ໃນທ້າຍອາທິດທີ່ຜ່ານມານີ້ ໂຮງຮຽນ ປກສ ຊັ້ນສູງ ເລກ III ແຂວງສະຫວັນນະເຂດ ໄດ້ຈັດພິທີເປີດຊຸດຮຽນລະບົບກໍ່ສ້າງຮຸ່ນທີII ສົກຮຽນ 2019-2021 ແລະ ລະບົບບຳລຸງວິຊາສະເພາະປ້ອງກັນຄວາມສະຫງົບ3ເດືອນຮຸ້ນທີ14ໄດ້ໄຂຂື້ນ ໃນວັນທີ 18 ຕຸລາ 2019 ໂດຍການເຂົ້າຮ່ວມເປັນປະທານຂອງ ທ່ານ ພັອ ລຳຄູນ ວໍລະວົງ ຮອງຫົວໜ້າກອງບັນຊາການ ປກສ ແຂວງສະຫວັນນະເຂດ,ທ່ານ ພັທ ບຸນອວນ ພານຸວົງ ຮອງອຳນວຍການໂຮງຮຽນ ປກສ ຊັ້ນສູງເລກ3,ມີຫົວໜ້າຫ້ອງ-ຮອງຫ້ອງ,ຄະນະພະແນກ,ຄູອາຈານ,ນັກສຶກ,ນັກສຳມະນາກອນແລະແຂກຖືກເຊີນເຂົ້າຮ່ວມ.

ໃນພິທີທ່ານ ພັທ ບຸນເລີດ ຄະທຸມພົມ ຫົວໜ້າຫ້ອງການເມືອງ ປກສແຂວງ ໄດ້ຂື້ນຜ່ານຂໍ້ຕົກລົງ ຂອງລັດຖະມົນຕີກະຊວງປ້ອງກັນຄວາມສະຫງົບ ເລກທີ 3525/ກມປສ ວ່າດ້ວຍການອະນຸມັດເປີດຊຸດຮຽນໃຫ້ແກ່ນັກຮຽນຮຸ່ນທີ2 ໂຮງຮຽນ ປກສ ຊັ້ນສູງເລກ3 ກອງບັນຊາການ ປກສ ແຂວງສະຫວັນນະເຂດ ແລະ ຂໍ້ຕົກລົງ ເລກທີ 2913/ກມປສ ວ່າດ້ວຍການອະນຸມັດໃຫ້ໂຮງຮຽນ ປກສ ຊັ້ນສູງເລກ3 ກອງບັນຊາການ ປກສ ແຂວງສະຫວັນນະເຂດ ເປີດຊຸດຮຽນບຳລຸງວິຊາສະເພາະ ປ້ອງກັນຄວາມສະຫງົບລະບົບ 3ເດືອນຮຸ່ນທີ14ປະຈຳປີ 2019-10-21 ເພື່ອເປັນການປະຕິບັດຕາມແນວທາງນະໂຍບາຍຂອງພັກ,ລະບຽບກົດໝາຍຂອງລັດໃຫ້ໄດ້ຮັບຜົນສຳເລັດໂດຍສະເພາະໃນເງື່ອນໄຂສະພາບການໃໝ່ແລະຈໍາເປັນໃນຖັນແຖວພະນັກງານ-ນັກຮົບໃນກຳລັງປ້ອງກັນຄວາມສະຫງົບ ໃຫ້ມີຄຸນທາດການເມືອງໜັກແໜ້ນ,ມີຄຸນສົມບັດສິນທຳປະຕິວັດ,ມີຄວາມຮູ້ຄວາມສາມາດສູງ,ການເຕີບໃຫ່ຍຂະຫຍາຍຕົວທາງດ້ານເສດຖະກິດ-ສັງຄົມ,ການປົກປັກຮັກສາແລະສ້າງສາພັດທະນາປະເທດຊາດແລະຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃໝ່ໃນປະຈຸບັນກໍ່ຄື ສະເພາະໜ້າແລະຍາວນານໃນໜ້າທີ່ວຽກງານວິຊາສະເພາະປ້ອງກັນຄວາມສະຫງົບ ລະບົບບໍາລຸງ 3ເດືອນຮຸ່ນທີ14ແລະລະບົບຊັ້ນສູງ 2ປີຮຸ່ນທີ2 ປີ2019 ໃຫ້ມີຄວາມເຕີບໃຫ່ຍຂະຫຍາຍຕົວດ້ວຍທ່ວງທ່າບາດກ້າວອັນໜັກແໜ້ນ ເຂັ້ມແຂງນັບທັງດ້ານປະລິມານ ແລະ ຄຸນນະພາບ, ທາງດ້ານທິດສະດີການເມືອງ, ວິຊາສະເພາະ, ພາສາຕ່າງປະເທດຢ່າງເປັນລະບົບແລະຕໍ່ເນື່ອງສາມາດຮັບໃຊ້ວຽກງານວິຊາສະເພາະໃນແຕ່ລະໄລຍະໄດ້ເປັນຢ່າງດີ.

ຂ່າວ: ອຸໄທ ເສນສອນ
Medialaos