ໃນວັນທີ 18-20 ຕຸລາ 2019 ນີ້, ພາຍຫລັງສຳເລັດກິດຈະກຳທາງພຸດທະສາສະໜາຢູ່ປະເທດມຽນມາແລ້ວ, ຂະບວນທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ ເຊິ່ງປະກອບມີພະສົງຈາກ 5 ປະເທດ 40 ກວ່າອົງ, ຝ່າຍຄາລະວາດ 60 ກວ່າທ່ານ ໄດ້ເດີນທາງມາພັກທີ່ອຳເພີຊຽງຂອງ ຈັງຫວັດຊຽງລາຍ ແລະ ປູກຕົ້ນໄມ້ພະສີມະຫາໂພ ຫລື ຕົ້ນໂພ ຢູ່ວັດພະແກ້ວ ເພື່ອຄວາມຮົ່ມເຢັນເປັນສຸກ ຕາມຮອຍພະພຸດທະເຈົ້າ ຈາກນັ້ນໄດ້ເດີນທາງໄປຍັງແຂວງດຽນບຽນ ສສ ຫວຽດນາມ ເຊິ່ງມີໄລຍະທາງໄກຫລາຍກວ່າ 300 ກິໂລແມັດ ໂດຍຜ່ານຊາຍແດນ ຫ້ວຍຊາຍ-ຊຽງຂອງ ໄປແຂວງອຸດົມໄຊ, ວັດພູທາດ ໄຊມຸງຄຸນ ລັດຕະນະມິ່ງເມືອງ ຈັດພິທີໃສ່ບາດ ໂດຍມີທ່ານ ຄຳພຽງ ຢາຈົງວາ ຮອງເຈົ້າແຂວງອຸດົມໄຊ ແລະ ມວນຊົນແຂວງດັ່ງກ່າວເຂົ້າຮ່ວມ.

ທ່ານ ໂອວາດ ຈັນທະວົງ ປະທານແນວລາວສ້າງຊາດແຂວງອຸດົມໄຊ ໄດ້ກ່າວວ່າ: ພາຍຫລັງສະຖາປະນາ ເປັນ ສາທາລະນະລັດ ປະຊາທິປະໄຕ ປະຊາຊົນລາວ ຕະຫລອດໄລຍະ 44 ປີ ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະຢູ່ແຂວງອຸດົມໄຊ ອົງການພຸດທະສາສະໜາສຳພັນລາວ ກໍໄດ້ຮັບການປົກປັກຮັກສາ ແລະ ມີບົດບາດສູງຕໍ່ຈິດໃຈຂອງປະຊາຊົນບັນດາເຜົ່າ ແລະ ແມ່ນພາກສ່ວນໜຶ່ງ ທີ່ໄດ້ປະກອບສວນຢ່າງໃຫຍ່ຫລວງໃນການເຕົ້າໂຮມຄວາມສາມັກຄີເປັນປຶກແຜ່ນ;

ບັນດາພະພິຂຸສົງ ໄດ້ກາຍເປັນແວ່ນແຍງໃນການຝຶກຝົນຫລໍ່ຫລອມຄຸນສົມບັດສິນທຳປະຕິວັດໃຫ້ແກ່ປະຊາຊົນບັນດາເຜົ່າເປັນຢ່າງດີ; ໄດ້ກາຍເປັນແສງສະຫວ່າງເຍືອງທາງໃຫ້ຄົນຮຸ່ນຫລັງ ຜູ້ເກີດໃໝ່ໃຫຍ່ລຸນໄດ້ສ້າງຄຸນນະທຳ ແລະ ສືບທອດປົກປັກຮັກສາຄຸນງາມຄວາມດີ, ຮູ້ຈັກປະຕິບັດແນວທາງນະໂຍບາຍ ແລະ ເຄົາລົບລະບຽບກົດໝາຍເປັນຢ່າງດີຕະຫລອດມາ.

ໃນນາມອົງການປົກຄອງທ້ອງຖິ່ນ ແລະ ຕາງໜ້າປະຊາຊົນທົ່ວແຂວງອຸດົມໄຊ ສະແດງຄວາມພາດພູມໃຈ ແລະ ຍິນດີຕ້ອນຮັບຄະນະຜູ້ແທນພຸດທະສາສະໜາ ໃນໂຄງການທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ ທີ່ໄດ້ເລືອກເອົາແຂວງອຸດົມໄຊ ເປັນບ່ອນພັກ ແລະ ດຳເນີນກິດຈະກຳທາງສາສະໜາ.

medialaos