ພາຍຫຼັງທີ່ໄດ້ດໍາເນີນກອງປະຊຸມໃຫຍ່ຄັ້ງທີ VII ຂອງຜູ້ແທນອົງຄະນະພັກ ເມືອງ ບໍ່ແຕນ, ແຂວງ ໄຊຍະບູລີ ມາເປັນເວລາ 2 ວັນເຕັມ ຈຶ່ງໄດ້ສໍາເລັດລົງໃນຕອນບ່າຍວັນທີ 27 ຕຸລາ 2019, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ວັນດາວ ແວວທະນັດສີ ວ່າການເລຂາພັກເມືອງ, ວ່າການເຈົ້າເມືອງ-ເມືອງ ບໍ່ແຕນ, ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີປະທານສະພາປະຊາຊົນແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ ເຂົ້າຮ່ວມ 150 ກວ່າສະຫາຍ, ໃນນັ້ນມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 95 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 965 ສະຫາຍ.

ກອງປະຊຸມຜູ້ແທນທີ່ເຂົ້າຮ່ວມແມ່ນໄດ້ພ້ອມກັນຄົ້ນຄ້ວາຕີລາຄາຄືນການຈັດຕັ້ງປະຕິບັດແນວທາງປຽ່ນແປງໃໝ່ຮອບດ້ານທີ່ມີຫລັກການຂອງພັກກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງ, ເສີມຂະຫຍາຍດ້ານຕັ້ງໜ້າ, ຊອກຫາວິທີແກ້ໄຂຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ ເພື່ອພ້ອມກັນປັບປຸງແກ້ໄຂ ແລະ ກຳນົດທິດທາງ 5 ປີຕໍ່ຫນ້າ, ພ້ອມນີ້ກອງປະຊຸມຍັງໄດ້ເປັນເອກະສັນກັນຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ ແລະ ໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງມີຜູ້ຮັບສະໝັກທັງໝົດ 29 ສະຫາຍ, ຍິງ 2 ສະຫາຍ, ໃນນີ້ເລືອກເອົາ 25 ສະຫາຍ, ອາຍຸສູງສຸດ 59 ປີ, ຕໍ່າສຸດ 36 ປີ ແລະ ອາຍຸສະເລ່ຍ 43 ປີ, ກອງປະຊຸມຄັ້ງປະຖົມມະລຶກໄດ້ຕົກລົງເລືອກເອົາ ສະຫາຍ ວັນດາວ ແວວທະນັດສີ ເປັນເລຂາຄະນະບໍລິຫານງານພັກເມືອງ, ສະຫາຍ ສົມສະໜຸກ ໄຊອຸດົມ ແລະ ສະຫາຍ ອຸ່ນ ທໍາມະວົງ ເປັນຮອງເລຂາ, ຕົກລົງເລືອກເອົາ ສະຫາຍ ສົມສະໜຸກ ໄຊອຸດົມ ເປັນປະທານຄະນະກວດກາພັກເມືອງ, ສະຫາຍ ດວງຈິດ ທໍາມະວົງ ແລະ ສະຫາຍ ເດືອນ ສຸລິຍາ ເປັນຮອງປະທານ.
ກອງປະຊຸມຍັງໄດ້ຮັບຟັງການໂອ້ລົມຂອງສະຫາຍເລຂາພັກແຂວງ, ຊິ່ງສະຫາຍໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ເອົາໃຈໃສ່ເພີ່ມທະວີໃນການສຶກສາອົບຮົມ ການເມືອງ-ແນວຄິດ, ນໍາເອົາແນວທາງ, ມະຕິ, ຄໍາສັ່ງຂອງພັກ, ລະບຽບກົດໝາຍຂອງລັດ ເຜີຍແຜ່ເຊື່່ອມຊືມ ໃຫ້ແກ່ຖັນແຖວພະນັກງານ-ສະມາຊິກພັກ ແລະ ປະຊາຊົນບັນດາເຜົ່າຢ່າງທົ່ວເຖິງ, ເສີມຂະຫຍາຍຄວາມສາມະຄີເປັນປຶກແຜ່ນຂອງປະຊາຊົນ, ຊັ້ນຄົນບັນດາເຜົ່າ, ເສີມຂະຫຍາຍຈິດໃຈເປັນເຈົ້າຕົນເອງ ເພິ່ງຕົນເອງ ສ້າງຄວາມຮັ່ງມີເຂັ້ມແຂງດ້ວຍຕົນເອງ ໃຫ້ເປັນຮູບປະທຳຫຼາຍຂຶ້ນ, ຕັ້ງໜ້າແກ້ໄຂບັນດາປະກົດການຫຍໍ້ທໍ້ທີ່ເກີດຂື້ນ ໃນຖັນແຖວພະນັກງານ, ສະມາຊິກພັກ ແລະ ໃນໝູ່ປະຊາຊົນເຊັ່ນ: ບັນຫາການຄ້າ-ຂາຍສິ່ງເສບຕິດ, ຂີ້ລັກງັດແງະ, ອຸບັດຕິເຫດຕາມທ້ອງຖະໜົນ, ການລັກລອບໄປອອກແຮງງານຢູ່ຕ່າງປະເທດ ແລະ ຕ່າງແຂວງ, ການຈັບຈອງດິນຊາຍແດນ ແລະ ອື່ນໆ ທີ່ຂັດກັບລະບຽບກົດໝາຍ.

ຂ່າວ: ອຸ່ນເຮືອນ ໂພທິລັກ.
Medialaos xayaboury