ໃນລະຫວ່າງວັນທີ 18 ຕຸລາ 2019 ຜ່ານມານີ້ຢູ່ທີ່ສະໂມສອນຂອງເມືອງພີນ ຄະນະບໍລິຫານງານສະຫະພັນເມືອງພີນໄດ້ສໍາເລັດກອງປະຊຸມໃຫຍ່ ຄັ້ງທີ IX ຂອງຕົນຢ່າງເປັນທາງການ ໂດຍພາຍໃຕ້ການເຂົ້າຮ່ວມເປັນຄະນະປະທານຂອງ ທ່ານ ສາລີ ວິນລາວັນ ເຈົ້າເມືອງໆພີນ, ທ່ານ ນາງ ວຽງສະໝອນ ພະທິທັກ ຮອງເລຂາໜ່ວຍພັກ ຮອງປະທານສະຫະພັນແມ່ຍິງແຂວງສະຫວັນນະເຂດ ມີຄະນະປະຈໍາພັກເມືອງ, ກໍາມະການພັກເມືອງ, ຄະນະປະທານສະຫະພັນແມ່ຍິງ 4 ຕົວເມືອງອ້ອມຂ້າງເມືອງພີນມີເມືອງພະລານໄຊ, ເຊໂປນ, ວິລະບູລີ ແລະ ເມືອງນອງກໍ່ໄດ້ເຂົ້າຮ່ວມ, ມີບັນດາພະນັກງານອາວຸໂສບໍານານແຂກຖືກເຊີນທັງໝົດຈໍານວນ 142 ທ່ານ ຍິງ 104 ທ່ານ, ໃນນີ້ມີຜູ້ແທນສົມບູນ 95 ທ່ານ ເຊີ່ງເປັນຕົວແທນໃຫ້ແກ່ສະມາຊິກສະຫະພັນແມ່ຍິງຈໍານາວນ 22.508 ຄົນ.

ໃນພິທີກໍ່ໄດ້ຮັບຟັງບົດລາຍງານການເມືອງຕໍ່ກອງປະຊຸມໃຫຍ່ຄັ້ງທີ IX ຂອງຄະນະບໍລິຫານງານສະຫະພັນແມ່ຍິງເມືອງພີນໃນໄລຍະຜ່ານມາ. ໃນນັ້ນ, ແມ່ນມີຫຼາຍຜົນງານໂດດເດັ່ນເປັນຕົ້ນກໍ່ແມ່ນວຽກງານສຶກສາອົບຮົມການເມືອງ – ແນວຄິດເຊີ່ງສະແດງອອກຄື ໄດ້ເຊື່ອມຊືມເອກະສານການເມືອງ, ແນວທາງນະໂຍບາຍຂອງພັກລະບຽບກົດໝາຍຂອງລັດ, ມະຕິກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ VIII ຂອງອົງຄະນະພັກແຂວງ, ຄັ້ງທີ VII ຂອງສູນກາງສະຫະພັນແມ່ຍິງລາວ, ຄັ້ງທີ IX ຂອງສະຫະພັນແມ່ຍິງແຂວງ, ຄັ້ງທີ X ຂອງອົງຄະນະພັກເມືອງກໍຄືຄັ້ງທີ VIII ຂອງສະຫະພັນແມ່ຍິງເມືອງພີນ ແລະ ແຜນພັດທະນາແມ່ຍິງເມືອງ,

ພ້ອມນັ້ນ ຍັງໄດ້ເຂົ້າຮ່ວມຮັບຟັງປາຖະກະຖາ ແລະການເຜີຍແຜ່ເອກະສານຕ່າງໆໄດ້ຫຼາຍຄັ້ງມີຜູ້ເຂົ້າຮ່ວມທັງໝົດ 32.548 ເທື່ອຄົນ ຍິງ 29.320 ເທື່ອຄົນ. ໃນພິທີດັ່ງກ່າວກໍ່ໄດ້ມີການມອບ – ຮັບໃບຍ້ອງຍໍ ແລະໃບສັນລະເສີນໃຫ້ກົມກອງ, ບຸກຄົນດີເດັ່ນໄລຍະ 5 ປີຕື່ມອີກ. ຈາກນັ້ນ ໃນພິທີກໍ່ໄດ້ມີການປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງເມືອງພີນຊຸດໃໝ່ ເຊີ່ງຜົນປະກົດວ່າ: ທ່ານ ນາງ ບຸນລອງ ແກ້ວຕະວົງພົມມາ ຄະນະປະຈໍາພັກເມືອງໄດ້ຮັບຄວາມໄວ້ເນື້ອເຊື່ອໃຈຈາກບັນດາຜູ້ແທນກອງປະຊຸມໃຫຍ່ຈໍານວນ 95 ທ່ານ ໄດ້ເປັນປະທານສະຫະພັນແມ່ຍິງເມືອງພີນ, ທ່ານ ນາງ ຄໍາຫຼ້າ ສະຫວັນໄຊ ເປັນຮອງປະທານ, ທ່ານ ນາງ ບຸນທົງ ຄໍາສະຫວັດ ເປັນຮອງປະທານທັງເປັນປະທານກວດກາ ແລະ ອີກ 20 ທ່ານ ເປັນກໍາມະການ.

Medialaos