ໃນຕອນເຊົ້າ ຂອງ ວັນທີ 18 ຕຸລາ 2019 ນີ້, ເມືອງຮົ່ມ ແຂວງໄຊສົມບູນຈັດພິທີປະກາດຈົບຊັ້ນມັດທະຍົມສຶກສາຕອນຕົ້ນບຳລຸງ ທົ່ວເມືອງຂື້ນ ທີ່ສະໂມສອນຂອງເມືອງ. ໂດຍການເປັນປະທານຮ່ວມຂອງທ່ານ ຮສ ປອ ຄຳຜາຍ ສີສະຫວັນ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ແດງ ປະທຸມທອງ, ຮອງເຈົ້າແຂວງໄຊສົມບູນ ແລະ ທ່ານ ບົວພັນ ວັນດາວົງ, ເຈົ້າເມືອງໆຮົ່ມ, ມີພະແນກການທີ່ກ່ຽວຂ້ອງອ້ອມຂ້າງແຂວງ, ການນຳເມືອງທັງ 5 ເມືອງ, ຕາງໜ້າຫ້ອງການສຶກສາທິການ ແລະ ກິລາ ເມືອງ ທົ່ວແຂວງ ແລະ ແຂກຖືກເຊີນ ພ້ອມດ້ວຍຄູອາຈານ ແລະ ນັກຮຽນຈົບບຳລຸງ ຕະຫລອດຮອດອຳນາດການປົກຄອງບ້ານ ທົ່ວເມືອງເຂົ້າຮ່ວມ.
ໃນພິທີ ທ່ານ ຢ່າກົວເຮີ່, ຫົວໜ້າຫ້ອງການສຶກສາທິການ ແລະ ກິລາເມືອງຮົ່ມ ໄດ້ຂຶ້ນຜ່ານບົດສະຫລຸບການຈັດຕັ້ງປະຕິບັດ ການຮຽນການສອນ ຈົບຊັ້ນມັດທະຍົມສຶກສາຕອນຕົ້ນບຳລຸງ ທົ່ວເມືອງ ແລະ ທິດທາງແຜນການໃນຕໍ່ໜ້າ ຊຶ່ງຕະຫລອດໄລຍະທີ່ຜ່ານມາ ວຽກງານການສຶກສາຂອງເມືອງໄດ້ມີການຂະຫຍາຍຕົວຢ່າງຕໍ່ເນື່ອງ ໂດຍມີການຂະຫຍາຍຕາງໜ່າງການສຶກສາທາງໃນ ແລະ ນອກໂຮງຮຽນ ໄປພ້ອມໆກັນ ຊຶ່ງການນຳເມືອງ ຫ້ອງການສຶກສາທິການ ແລະ ກິລາເມືອງ ໄດ້ປະສານສົບທົບ ກັບອຳນາດການປົກຄອງບ້ານຈັດຕັ້ງປະຕິບັດຂະບວນການຍົກສູງລະດັບການສຶກສາຊັ້ນມັດທະຍົມຕອນຕົ້ນບຳລຸງ ໃຫ້ແຕ່ລະບ້ານ ເລີ່ມຈັດຕັ້ງປະຕິບັດມາແຕ່ ປີ 2015 ເປັນຕົ້ນມາ ຮອດປີ 2019.

