ກອງພັນເຄື່ອນທີ່ກອງບັນຊາການ ປກສ ແຂວງສະຫວັນນະເຂດ ໄດ້ຈັດກອງປະຊຸມແລກປ່ຽນຖອດຖອນບົດຮຽນວຽກງານປ້ອງກັນເຄື່ອນທີ່ໃນທ້າຍອາທິດທີ່ຜ່ານມານີ້, ເຂົ້າຮ່ວມໂດຍ ພັອ ພູນສະຫວັນ ພັນທະເສນາ ຮອງຫົວໜ້າກອງບັນຊາການປ້ອງກັນເຄື່ອນທີ່ ກະຊວງ ປກສ ພ້ອມຄະນະ, ມີພັທ ບົວສອນ ແສງສະຫວ່າງ ຫົວໜ້າກອງພັນ ປ້ອງກັນເຄື່ອນທີ່ ປກສ ແຂວງ, ມີຄະນະພັກ, ຄະນະບັນຊາ, ຄະນະຫ້ອງ,ກອງອ້ອມຂ້າງກອງບັນຊາການ,ມີແຂກຮັບເຊີນ ແລະ ພະນັກງານຫຼັກແຫຼ່ງພາຍໃນກອງພັນເຄື່ອນທີ່ເຂົ້າຮ່ວມ.

ໃນພິທີ ທ່ານ ພັທ ບົວສອນ ແສງສະຫວ່າງ ຫົວໜ້າກອງພັນເຄື່ອນທີ່ກອງບັນຊາການ ປກສ ແຂວງສະຫວັນນະເຂດ,ໄດ້ລາຍງານຕໍ່ກອງປະຊຸມວ່າ: ໃນ 6 ເດືອນຕົ້ນປີ2019 ຄະນະພັກ-ຄະນະບັນຊາກອງພັນປ້ອງກັນເຄື່ອນທີ່ພວກເຮົາໄດ້ເອົາໃຈໃສ່ສຶກສາອົບຮົມການເມືອງ-ແນວຄິດເປັນປົກກະຕິ ເພື່ອເຮັດໃຫ້ພະນັກງານ-ນັກຮົບຂັ້ນກອງຮ້ອຍ, ໝວດ -ໝູ່ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ, ປະຕິບັດມະຕິຄຳສັ່ງ, ລະບຽບຂອງພັກ, ກົດໝາຍຂອງລັດ ແລະ ລະບຽບຂອງກຳລັງປກສ ກໍຄືຂອງກອງບັນຊາການ ປກສ ແຂວງ ວາງອອກໃຫ້ປະກົດຜົນເປັນຈິງ, ຮັກສາທາດແທ້ຂອງກຳລັງເຫຼົ່າຮົບວິຊາສະເພາະທີ່ໄດ້ຮັບຄວາມໄວ້ເນື້ອເຊື່ອໃຈຈາກພັກ-ລັດ ແລະ ປະຊາຊົນບັນດາເຜົ່າ,ໄດ້ຈັດຕັ້ງການຝຶກແອບຝຶກຊ້ອມ ວິຊາສະເພາະ,ການນຳໃຊ້ອາວຸດກະຊຸນ,ອຸປະກອນພາຫະນະຕ່າງໆ ,ໃນການເຂົ້າຮ່ວມ ແກ້ໄຂກໍລະນີເກີດຂຶ້ນໃນສັງຄົມ,ການປ້ອງກັນເວນຍາມ,ການປ້ອງກັນກອງປະຊຸມ,ແຂກການນຳພັກ-ລັດ, ໃຫ້ມີຄວາມສະຫງົບ-ຄວາມເປັນລະບຽບຮຽບຮ້ອຍ, ເຊິ່ງສະແດງອອກໃນໜ້າທີ່ວຽກງານວິຊາເພາະຄື: ປ້ອງກັນການເຄື່ອນຍ້າຍວັດຖຸມີຄ່າ ມີ 2,840ຄັ້ງ,ໄດ້ອອກກວດກາລາດຕະເວນໃນເທດສະບານນະຄອນໄກສອນ ພົມວິຫານ ໄດ້ 150 ຄັ້ງ, ປ້ອງກັນເວນຍາມວັນສຳຄັນຕ່າງໆຂອງຊາດ-ຂອງພັກໄດ້ 13ຄັ້ງ,ປ້ອງກັນແຂກພາຍໃນ ແລະຕ່າງປະເທດໄດ້ 11 ຄັ້ງ,ຈັດກຳລັງກຽດຕິຍຸດເຂົ້າຮ່ວມວາງພວກມາລາ ແລະ ກະຕ່າດອກໄມ້ໃນວັນສຳຄັນຂອງຊາດ-ຂອງພັກໄດ້ 7ຄັ້ງ, ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ປະກອບຄຳຄິດຄຳເຫັນແລກປ່ຽນຖອດຖອນບົດຮຽນເຊິ່ງກັນແລະກັນ ໂດຍສະເພາະແມ່ນວຽກງານສຶກສາອົບຮົມການເມືອງ-ແນວຄິດແກ່ພະນັກງານ-ນັກຮົບຢ່າງຕໍ່ເນື່ອງ ແລະປົກກະຕິ,ໃຫ້ກຳລັງປະກອບອາວຸດໃນການປ້ອງກັນເວນຍາມຕາມສຳນັກງານ,ອົງການຈັດຕັ້ງຂອງພັກ-ລັດ,ກົງສູນ,ທະນາຄານ,ຫ້ອງການປົກຄອງ,ບໍລິສັດ ແລະ ຮ່າງຮ້ານຕ່າງໆ,ກຳລັງວິຊາສະເພາະຂອງພວກເຮົາໃຫ້ຈິ່ງໃຈສື່ຊັດຕໍ່ໜ້າທີ່, ຝຶກແອບຝຶກຊ້ອມວິຊາສະເພາະໃຫ້ເປັນເອກະພາບໃນການປະຕິບັດໜ້າທີ່,ໃຫ້ມີຄວາມສາມັກຄີເຊິ່ງກັນ ແລະກັນ ແລະ ເພີ່ມທະວີວຽກງານປ້ອງກັນສຳນັກງານອົງການ,ບັນດາເຮືອນການນຳພັກ-ລັດ,ແຂກພາຍໃນ ແລະຕ່າງປະເທດທີ່ເຂົ້າມາທ່ອງທ່ຽວ-ເຄື່ອນໄຫວເຮັດວຽກພາຍໃນແຂວງໃຫ້ມີຄວາມປອດໄພ ແລະເປັນລະບຽບຮຽບຮ້ອຍດີ.

ພາບ:ຂ່າວ ປກສ ແຂວງສະຫວັນນະເຂດ
Medialaos