ພິທີເປິດງານແຂ່ງຂັນກິລາພະລະສຶກສາ ແລະ ປະກວດສິລະປະວັນນະຄະດີ ຂອງໂຮງຮຽນ ມສ.ອຸທຸມພອນ ເມືອງອຸທຸມພອນ ປະຈຳສົກຮຽນ 2019-2020 ໄດ້ຈັດຂຶ້ນຢ່າງເປັນທາງການ ໃນຕອນເຊົ້າຂອງວັນທີ 18 ຕຸລາ 2019 ທີ່ຜ່ານມາ ຢູ່ທີ່ເດີ່ນໂຮງຮຽນດັ່ງກ່າວ.

ໂດຍພາຍໃຕ້ການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ, ທ່ານ ໂພໄຊ ອິນທະວົງສາ ຮອງເຈົ້າເມືອງ ຜູ້ຊີ້ນຳວຽກງານວັດທະນະທຳສັງຄົມ, ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ-ກິລາແຂວງ, ທ່ານ ຄຳຈັນ ລຽນວົງສາ ຫົວໜ້າຫ້ອງການສຶກສາທິການ-ກິລາເມືອງ, ບັນດາທ່ານ ຫົວໜ້າຫ້ອງການ, ຄະນະຫ້ອງການ, ຄະນະອຳນວຍການໂຮງຮຽນ, ຄະນະອຳນາດການປົກຄອງບ້ານ, ສະມາຄົມພໍ່ແມ່ນັກຮຽນ, ຄູ-ອາຈານ ຕະຫຼອດຮອດນ້ອງນັກຮຽນພາຍໃນໂຮງຮຽນດັ່ງກ່າວເຂົ້າຮ່ວມ.

ໃນພິທີ ທ່ານ ອາຈານ ວັນລະຄອນ ເກດຕະວົງສາ ຫົວໜ້າໜ່ວນງານກິດຈະກຳຂອງໂຮງຮຽນ ກໍ່ໄດ້ລາຍງານແຜນການເຄື່ອນໄຫວກິດຈະກຳ ແຂ່ງຂັນກິລາພະລະສຶກສາ-ສິລະປະ ຂອງໂຮງຮຽນ ມສ.ອຸທຸມພອນ ປະຈຳ ສົກຮຽນ 2019-2020 ວ່າ: ສໍາລັບການແຂ່ງຂັນກິລາພະລະສຶກສາ ແມ່ນໄດ້ແບ່ງເປັນສອງສາຍຄື: ສາຍ ມ.ຕົ້ນ ແລະ ສາຍ ມ.ປາຍ ປະກອບມີ: ກິລາບານເຕະ ຊາຍ-ຍິງ ມ.ຕົ້ນ 24 ທີມ, ມ.ປາຍ 30 ທີມ, ບານສົ່ງໃນຮົ່ມ ແລະ ຫາດຊາຍ ຊາຍ-ຍິງ ມ.ຕົ້ນ 48 ທີມ, ມ.ປາຍ 60 ທີມ, ກະຕໍ່ ຊາຍ-ຍິງ ມ.ຕົ້ນ 24 ທີມ, ມ.ປາຍ 30 ທີມ, ບານບ້ວງ ຊາຍ-ຍິງ ມ.ຕົ້ນ 4 ທີມ, ມ.ປາຍ 6 ທີມ. ນອກນີ້ຍັງມີກິລາປະເພດອື່ນໆອີກ ທີ່ຈະໄດ້ແຂ່ງຂັນໃນທຸກໆ ລາຍການທີ່ໂຮງຮຽນຈັດຂຶ້ນ. ສ່ວນການແຂ່ງຂັນ ສິລະປະ-ວັນນະຄະດີ ແມ່ນມີ 5 ປະເພດແຂ່ງຂັນຄື:

