ກອງປະຊຸມໃຫຍ່ ຄັ້ງທີ I ຂອງຄະນະຮາກຖານພັກກອງບັນຊາການ ປກສ ເມືອງອຸທຸມພອນ ໄດ້ໄຂຂຶ້ນ ແລະ ອັດລົງຢ່າງຈົບງາມ ໃນຕອນເຊົ້າຂອງວັນທີ 22 ຕຸລາ 2019ນີ້ ຢູ່ທີ່ສະໂມສອນຂອງເມືອງ ໂດຍພາຍໃຕ້ການເຂົ້າຮ່ວມເປັນປະທານຂອງ ສະຫາຍ ປະສົງສິນ ຈະເລີນສຸກ ກຳມະການພັກແຂວງ ເລຂາພັກເມືອງ ເຈົ້າເມືອງໆອຸທຸມພອນ, ສະຫາຍ ພັນເອກ ລຳຄູນ ວໍລະວົງ ຮອງເລຂາຄະນະພັກກອງບັນຊາການ ປກສ ແຂວງ, ສະຫາຍ ຄຳເຫວີຍ ເພັງພະຈັນ ປະທານກວດກາພັກ-ລັດເມືອງ. ຈາກນີ້ກໍ່ມີບັນດາສະຫາຍ ເລຂາໜ່ວຍພັກ, ຄະນະໜ່ວຍພັກ, ແຂກຖືກເຊີນ ຕະຫຼອດຮອດສະມາຊິກພັກຜູ້ແທນສົມບູນເຂົ້າຮ່ວມ 109 ສະຫາຍ, ຍິງ 23 ສະຫາຍ.

ຕໍ່ກອງປະຊຸມ ພາຍຫຼັງທີ່ສະຫາຍ ພັນໂທ ບຸນເດັດ ແສນລາດ ຮັກສາການເລຂາຄະນະພັກຮາກຖານ ກອງບັນຊາການ ປກສ ເມືອງ ກ່າວໄຂກອງປະຊຸມຢ່າງເປັນທາງການ. ສະຫາຍ ພັນໂທ ສວນ ໄຊຍະລິນ ຮອງເລຂາພັກຮາກຖານ ກໍ່ໄດ້ຜ່ານບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ I ຂອງຄະນະຮາກຖານພັກກອງບັນຊາການ ປກສ ເມືອງອຸທຸມພອນ ວ່າ : ຕະຫຼອດໄລຍະຜ່ານມາ ຄະນະພັກ-ຄະນະບັນຊາ ໄດ້ເລັ່ງໃສ່ຄວາມເປັນລະບຽບ ຮຽບຮ້ອຍຂອງສັງຄົມ ໂດຍຕິດພັນກັບການຫັນທິດລົງຮາກຖານກຸ່ມບ້ານ, ກຳແໜ້ນບັນດາເປົ້າໝາຍຕ່າງໆທີ່ເຂົ້າມາເຄື່ອນໄຫວພາຍໃນເມືອງ ໂດຍສະເພາະເລັ່ງໃສ່ເປົ້າໝາຍທາງດ້ານການເມືອງ, ເປົ້າໝາຍຄົນຕ່າງປະເທດທີ່ເຂົ້າມາເຄື່ອນໄຫວພັກເຊົາ, ເຮັດທຸລະກິດ, ຄ້າຂາຍ, ທ່ອງທ່ຽວ ແລະ ຢ້ຽມຢາມ, ເອົາໃຈໃສ່ກວດກາຄຸ້ມຄອງຄົນເຂົ້າ-ອອກເມືອງ.

ນອກຈາກນີ້ ທາງເຈົ້າໜ້າທີ່ ຍັງເອົາໃຈໃສ່ຕິດຕາມຕໍ່ກັບກຸ່ມຄົນບໍ່ດີ ທີ່ເຂົ້າມາເຄື່ອນໄຫວ ໂຄສະນາສ້າງຄວາມປັ່ນປ່ວນ, ສ້າງຄວາມແຕກແຍກ, ໃສ່ຮ້າຍປ້າຍສີຕໍ່ການນຳພາຂອງພັກ-ລັດ, ສິ່ງໜື່ງອີກ ກໍ່ແມ່ນບັນຫາການເຄື່ອນໄຫວສວຍໃຊ້ສາສະໜາຕ່າງປະເທດ ເປັນສາກບັງໜ້າ ຜ່ານມາ ກໍ່ປະກົດເຫັນການເຄື່ອນໄຫວທີ່ບໍ່ຖືກຕ້ອງ ເປັນຕົ້ນການສ້າງໂບດ ທີ່ບໍ່ໄດ້ຮັບອະນຸຍາດ, ການເຕົ້າລວມບໍ່ຖືກສະຖານທີ່ ອັນສ້າງຄວາມຫຍຸ້ງຍາກໃຫ້ແກ່ການຄຸ້ມຄອງຂອງອຳນາດການປົກຄອງທ້ອງຖິ່ນ ແລະ ວຽກງານດ້ານອື່ນໆກໍ່ໄດ້ເອົາໃຈໃສ່ເຊັ່ນດຽວກັນ. ນອກນັ້ນໃນກອງປະຊຸມ ບັນດາຜູ້ແທນສົມບູນກໍ່ຍັງໄດ້ເປັນເອກະພາບກັນໃຊ້ສິດປະຊາທິປະໄຕອັນເຕັມສ່ວນ ເພື່ອປ່ອນບັດເລືອກຕັ້ງເອົາຄະນະພັກຮາກຖານຊຸດໃໝ່ ບົນພື້ນຖານຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດ ເຊິ່ງມີຜູ້ສະໝັກທັງໝົດ 9 ສະຫາຍ, ຍິງ 1 ສະຫາຍ.

