ມື້ສຸດທ້າຍຂອງການຢ້ຽມຢາມ ສປປຈີນ ສຳລັບສື່ມວນຊົນນາໆຊາດ ທີ່ນະຄອນຈີໜານ ແຂວງຊານຕົງ ໃນເດືອນກັນຍາ 2019 ຜ່ານມາ, ຄະນະພວກເຮົາໄດ້ຖືກເຊື້ອເຊີນເຂົ້າຮ່ວມພິທີເປີດງານເມືອງທັດສະນິຍະພາບວັດທະນະທຳບໍ່ນ້ຳພຸນາໆຊາດປະຈຳປີ 2019 ທີ່ໂຮງແຮມຊານຕົງນະຄອນຈີໜານ. ເຊິ່ງເປັນປະເດັນຫຼັກຂອງງານໃນການເຊື້ອເຊີນເອົາບັນດາສື່ມວນຊົນຈາກປະເທດຕ່າງໆເຂົ້າຮ່ວມກິດຈະກຳໃນຄັ້ງນີ້. ເຊິ່ງນະຄອນຈີໜານໄດ້ຖືເອົາໂອກາດດັ່ງກ່າວເປີດວາລະກອງປະຊຸມລະດັບນາໆຊາດສຳລັບເມືອງທັດສະນິຍະພາບວັດທະນະທຳບໍ່ນ້ຳພຸປະຈຳປີ ແລະ ຈັດເປັນເທດສະການປະຈຳປີທີ່ໄດ້ຈັດຕັ້ງປະຕິບັດມາແຕ່ປີ2013 ເປັນຕົ້ນມາ.

ຂະນະດຽວກັນກໍ່ຍັງມີພິທີກຳສັກກາລະບູຊາບໍ່ນ້ຳພຸ, ເປັນເຈົ້າພາບຈັດກອງປະຊຸມນາໆຊາດ ສຳລັບເມືອງຕົວແບບລະບົບນິເວດວິທະຍາ ເພື່ອການພັດທະນາແບບຍືນຍົງ, ງານວາງສະແດງມໍລະດົກວັດທະນະທຳພື້ນບ້ານຂອງນະຄອນຈີໜານທີ່ໄດ້ຮັບຄວາມສົນໃຈຈາກທົ່ວໂລກ ເຊິ່ງໄດ້ນຳໃຊ້ວັດທະນະທຳບໍ່ນ້ຳພຸເປັນໃຈກາງໃນການແລກປ່ຽນການເຊື່ອມໂຍງການຮ່ວມມືກັບສາກົນ ໂດຍມີເປົ້າໝາຍເພື່ອສົ່ງເສີມການພົວພັນຮ່ວມມືໃນຂະແໜງການເສດຖະກິດ ແລະ ເຕັກໂນໂລຊີ.

ສິ້ນສຸດພິທີເປີດງານ ຄະນະພວກເຮົາໄດ້ໄປຢ້ຽມຢາມໂຮງລະຄອນ ລີອູ ຂອງແຂວງຊານຕົງ ສ້າງຕັ້ງຂຶ້ນໃນປີ 1951 ທີ່ເຮັດໜ້າທີ່ເຄື່ອນໄຫວສະແດງຮັບໃຊ້ຢູ່ພາຍໃນແຂວງ ແລະ ປະເທດຕ່າງໆໃນໂລກ. ຢູ່ທີ່ນີ້ໂຮງລະຄອນ ລີອູ ກໍ່ໄດ້ຈັດການສະແດງຕ້ອນຮັບຄະນະພວກເຮົາຢ່າງສົມກຽດລວມມີ 5 ລາຍການ ເຊິ່ງແຕ່ລະລາຍການແມ່ນສະແດງໃຫ້ເຫັນເຖິງວິຖີຊີວິດວັດທະນະທຳ,ນິທານພື້ນບ້ານ ແລະ ການແຕ່ງກາຍທີ່ເປັນເອກະລັກຂອງຊາວຈີນແຕ່ສະໄໝບູຮານ. ຂະນະດຽວກັນຄະນະພວກເຮົາຍັງໄດ້ແລກປ່ຽນປະສົບການທົດລອງແຕ່ງກາຍໃນຊຸດແບບບູຮານປະເພດຕ່າງໆເຊັ່ນ: ຊຸດຮ່ວງເຮົ້າ,ຮ້ວງເຕ້,ລາຊະນີ,ເຈົ້າຍິງ ແລະ ອື່ນໆ ເປັນທີ່ລະນຶກໃນການເກັບກ່ຽວປະສົບການຄັ້ງນີ້.

