ພາຍຫຼັງສຳເລັດກິດຈະກຳຢູ່ ສາທາລະນະລັດ ສັງຄົມນິຍົມ ຫວຽດນາມແລ້ວ ໃນວັນທີ 22 ຕຸລາ 2019 ໂຄງທຳມະຍາດຕາ 5 ແຜ່ນດິນລຸ່ມແມ່ນ້ຳຂອງຄື: ລາວ, ໄທ, ຫວຽດນາມ, ກຳປູເຈຍ ແລະ ມຽນມາ ໄດ້ເດີນທາງມາເຄື່ອນໄຫວກິດຈະກຳຢູ່ ນະຄອນ ຫຼວງພະບາງ ແຂວງຫຼວງພະບາງ .

ໂດຍມີທ່ານ ສາຍສະໝອນ ຄົມທະວົງ ຮອງເລຂາພັກແຂວງ, ທ່ານ ຄໍາຫຼ້າ ທະສິນິພອນ ແລະ ການນໍາຂອງແຂວງ-ເມືອງຕະຫຼອດຮອດຊາວພຸດພາຍໃນແຂວງ ແລະ ຈາກ 5 ປະເທດເຂົ້າຮ່ວມ.ຈາກນັ້ນ, ໃນວັນທີ 23 ໂຄງທຳມະຍາດຕາ ໄດ້ຈັດກິດຈະກຳທາງສາສະໜາ ຢູ່ວັດຊຽງທອງ. ທ່ານ ສົມອົກ ກິ່ງສະດາ ຮອງປະທານ ສູນກາງແນວລາວສ້າງຊາດ ກ່າວວ່າ: ສາສະໜາ ໄດ້ກຳເນີດເກີດຂຶ້ນມາແລ້ວຫຼາຍພັນປີ ສ່ວນປະເທດລາວກໍ່ເປັນອີກປະເທດໜຶ່ງທີ່ມີມູນເຊື້ອວັດທະນະທຳ-ຮີດຄອງປະເພນີອັນດີງາມ ໂດຍສະເພາະແມ່ນ ນະຄອນຫຼວງພະບາງ ໃນເມື່ອກ່ອນແມ່ນເປັນຕົ້ນກຳເນີດ ແລະ ເປັນສູນລວມທາງດ້ານສາສະໜາ, ວັດທະນະທຳວັດທະນະທຳ-ຮີດຄອງປະເພນີອັນດີງາມຂອງຊາດລາວ.

ໂຄງທຳມະຍາດຕາ 5 ປະເທດລຸ່ມແມ່ນ້ຳຂອງ ຈັດຂຶ້ນເປັນຄັ້ງທີ່ 2 ເປັນອົງປະກອບໜຶ່ງທີສຳຄັນ ໃນການປົກປັກຮັກສາ ແລະ ເຜີຍແຜ່ພຸດທະສາສະໜາ, ເປັນການເພີ່ມພູນຄູນສ້າງສາຍພົວພັນມິດຕະພາບ ລະຫວ່າງປະຊາຊົນລຸ່ມແມ່ນ້ຳຂອງ ໃຫ້ມີຄວາມໃກ້ສິດສະໜິດສະໜົມກັນເພີ່ມຂຶ້ນ. ເປັນການສົ່ງເສີມປະເພນີ ແລະ ວັດທະນະທຳອັນດີງາມຂອງແຕ່ລະປະເທດ ໃຫ້ມີຄວາມຍືນຍົງ ແລະ ເປັນການສົ່ງເສີ່ມການທ່ອງທ່ຽວທາງດ້ານພຸດທະສາສະໜາ ແລະ ວັດທະນະທຳຕື່ມອີກ. ດ້ວຍເຫດນີ້ພັກ-ລັດ ຖະບານ ແຫ່ງ ສປປ ລາວ ຍາມໃດກໍ່ໄດ້ໃຫ້ຄວາມສຳຄັນ ທາງດ້ານສິດເສລິພາບໃນການເຊື້ອຖື ຫຼື ບໍ່ເຊື່ອຖືສາສະໜາ ຂອງພົນລະເມືອງລາວບັນດາເຜົ່າ ພ້ອມທັງປຸກລະດົມຂົນຂວາຍໃຫ້ພະສົງສໍາມະເນນ ແລະ ນັກສອນສາສະໜາຕ່າງໆ ເຄື່ອນໄຫວນຳເອົາຫຼັກສິນທຳອັນດີງາມ ເພື່ອສຶກສາອົບຮົມສິນລະທຳ ໃຫ້ປະຊາຊົນບັນດາເຜົ່າ ຮູ້ຈັກບາບ-ບຸນຄຸນໂທດ ແລະ ປະກນສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ໃນພິທີ ສາທຸໃຫຍ່ ອ່ອນແກ້ວ ກິດຕິປັດໂທ ປະທານພຸດທະສາສະໜາສຳພັນລາວ ແຂວງ ຫຼວງພະບາງ ໄດ້ຂຶ້ນລາຍງານການເຄື່ອນໄຫວຂອງພະສົງຢູ່ແຂວງຫຼວງພະບາງ ໃຫ້ຄະນະໂຄງທຳມະຍາດຕາ 5 ປະເທດລຸ່ມແມ່ນ້ຳຂອງຮັບຮູ້. ຈາກນັ້ນ, ຄະນະຜູ້ແທນໂຄງທຳມະຍາດຕາລຸ່ມແມ່ນ້ຳຂອງ ກໍ່ໄດ້ທ່ຽວຊົມສະຖານທີ່ທ່ອງທຽວຕ່າງໆພາຍໃນນະຄອນຫຼວງພະບາງ. ສ່ວນວັນທີ 24 ຕຸລາ ຕອນເຊົ້າ ມີການໃສ່ບາດ ພະສົ່ງ 350 ຕົນ, ປູກຕົ້ນໂພ ແລະ ຖວາຍຜ້າປ່າສາມັກຄີ ຢູ່ວັດຜາໂອ.ແລະ ໃນວັນທີ 25 ຕຸລາ ຄະນະຜູ້ແທນໂຄງການທໍາມະຍາດຕາລຸ່ມແມ່ນໍ້າຂອງ ກໍຈະໄດ້ສືບຕໍ່ເດີນທາງໄປນະຄອນຫຼວງວຽງຈັນ.

ຂ່າວ: ເພັດສາຄອນ ສິມມະວົງ
Medialaos