ບົດຟ້ອນ, ລະຄອນເວທີ, ຮ້ອງເພງ, ຂັບລຳ ແລະ ການສະແດງດົນຕີ. ເຊິ່ງກິດຈະກຳແຂ່ງຂັນກິລາພະລະສຶກສາ-ສິລະປະ ຂອງໂຮງຮຽນ ມສ.ອຸທຸມພອນ ປະຈຳສົກຮຽນ 2019-2020 ຄາດວ່າ ຮອດກາງເດືອນເມສາ 2020 ແມ່ນໃຫ້ສຳເລັດ. ຈາກນັ້ນທ່ານ ໂພໄຊ ອິນທະວົງສາ ຮອງເຈົ້າເມືອງໆອຸທຸມພອນ ກໍ່ໄດ້ໃຫ້ກຽດມີຄຳເຫັນຕໍ່ພິທີ ແລະ ກ່າວເປີດງານແຂ່ງຂັນກິລາພະລະສຶກສາ ແລະ ປະກວດສິລະປະ-ວັນນະຄະດີ ຂອງໂຮງຮຽນ ມສ.ອຸທຸມພອນ ປະຈຳສົກຮຽນ 2019-2020. ເຊິ່ງຈຸດປະສົ່ງໃນການຈັດງານດັ່ງກ່າວ ກໍ່ເພື່ອເປັນການສ້າງຂະບວນການແຂ່ງວຽກງານພະລະ ແລະ ສິລະປະພາຍໃນໂຮງຮຽນ, ໃນແຕ່ລະຫ້ອງຮຽນ, ໃນແຕ່ລະຊັ້ນຮຽນ ແລະ ບຸກຄົນໃຫ້ເຂົ້າສູ້ຊີວິດຕົວຈິງ ແລະ ສາມາດຄັດເລືອກໄດ້ ຫ້ອງດີເດັ່ນ, ບຸກຄົນດີເດັ່ນ ປະຈຳສົກຮຽນ.

ນອກນັ້ນຍັງເປັນການປູກຈິດສຳນຶກໃຫ້ແກ່ນັກຮຽນໃນແຕ່ລະຫ້ອງ, ໃນແຕ່ລະຊັ້ນຮຽນໃຫ້ມີການພົ້ນເດັ່ນທາງດ້ານພະລະ ແລະ ສິລະປະ, ເຮັດໃຫ້ນັກຮຽນໄດ້ອອກກຳລັງກາຍຫຼິ້ນກິລາ ພ້ອມທັງເປັນການສ້າງຈິດສຳນຶກໃຫ້ນັກຮຽນໃນການຕ້ານ ແລະ ສະກັດກັ້ນປະກົດການຫຍໍ້ທໍ້ທາງດ້ານສິ່ງເສບຕິດພາຍໃນໂຮງຮຽນໃຫ້ໝົດໄປ, ສ້າງຄວາມສາມັກຄີໃຫ້ແກ່ນັກຮຽນພາຍ ໃນໂຮງຮຽນໃຫ້ໄດ້ມີການເຮັດກິດຈະກຳຮ່ວມກັນ, ມີການແລກປ່ຽນຄວາມຮູ້ຄວາມສາມາດເຊິ່ງກັນ ແລະ ກັນ. ໂດຍປະຕິບັດຕາມ 3 ລັກສະນະ ແລະ 5 ຫຼັກມູນການສຶກສາ, ແຜນພັດທະນາວຽກງານກິລາ-ກາຍະກຳ ແລະ ວຽກງານສິລະປະ-ວັນນະຄະດີ ຂອງໂຮງຮຽນ. ອັນພິເສດ ແມ່ນຍັງເປັນການສ້າງຂະບວນການຂຳນັບຮັບຕ້ອນ ໃຫ້ແກ່ກອງປະຊຸມ ໃຫຍ່ 3 ຂັ້ນຂອງພັກ ເວົ້າລວມ, ເວົ້າສະເພາະ ກໍ່ຄືກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງອຸທຸມພອນ ທີ່ຈະໄດ້ໄຂຂຶ້ນໃນມໍ່ໆນີ້ ໃຫ້ເປັນຂະບວນຟົດຟື້ນ.

ໂອກາດນີ້ ທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ກໍ່ໄດ້ໃຫ້ກຽດຕັດແທບຜ້າເປີດງານແຂ່ງຂັນກິລາພະລະສຶກສາ ແລະ ປະກວດສິລະປະ-ວັນນະຄະດີ ຂອງໂຮງຮຽນ ມສ.ອຸທຸມພອນ ປະຈຳສົກຮຽນ 2019-2020 ຢ່າງເປັນທາງການ.

ຂ່າວ: ພອນປະເສີດ ແຜນພັກດີ
Medialaos