ພໍຮອດຕອນບ່າຍຂອງວັນດຽວກັນ ຄະນະພວກເຮົາໄດ້ໄປຢ້ຽມຊົມໂຄງການລົງທຶນຂອງລັດຖະບານໃນດ້ານອຸດສະຫະກຳທີ່ສຳຄັນຂອງວຽກງານສາທາລະນະສຸກ ທີ່ກຳລັງສ້າງຕັ້ງຂຶ້ນໃນປີ 2017 ເຊິ່ງນະຄອນຈີໜານ ໄດ້ມີຄວາມພະຍາມສ້າງໃຫ້ກາຍເປັນສູນວິທະຍາສາດການແພດ ທີ່ມີອິດທິພົນບົດບາດຂອງປະເທດ ແລະ ມີຈຸດມຸ້ງໝາຍສ້າງໃຫ້ກາຍເປັນສູນວິທະຍາສາດການແພດສາກົນນຳອີກ ໂດຍແມ່ນການລົງທຶນຂອງລັດຖະບານທ້ອງຖິ່ນແຂວງຊານຕົງ ທີ່ສຸມໃສ່ການຄົ້ນຄ້ວາວິທະຍາສາດ ແລະ ການພັດທະນາເຕັກໂນໂລຊີດ້ານສາທາລະນະສຸກ ທີ່ໄດ້ລົງນາມແລ້ວ 144 ໂຄງການ, ລວມທັງການກໍ່ສ້າງສູນຂໍ້ມູນດ້ານສຸຂະພາບທາງການແພດແຫ່ງຊາດ ທີ່ມີມູນຄ່າການລົງທຶນທັງໝົດ 202,8 ລ້ານໂດລາສະຫະລັດ. ສູນດັ່ງກ່າວຈະກາຍເປັນສູນລວມທາງດ້ານຊັບພະຍາກອນການແພດຊັ້ນນຳຂອງໂລກ, ດ້ານເຕັກໂນໂລຊີທີ່ທັນສະໄໝ ແລະ ມາດຕະຖານສາກົນ. ໃນທ້າຍເດືອນສິງຫາຜ່ານມາ ສູນແຫ່ງນີ້ໄດ້ດຳເນີນການຈັດຕັ້ງປະຕິບັດ 11 ໂຄງການເຊັ່ນ: ໂຄງການຂະຫຍາຍການປິ່ນປົວທາງການແພດ, ການຄົ້ນຄວ້າວິທະຍາສາດ, ການສິດສອນ, ກາຍຍະບຳບັດ ແລະ ການດູແລທາງການແພດ ແລະ ໄດ້ເລີ່ມລົງມືກໍ່ສ້າງແລ້ວທີ່ສູນການແພດສາກົນແຫ່ງນີ້ ເຊິ່ງເປັນສ່ວນໜຶ່ງຂອງໂຄງການທີ່ສຳຄັນເປັນອັນດັບທີສອງນັບແຕ່ມື້ເປີດໂຕສູນວິທະຍາສາດການແພດແຫ່ງນະຄອນຈີໜານ. ຮອດປີ 2030, ສູນວິທະຍາສາດການແພດແຫ່ງນີ້ ໄດ້ວາງແຜນໄວ້ 10 ໂຄງການ ເພື່ອສ້າງສະຖາບັນການແພດທີ່ມີຊື່ສຽງລະດັບສາກົນ ແລະ 100 ໂຄງການອຸດສາຫະກຳທີ່ສຳຄັນ ເພື່ອດຶງດູດການມາຢ້ຽມຢາມ ແລະ ມາໃຊ້ບໍລິການທາງດ້ານການແພດຢູ່ທີ່ນີ້ໃຫ້ໄດ້ 400 ບໍລິສັດ ແລະ 10 ລ້ານເທື່ອຄົນຕໍ່ປີ ເຊິ່ງຈະມີຍອດມູນຄ່າລາຍຮັບປະຈຳປີຄາດວ່າຈະເກີນ 100 ຕື້ຢວນ.

ພາຍຫຼັງຊື່ນຊົມກັບຜົນງານທາງດ້ານການລົງທຶນເພື່ອປັບປຸງສູນວິທະຍາສາດສາກົນແຫ່ງນະຄອນຈີໜານແລ້ວ. ຄະນະພວກເຮົາຍັງໄດ້ໄປຢ້ຽມຢາມໂຮງສິລະປະກາຍຍະກຳຂອງນະຄອນຈີໜານເປັນ ວາລະການນຳທ່ຽວລາຍການສຸດທ້າຍຂອງການຢ້ຽມຢາມນະຄອນຈີໜານຄັ້ງນີ້ ເຊິ່ງປະສົມປະສານກັນລະຫວ່າງໂຮງລະຄອນ ແລະ ສິລະປະກາຍຍະກຳ ເຊິ່ງເຄີຍໄດ້ຮັບລາງວັນໂລ້ຄຳລະດັບໂລກໃນເທດສະການລະຄອນສັດນາໆຊາດ ທີ່ປະເທດສະເປນ ແລະ ງານເທດສະການລະຄອນສັດທີ່ປາຣີ.

ຢູ່ທີ່ນີ້ ຄະນະພວກເຮົາໄດ້ຮັບຊົມການສະແດງຈາກນ້ອງໆທີ່ມີຄວາມສາມາດທາງດ້ານກິລາກາຍຍະກຳແບບທ້າທາຍ ເພາະຕ້ອງໄດ້ໃຊ້ທັກສະຂອງຮ່າງກາຍທີ່ມີຄວາມສາມາດ ແລະ ພອນສະຫວັນທີ່ໂດດເດັ່ນ ເຊິ່ງໄດ້ສ້າງຄວາມຕື່ນເຕັ້ນ ແລະ ໜ້າຫວາດສຽວ ດ້ວຍເຕັກນິກການເຄື່ອນໄຫວຂອງຮ່າງກາຍທີ່ຄ່ອງແຄ້ວສູງ ແລະ ສັບສົນ ເຊິ່ງໄດ້ສ້າງຄວາມປະທັບໃຈແກ່ຄະນະສື່ມວນຊົນພວກເຮົາຢ່າງໜ້າອັດສະຈັນ ແລະ ຮຸ່ງເຊົ້າຂອງວັນຕໍ່ມາຄະນະພວກເຮົາກໍ່ໄດ້ແຍກຍ້າຍກັນເດີນທາງກັບຄືນປະເທດຂອງໃຜລາວ ດ້ວຍຄວາມສະຫວັດດີພາບທຸກປະການ.

medialaos
ສື່ມວນຊົນແຂວງຈຳປາສັກ
ໂດຍ: ມົນທຽນ ໄຊຍະສິດ