ມາຮອດປັດຈຸບັນ ແມ່ນໄດ້ສໍາເລັດການຮຽນການສອນຈົບຊັ້ນມັດທະຍົມສຶກສາຕອນຕົ້ນບຳລຸງ ໃຫ້ປະຊາຊົນເປັນທີ່ຮຽບຮ້ອຍ ຊຶ່ງທົ່ວເມືອງມີປະຊາກອນໃນກຸ່ມເປົ້າໝາຍ ໃນເກນອາຍຸ 15-35 ປີ ຈຳນວນ 414 ຄົນ, ຍິງ 293 ຄົນ, ໄດ້ເຂົ້າຮຽນທັງໝົດ 395 ຄົນ, ຍິງ 277 ຄົນ, ພາຍຫລັງສຳເລັດການຈັດຕັ້ງການຮຽນ-ການສອນບໍາລຸງຈົບຊັ້ນມັດທະຍົມສຶກສາຕອນຕົ້ນ ໃນຂອບເຂດທົ່ວເມືອງແລ້ວ ຫ້ອງການສຶກສາທິການ ແລະ ກິລາເມືອງ ໄດ້ກໍານົດເອົາ 5 ບ້ານ ເປັນຕົວແທນເພື່ອປະເມີນຜົນ ເຊິ່ງມີຜູ່ເຂົ້າຮ່ວມການປະເມີນທັງໝົດ 146 ຄົນ, ຜົນການປະເມີນຜ່ານມີ 139 ຄົນ, ຍິງ 106 ຄົນ, ເທົ່າກັບ 95,20 ສ່ວນຮ້ອຍ, ປະເມີນບໍ່ຜ່ານ 7 ຄົນ. ໃນໂອກາດດັ່ງກ່າວ ທ່ານ ຮສ ປອ ຄຳຜາຍ ສີສະຫວັນ, ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ມອບໃບຢັ້ງຢືນປະກາດຮັບ-ຮອງເອົາເມືອງຮົ່ມ ເປັນເມືອງຈົບຊັ້ນມັດທະຍົມສຶກສາຕອນຕົ້ນບຳລຸງໂດຍໃຫ້ກຽດກ່າວຮັບ ຂອງທ່ານ ບົວພັນ ວັນດາວົງ, ເຈົ້າເມືອງໆຮົ່ມ ພ້ອມກັນນີ້ຍັງໄດ້ມີການມອບໃບປະກາສະນິຍະບັດໃຫ້ແກ່ນັກຮຽນທີ່ຮຽນຈົບບຳລຸງ ໃນຄັ້ງນີ້ ແລະ ມອບໃບຍ້ອງຍໍໃຫ້ແກ່ນາຍບ້ານ ແລະ ບັນດາຄູສອນ ຜູ່ທີ່ມີຜົນງານດີເດັ່ນ ໃນທົ່ວເມືອງ.

ໃນໂອກາດທີ່ມີຄວາມໝາຍຄວາມສຳຄັນນີ້ ຍັງໄດ້ຮັບຟັງຄຳໂອ້ລົມ ແລະ ຊີ້ນຳວຽກງານ ຈາກທ່ານ ຮສ ປອ ຄຳຜາຍ ສີສະຫວັນ, ຮອງລັດຖະມົນຕີ ກະຊວງສຶກສາທິການ ແລະ ກິລາ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນຳທຸກຂັ້ນ ແລະ ທຸກພາກສ່ວນທີ່ມີສ່ວນຮ່ວມ ເຮັດໃຫ້ການເຄື່ອນໄຫວວຽກງານການສຶກສາຈົບຊັ້ນມັດທະຍົມຕອນຕົ້ນບຳລຸງໃນຄັ້ງນີ້ ປະສົບຜົນສຳເລັດ ແລະ ທ່ານຍັງໄດ້ເນັ້ນໜັກໃຫ້ຜູ້ບໍລິຫານການສຶກສາ ຕ້ອງເອົາໃຈໃສ່ອົບຮົມການເມືອງແນວຄິດໃຫ້ແກ່ຄູອາຈານ ແລະ ນັກຮຽນເປັນປົກກະຕິ, ປະສານສົມທົບກັບອຳນາດການປົກຄອງທ້ອງຖິ່ນ ທຸກພາກສ່ວນ ໃຫ້ເຂົ້າຮ່ວມໃນການປະຕິຮູບ ແລະ ພັດທະນາການສຶກສາໃຫ້ຫລາຍຂື້ນ ແລະ ດີກວ່າເກົ່າ ເພາະວ່າການສຶກສາເປັນກຸນແຈທີ່ສຳຄັນໃນການພັກດທະນາປະເທດຊາດໃຫ້ຈະເລີກ້າວໜ້າ ແນ່ໃສ່ເພື່ອໃຫ້ປະຊາຊົນຫລຸດພົ້ນອອກຈາກການກືກໜັງສື ແລະ ເປັນເງື່ອນໄຂອຳນວຍຄວາມສະດວກໃນການສ້າງສາພັດທະນາເສດຖະກິດຄອບຄົວ ເພື່ອໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ. ຈາກນັ້ນ ຄະນະປະທານໄດ້ພ້ອມກັນຕັດແຖບຜ້າ, ເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນ ໃນການປະກາດຈົບຊັ້ນມັດທະຍົມສຶກສາຕອນຕົ້ນບໍາລຸງ ທົ່ວເມືອງຮົ່ມ ຢ່າງເປັນທາງການ.

ພາບ: ນາງ ຕູດ ຄຳພໍໃຈ
ຂ່າວ: ສຸກສັນ ອ້ວນລິທິກຸນ
Medialaos