ຂະບວນ ທຳມະຍາຕາ 5 ແຜ່ນດິນລຸ້ມແມ່ນໍ້າຂອງ ເຊິ່ງປະກອບມີ: ສປປ ລາວ, ຣາຊະອານາຈັກໄທ, ມຽນມາ, ສສ ຫວຽນາມ ແລະ ກຳປູເຈຍ ໄດ້ເດີນທາງມາເຖິງແຂວງດຽນບຽນ ແລະ ຈະເຄື່ອນໄຫວຢູ່ ສສ ຫວຽດນາມ ໃນລະຫວ່າງວັນທີ 20-22 ຕຸລາ 2019 ໂດຍມີ ທ່ານ ລີວັນສິງ ເລຂາທິການພຸດທະສະມາຄົມ ແຂວງດຽນບຽນ ພ້ອມຄະນະຮັບຕ້ອນຢູ່ຊາຍແດນລາວ-ຫວຽດນາມ(ໄຕຈາງ-ສົບຮຸນ) ເຊິ່ງໃນຕອນຄໍ່າວັນທີ 20 ຕຸລາ ນີ້ ຂະບວນດັ່ງກ່າວໄດ້ເດີນທາງເຂົ້າຮ່ວມ ພິທີເປີດວັດທະນະທຳຊົນເຜົ່າໄຕດຳ-ໄຕແດງ ຢູ່ແຂວງດຽນບຽນ.

ໃນລະຫວ່າງເຄື່ອນໄຫວຢູ່ແຂວງດຽນບຽນ ວັນທີ 21 ຕຸລາ ນີ້, ຂະບວນທຳມະຍາຕາ ໄດ້ອອກເດີນທາງໄປວັດ ຫລິນກວາງ ເລີ່ມຂະບວນທຳມະຍາຕາ ໄລຍະທາງ 300 ແມັດ ເຂົ້າສູ່ວັດສາສະໜາພຸດ ໂດຍມີພິທີມອບທຳມະຈັກ, ສູດມົນ, ປູກຕົ້ນໄມ້ພະສີມະຫາໂພ ຫລື ຕົ້ນໂພ ແລະ ບິນທະບາດພາຍໃນວັດ ທ່ານ ລີວັນສິງ ເລຂາທິການພຸດທະສະມາຄົມ ແຂວງດຽນບຽນ ໃຫ້ຮູ້ວ່າ: ວັດຫລິນກວາງ ເປັນສູນກາງພຸດທະສະຖານ ເຊິ່ງສ້າງຕັ້ງຂື້ນໃນປີ 2014 ຮູບແບບການກໍ່ສ້າງ ແມ່ນມາຈາກຊົນເຜົ່າໄຕ ຫ່າງຈາກສຸສານວິລະບູລຸດສົງຄາມ 2 ກິໂລແມັດ ພຸດທະສະຖານແຫ່ງນີ້ ສ້າງຂື້ນເພື່ອເປັນການລະນຶກເຖິງວິລະບູລຸດສົງຄາມທີ່ສະຫລະຊີວິດ ເພື່ອປົກປ້ອງປະເທດ, ຈາກນັ້ນກໍໄດ້ເດີນທາງໄປວັດຫລິນເຊິນ, ຢ້ຽມຊົມສານເຈົ້າແຖນບານຟູ ແລະ ພິພິທພັນດຽນບຽນຟູ. ພ້ອມກັນນີ້, ຝ່າຍຄາລະວາດ ກໍໄດ້ມອບຢາ ແລະ ອຸປະກອນການແພດ ໃຫ້ສາທາລະນະສຸກ ແຂວງດຽນບຽນ.

ພາຍຫລັງສຳເລັດກິດຈະກຳຕ່າງໆ ຢູ່ແຂວງດຽນບຽນແລ້ວ, ວັນທີ 22 ຕຸລາ 2019 ຂະບວນທຳມະຍາຕາ 5 ແຜ່ນດິນ ກໍໄດ້ເດີນທາງກັບໄປ ແຂວງຫລວງພະບາງ ສປປ ລາວ ຜ່ານຊາຍແດນໄຕຈາງ-ສົບຮຸນ ເພື່ອດຳເນີນກິດຈະກຳທາງສາສະໜາຕໍ່.

Medialaos