ພິທີປະກາດການຈັດຕັ້ງ ແລະ ມອບ-ຮັບໜ້າທີ່ ລະຫວ່າງຫົວໜ້າຫ້ອງການເງິນເມືອງອຸທຸມພອນ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 24 ຕຸລາ 2019 ທີ່ຜ່ານມາ ຢູ່ທີ່ຫ້ອງປະຊຸມຫ້ອງວ່າການເມືອງດັ່ງກ່າວ ໂດຍພາຍໃຕ້ການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ, ທ່ານນາງ ບົວສະຫວັນ ຫຼຸຍບົວທອງ ຮອງຫົວໜ້າພະແນກການເງິນແຂວງ, ບັນດາທ່ານ ຫົວໜ້າຫ້ອງການ, ຄະນະຫ້ອງການ, ພະນັກງານ-ວິຊາການ ຂະແໜງການກ່ຽວຂ້ອງເຂົ້າຮ່ວມ.

ໃນພິທີ ທ່ານ ພົມມະຈັກ ນາແສນທອງ ຮອງຫົວໜ້າຫ້ອງການຈັດຕັ້ງເມືອງ ກໍ່ໄດ້ຜ່ານຂໍ້ຕົກລົງ ຂອງທ່ານເຈົ້າເມືອງອຸທຸມພອນ ສະບັບເລກທີ 611/ຈມ.ອທພ ລົງວັນທີ 21 ຕຸລາ 2019 ວ່າດ້ວຍການຍົກຍ້າຍພະນັກງານໄປປະຈຳການຢູ່ກົມກອງໃໝ່ ໂດຍຕົກລົງຍົກຍ້າຍ ທ່ານ ເກສອນ ບຸນຍາວົງ ຫົວໜ້າຫ້ອງການເງິນເມືອງ ອຸທຸມພອນ ໄປຮັບໜ້າທີ່ໃໝ່ຢູ່ຫ້ອງການເງິນເມືອງພະລານໄຊ, ຜ່ານຂໍ້ຕົກລົງ ສະບັບເລກທີ 610/ຈມ.ອທພ ລົງວັນທີ 21 ຕຸລາ 2019 ວ່າດ້ວຍການແຕ່ງຕັ້ງຫົວໜ້າຫ້ອງການເງິນເມືອງ ອຸທຸມພອນ ໂດຍຕົກລົງແຕ່ງຕັ້ງ ທ່ານ ເກດສະໝອນ ປັດທຳມະວົງ ຫົວໜ້າສ່ວຍສາອາກອນປະຈຳເມືອງ ອຸທູມພອນ ເປັນຫົວໜ້າຫ້ອງການເງິນເມືອງ ອຸທຸມພອນ, ຜ່ານຂໍ້ຕົກລົງ ສະບັບເລກທີ 612/ຈມ.ອທພ ລົງວັນທີ 21 ຕຸລາ 2019 ວ່າດ້ວຍການແຕ່ງຕັ້ງຮອງຫົວໜ້າຫ້ອງການເງິນເມືອງ ອຸທຸມພອນ ໂດຍຕົກລົງແຕ່ງຕັ້ງ ທ່ານ ສອນໄຊ ຈັນທະໄລ ຮອງຫົວໜ້າໜ່ວຍງານຄຸ້ມຄອງຊັບສິນລັດ ເປັນຮອງຫົວໜ້າຫ້ອງການເງິນເມືອງ ອຸທຸມພອນ ແລະ ຜ່ານຂໍ້ຕົກລົງຂອງກະຊວງການເງິນ ສະບັບເລກທີ 4000/ກງ ລົງວັນທີ 2 ຕຸລາ 2019 ວ່າດ້ວຍການຍົກຍ້າຍ, ແຕ່ງຕັ້ງຫົວໜ້າ ແລະ ຮອງຫົວໜ້າສ່ວຍສາອາກອນປະຈຳເມືອງ ໂດຍຕົກລົງແຕ່ງຕັ້ງ ທ່ານ ວົງພະຈັນ ພັນທະວົງ ຮອງຫົວໜ້າສ່ວຍສາອາກອນປະຈຳເມືອງ ອຸທຸມພອນ ເປັນຫົວໜ້າສ່ວຍສາອາກອນ ປະຈຳເມືອງ ອຸຸທຸມພອນ ແລະ ຕົກລົງຍົກຍ້າຍ ແລະ ແຕ່ງຕັ້ງ ທ່ານ ສົມຈິດ ເຄນນະວົງ ຮອງຫົວໜ້າສ່ວຍສາອາກອນປະຈຳເມືອງພີນ ເປັນຮອງຫົວໜ້າສ່ວຍສາອາກອນປະຈຳເມືອງ ອຸຸທຸມພອນ. ຈາກນັ້ນໃນພິທີ ກໍ່ໄດ້ມີການເຊັນບົດບັນທຶກການ ມອບ-ຮັບ ໜ້າທີ່ຫົວໜ້າຫ້ອງການເງິນເມືອງ ອຸທຸມພອນ ລະຫວ່າງຜູ້ເກົ່າ ແລະ ຜູ້ໃໝ່ ຕໍ່ໜ້າປະທານ ແລະ ແຂກທີ່ເຂົ້າຮ່ວມເປັນສັກຂີພະຍານໃນຄັ້ງນີ້. ໃນຕອນທ້າຍຍັງໄດ້ຮັບຟັງການໂອ້ລົມ ຈາກທ່ານ ປະສົງສິນ ຈະເລີນສຸກ ແລະ ທ່ານນາງ ບົວສະຫວັນ ຫຼຸຍບົວທອງ. ໂດຍທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ໄດ້ໃຫ້ຮູ້ວ່າ: ໃນການປະກາດການຈັດຕັ້ງ ແລະ ມອບ-ຮັບໜ້າທີ່ ຄັ້ງນີ້ ແມ່ນເພື່ອແນໃສ່ການສືບຕໍ່ຊີ້ນຳ-ນຳພາວຽກງານໃນຕໍ່ໜ້າ ໃຫ້ມີຄວາມຕໍ່ເນື້ອງ, ຮັບປະກັນການຄຸ້ມຄອງ, ບໍລິຫານໃຫ້ມີປະສິດທິພາບ, ປະສິດທິຜົນ, ໂປ່ງໃສ, ຖືກຕ້ອງສອດຄ່ອງ ກັບລະບຽບການ, ທ່ວງທັນກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນຕໍ່ໜ້າ. ໂອກາດດັ່ງກ່າວ ທ່ານກໍ່ຍັງໄດ້ຍ້ອງຍໍຊົມເຊີຍ ຕໍ່ຜົນງານຂອງທ່ານຫົວໜ້າຫ້ອງການເງິນເມືອງ ອຸທຸມພອນ ຜູ້ເກົ່າ ທີ່ໄດ້ຊີ້ນຳ-ນຳພາ ແລະ ພ້ອມກັນຈັດຕັ້ງປະຕິບັດ ຈົນມີຜົນສຳເລັດໃນຫຼາຍໆດ້ານ, ພ້ອມນີ້ກໍ່ຍັງໄດ້ເນັ້ນໃຫ້ ທ່ານຫົວໜ້າຫ້ອງການເງິນເມືອງ ອຸທຸມພອນ ຜູ້ໃໝ່ ຈົ່ງນຳເອົາບົດຮຽນ ກໍ່ຄືຜົນສຳເລັດໃນການເຄື່ອນໄຫວຜ່ານມາ ເຝິກຝົນຫຼໍ່ຫຼອມຕົນເອງໃຫ້ມີການພັດທະນາດີຂື້ນເລື້ອຍໆ ແລະ ຜັນຂະຫຍາຍເຂົ້າໃສ່ໜ້າທີ່ວຽກງານ ທີ່ພັກ-ລັດ ມອບໝາຍໃຫ້ເກີດດອກອອກຜົນ ແລະ ມີຜົນສຳເລັດຍິ່ງໃຫຍ່ກວ່າເກົ່າ.

ພອນປະເສີດ ແຜນພັກດີ
Medialaos