ທ່ຽວຊົມຜົນງານດ້ານອຸດສາຫະກຳລ້ຳໜ້າ ແລະ ທັນສະໄໝຂອງ ສປປ ຈີນ ທີ່ນະຄອນຈີໜານ

0
354

ນັບວ່າເປັນອີກໜຶ່ງໄຮໄລຂອງງານກໍ່ວ່າໄດ້ສຳລັບກິດຈະກຳສຳລັບສື່ມວນຊົນນາໆຊາດຈາກ 12 ປະເທດໃນແຖບອາຊີ ແລະ ເອີຣົບ ພາຍໃຕ້ຫົວຂໍ້ “ສຳຫຼວດປະເທດຈີນ” ທີ່ນະຄອນຈີໜານ. ມື້ ທີ 3 ຂອງການຢ້ຽມຢາມນະຄອນຈີໜານໃນເດືອນກັນຍາ 2019 ຜ່ານມາ, ຄະນະຮັບຜິດຊອບນຳທ່ຽວຂອງສຳນັກຂ່າວ ຊາຍນາເດລີ (China Daily) ໄດ້ຈັດໂປຼແກຼມນຳທ່ຽວໃຫ້ໄປທັດສະນະສຶກສາເບິ່ງຄວາມຫຍິ່ງໃຫຍ່ອາລັງການທາງດ້ານອຸດສາຫະກຳທີ່ລ້ຳໜ້າ ແລະ ທັນສະໄໝຂອງ ສປປ ຈີນ ນັ້ນກໍ່ຄື: ການຢ້ຽມຢາມໂຮງງານຜະລິດລົດບັນທຸກໜັກຊີໂນທຼັກ (Sinotruk) ເປັນໂຮງງານທີ່ຜະລິດລົດບັນທຸກສົ່ງອອກໄປຍັງ 150 ກວ່າປະເທດທົ່ວໂລກ ແລະ ຍັງເປັນໂຮງງານແຫ່ງທຳອິດຂອງໂລກທີ່ຜະລິດລົດບັນທຸກແບບໄຮ້ຄົນຂັບ.

ບໍລິສັດ Sinotruk ສ້າງຕັ້ງຂຶ້ນໃນປີ 1956 ເປັນຂອງລັດຖະບານທີ່ໄດ້ຮັບການປັບປຸງ ແລະ ພັດທະນາກ້າວໄປຢ່າງບໍ່ຢຸດຢັ້ງ ນັບທັງດ້ານການພັດທະນາເຕັກໂນໂລຊີ ແລະ ການຂະຫຍາຍການຕະຫຼາດ
ໃນຊຸມປີຜ່ານມາ, ທາງໂຮງງານໄດ້ລົງທຶນທັງໝົດ 20 ຕື້ຢວນ (2,82 ຕື້ໂດລາ) ໃນການຫັນເປັນເຕັກໂນໂລຊີ, ພ້ອມທັງການຄົ້ນຄວ້າຜະລິດຕະພັນ ແລະ ການພັດທະນາ. ໃນປະຈຸບັນ ໄດ້ພັດທະນາເປັນຖານການຜະລິດລົດບັນທຸກໜັກທີ່ໃຫຍ່ທີ່ສຸດໃນປະເທດຈີນ.