ຜ່ານການປ່ອນບັດລົງຄະແນນສຽງ ແລະ ຜ່ານກອງປະຊຸມຄັ້ງປະຖົມມະເລິກ ໄດ້ເຫັນດີຕົກລົງຮັບຮອງເອົາສະຫາຍ ພັນໂທ ບຸນເດັດ ແສນລາດ ເປັນເລຂາຄະນະພັກຮາກຖານ ຊຸດໃໝ່, ເຫັນດີຕົກລົງຮັບຮອງເອົາສະຫາຍ ພັນໂທ ສວນ ໄຊຍະລິນ ເປັນຮອງເລຂາ ແລະ ເຫັນດີຕົກລົງຮັບຮອງເອົາສະຫາຍ ພັນໂທ ສຸວັນນີ ໄຊຍະເສນ, ສະຫາຍ ພັນໂທ ພຸດທະວົງ ອິນທິສານ, ສະຫາຍ ພັນໂທ ສຸກສຳລານ ໝື່ນແກ້ວມຸງຄຸນ, ສະຫາຍ ພັນໂທ ຍອຍ ວົງໄຊຍະລາດ ແລະ ສະຫາຍ ພັນຕີ ນວນແພງ ແສນທະວົງ ເປັນກຳມະການ. ນອກນັ້ນກອງປະຊຸມຍັງໄດ້ເຫັນດີຕົກລົງເລືອກເອົາສະຫາຍ ພັນໂທ ສຸກສຳລານ ໝື່ນແກ້ວມຸງຄຸນ ເປັນປະທານກວດກາຄະນະພັກຮາກຖານ ແລະ ເຫັນດີຕົກລົງເລືອກເອົາສະຫາຍ ພັນໂທ ຄຳໄພ ໄຊຍະສີຫາ ແລະ ສະຫາຍ ພັນຕີ ສຸລິເວດ ສີຫາລາດ ເປັນຮອງປະທານ. ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມໃຫ້ທິດຊີ້ນໍາ ຈາກສະຫາຍ ປະສົງສິນ ຈະເລີນສຸກ ເລຂາພັກເມືອງ ເຈົ້າເມືອງໆອຸທຸມພອນ. ເຊິ່ງສະຫາຍໄດ້ເນັ້ນໃຫ້ຄະນະພັກ-ຄະນະບັນຊາກອງບັນຊາການ ປກສ ເມືອງອຸທຸມພອນ ຕ້ອງໄດ້ເອົາໃຈໃສ່ຈັດຕັ້ງເຜີຍແຜ່ການເຊື່ອມຊຶມ ມະຕິຄຳສັ່ງຕ່າງໆທີ່ພັກວາງອອກໃນແຕ່ລະໄລຍະ, ຮັບປະກັນໃນທົ່ວເມືອງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍພື້ນຖານ, ປະຕິບັດຍຸດທະສາດ ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ, ໂດຍສະເພາະແມ່ນ ຫັນເອົາກໍາລັງຢູ່ກອງບັນຊາການ ລົງປະຈໍາຢູ່ກຸ່ມບ້ານໃຫ້ຫຼາຍຂຶ້ນ, ສຸມໃສ່ເຮັດວຽກງານສືບຂ່າວ, ກໍາສະພາບການ, ໂດຍສະເພາະກຸ່ມຄົນບໍ່ດີ ທີ່ເຂົ້າມາເຄື່ອນໄຫວ ພາຍໃນເມືອງຂອງພວກເຮົາໃຫ້ວ່ອງໄວທັນກັບສະພາບການ, ປະຕິບັດຍຸດທະສາດສະກັດກັ້ນ ແລະ ປາບປາມ ການຄ້າຂາຍມົ້ວສຸມເສບຢາເສບຕິດຢ່າງແຂງແຮງ ເຮັດໃຫ້ປະກົດການຫຍໍ້ທໍ້ດັ່ງກ່າວ ຫຼຸດໜ້ອຍຖອຍລົງເທື່ອລະກ້າວ, ເອົາໃຈໃສ່ປັບປຸງວຽກງານພະລາທິການ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພື່ອຊີວິດການເປັນຢູ່ຂອງພະນັກງານ-ນັກຮົບ ເຮັດສໍາເລັດໜ້າທີ່ການເມືອງຂອງພັກມອບໝາຍຢ່າງສົມກຽດ ແລະ ເອົາໃຈໃສ່ແກ້ໄຂບັນຫາອຸປະຕິເຫດ ຕາມທ້ອງຖະໜົນຫຼວງ ໃຫ້ຫຼຸດລົງ.

ນັກຂ່າວເມືອງອຸຸທຸມພອນ
ພອນປະເສີດ
Medialaos