນ-ຕ້ານອັກຄີໄພ ແມ່ນໄດ້ເຄື່ອນໄຫວປະຕິບັດໜ້າທີ່ວິຊາສະ ເພາະກວມເອົາ 5 ເມືອງຄື: ອຸທຸມພອນ, ອາດສະພັງທອງ, ອາດສະພອນ, ຈຳພອນ ແລະ ໄຊບູລີ. ນອກນັ້ນໃນກອງປະຊຸມ ບັນດາຜູ້ແທນສົມບູນກໍ່ຍັງໄດ້ເປັນເອກະພາບກັນໃຊ້ສິດປະຊາທິປະໄຕອັນເຕັມສ່ວນ ເພື່ອປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ບົນພື້ນຖານຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດ ເຊິ່ງມີຜູ້ສະໝັກທັງໝົດ 5 ສະຫາຍ.

ຜ່ານການປ່ອນບັດລົງຄະແນນສຽງ ແລະ ຜ່ານກອງປະຊຸມຄັ້ງປະຖົມມະເລິກ ໄດ້ເຫັນດີຕົກລົງຮັບຮອງເອົາສະຫາຍ ພັນໂທ ຄຳໄພ ໄຊຍສີຫາ ເປັນເລຂາໜ່ວຍພັກອີກສະໄໝ, ເຫັນດີຕົກລົງຮັບຮອງເອົາສະຫາຍ ພັນໂທ ພູວິໄລ ດາວິໄລ ເປັນຮອງເລຂາ ແລະ ເຫັນດີຕົກລົງຮັບຮອງເອົາສະຫາຍ ພັນຕີ ແກ້ວ ແສງພະຈັນ ເປັນກຳມະການ. ນອກນັ້ນກອງປະຊຸມຍັງໄດ້ເຫັນດີຕົກລົງເລືອກເອົາສະຫາຍ ພັນໂທ ພູວິໄລ ດາວິໄລ ເປັນປະທານກວດກາໜ່ວຍພັກ ແລະ ເຫັນດີຕົກລົງເລືອກເອົາສະຫາຍ ຮ້ອຍເອກ ຄຳຕັນ ເຄນໄຊບຸນຍະເລດ ເປັນຮອງປະທານ. ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມໃຫ້ທິດຊີ້ນໍາ ຈາກສະຫາຍ ຄຳເຫວີຍ ເພັງພະຈັນ ຄະນະປະຈຳພັກເມືອງ ປະທານກວດກາພັກ-ລັດເມືອງ. ເຊິ່ງສະຫາຍໄດ້ເນັ້ນໃຫ້ບັນດາສະມາຊິກພັກ ຕ້ອງເອົາໃຈໃສປະຕິບັດລະບຽບຂອງພັກ, ປະຕິບັດບັນດາແຈ້ງການ ແລະ ຄຳສັ່ງຂອງຂັ້ນເທິງ ໃນແຕ່ລະຂັ້ນຢ່າງເຂັ້ມງວດ, ເປັນແບບຢ່າງໃຫ້ແກ່ມະຫາຊົນ ແລະ ພະນັກງານ-ນັກຮົບ, ເພີ່ມທະວີການນໍາພາຂອງພັກໃຫ້ເຂັ້ມແຂງ ແລະ ເອົາໃຈໃສ່ປະຕິບັດໜ້າທີ່ຕາມພາລະບົດບາດວິຊາສະເພາະຂອງຕົນ ດ້ວຍຄວາມຮັບຜິດຊອບສູງ.

ຂ່າວ: ພອນປະເສີດ ແຜນພັກດີ
Medialaos