ພາຍຫຼັງຢ້ຽມຊົມຖານການຜະລິດລົດບັນທຸກແລ້ວ ຄະນະພວກເຮົາ ໄດ້ໄປຢ້ຽມຢາມສຳນັກງານລົດໄຟບັນທຸກສິນຄ້າ ສີຫຼູ ເພື່ອການສົ່ງອອກ ເອເຊຍ-ເອີຣົບ ເຊິ່ງເປັນອົງປະກອບທີ່ສຳຄັນໃນການຂົນສົ່ງສິນຄ້າລະຫວ່າງປະເທດຂອງນະຄອນຈີໜານ,ແຂວງຊານຕົງ ເຊິ່ງໄດ້ເຮັດໜ້າທີ່ໃນການສົ່ງເສີມໂຄງການສາຍພານ ແລະ ຖະໜົນ ຢູ່ພາຍໃນແຂວງຊານຕົງທີ່ເປີດການນຳໃຊ້ມາໄດ້ 8 ປີແລ້ວ ແລະ ໄດ້ຮັບປະສົບການທີ່ມີການຂະຫຍາຍຕົວຢ່າງໄວວາ. ລົດໄຟຂົນສົ່ງສິນຄ້າຂາອອກສ່ວນໃຫຍ່ແມ່ນອຸປະກອນເຄື່ອງຈັກ, ເຄື່ອງໃຊ້ໃນເຮືອນ ແລະ ອາໄຫຼ່ລົດ, ພ້ອມທັງສິນຄ້າອຸດສາຫະກຳເບົາ. ສ່ວນການ ນຳເຂົ້າປະກອບມີເສັ້ນຝ້າຍຈາກອາຊີກາງ, ໄມ້, ເນື້ອເຍື່ອ, ແລະ ໄມ້ໂອກຈາກປະເທດຣັດເຊຍ.

ບ່າຍຂອງວັນດຽວກັນຄະນະພວກເຮົາໄດ້ສືບຕໍ່ຢ້ຽມຢາມໂຮງງານຈີເອີ້ ສ້າງຕັ້ງຂຶ້ນໃນປີ 1937 ເປັນໂຮງງານຂອງລັດ ທີ່ຜະລິດຊິ້ນສ່ວນກົນຈັກ,ເຄື່ອງມື,ຂຶ້ນຮູບໂລຫະ ແລະ ອາໄຫຼ່ກົນຈັກລົດຍົນປະເພດຕ່າງໆ ທີ່ຜະລິດພາຍໃນປະເທດຈີນ ແລະ ຜະລິດຊິ້ນສ່ວນອາໄຫຼ່ລົດຍົນທີ່ສົ່ງຂາຍໃຫ້ກັບບໍລິສັດຜະລິດລົດຍົນໃນຕ່າງປະເທດເຊັ່ນ: ເຄື່ອງລົດຍົນຍີ່ຫໍ້ GM,FORD,NISSAN,VW, LAND ROWER, VOLVO.

ລວມທັງການຜະລິດຊິ້ນສ່ວນຍານອາວະກາດ,ລົດໄຟ,ກຳປັ່ນ ແລະ ອຸດສະຫະກຳການທະຫານ. ໂຮງງານດັ່ງກ່າວເປັນຖານການຜະລິດທີ່ໃຫຍ່ທີ່ສຸດໃນປະເທດຈີນ ແລະ ປຽບເໝືອນກະດູກສັນຫຼັງສຳລັບຖານການຜະລິດດ້ານອຸດສະຫະກຳຂອງ ສປຈີນ. ເຊິ່ງຜະລິດຕະພັນດັ່ງກ່າວໄດ້ຜະລິດເພື່ອຕອບສະໜອງການຜະລິດພາຍໃນ ແລະ ສົ່ງອອກຂາຍໄປຕ່າງປະເທດໄດ້ 67 ປະເທດໃນໂລກ ແລະ ພາກພື້ນ. ຈາກນັ້ນໃນຕອນຄ່ຳຂອງວັນດຽວກັນ ຄະນະສື່ມວນຊົນພວກເຮົາ ກໍ່ໄດ້ເຂົ້າຮ່ວມຊົມການສະແດງນ້ຳພຸທີ່ປະກອບສາກແສງສີຢ່າງອະລັງການ ໃນທັດສະນີຍະພາບຂອງຍາມຄ່ຳຄືນທີ່ແຄມແມ່ນ້ຳ ດ້າໝິງ ນະຄອນຈີໜານ ເຊິ່ງເປັນອີກໜຶ່ງຈຸດໝາຍປາຍທາງຂອງນັກທ່ອງທ່ຽວ.

ສື່ມວນຊົນແຂວງຈຳປາສັກ
ໂດຍ: ມົນທຽນ ໄຊຍະສິດ
Medialaos