ເພື່ອສະກັດກັ້ນອັກຄີໄພ ຢູ່ຕາມສຳນັກງານອົງການ, ໂຮງຈັກໂຮງງານ ຫົວໜ່ວຍທຸລະກິດ ຕະຫຼອດຮອດບ້ານເຮືອນປະຊາຊົນ, ເພື່ອປົກປັກຮັກສາຊັບສິນ ຂອງພັກ-ລັດ, ຂອງສ່ວນລວມ ນິຕິບຸກຄົນ ແລະ ຊີວິດຂອງທຸກຄົນ ເຮັດໃຫ້ສັງຄົມໃຫ້ມີຄວາມສະຫງົບປອດໄພ ດັ່ງນັ້ນ ໃນວັນທີ 27ຕຸລາ2019 ນີ້ ພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງສະຫວັນນະເຂດ ໄດ້ລົງເຄື່ອນໄຫວຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ ຢູ່ ບໍລິສັດ ຢາສູບຫົງຖາ ໂຊກດີລາວ-ຈີນຈຳກັດ ໂດຍມີ ທ່ານ ພັຕ ເຂືອງຄຳ ພົມມະລາດ ຮອງຫົວໜ້າພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ ພ້ອມດ້ວຍຄະນະ, ມີຫົວໜ້າບໍລິສັດ ຢາສູບຫົງຖາ ໂຊກດີລາວ-ຈີນຈຳກັດ ພ້ອມດ້ວຍພະນັກງານງານວິຊາການ ແລະ ກຳມະກອນບໍລິສັດດັ່ງກ່າວເຂົ້າຮ່ວມ

ທ່ານ ພັຕ ເຂືອງຄຳ ພົມມະລາດ ຮອງຫົວໜ້າພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ ໄດ້ຜ່ານກົດໝາຍ ວ່າດ້ວຍ ການສະກັດກັ້ນ ແລະ ຕ້ານອັກຄີໄພ ພ້ອມດຽວກັນນີ້ກໍ່ ໄດ້ຍົກໃຫ້ເຫັນບັນຫາທີ່ມັກພາໃຫ້ເກີດອັກຄີໄພຢູ່ຕາມບັນດາໂຮງຈັກໂຮງງານ, ຕະຫຼາດ, ຫ້າງຮ້ານຕ່າງໆ ຕະຫຼອດຮອດບ້ານເຮືອນປະຊາຊົນ ເຊິ່ງມັນສ້າງຄວາມສູນເສຍຕໍ່ຊັບສິນສ່ວນລວມ, ບຸກຄົນ ແລະ ສູນເສຍຊີວິດໃນກໍລະນີຮ້າຍແຮງ , ຢ້ອນເມື່ອເກີດເຫດ ບັນດາປະຊາຊົນ, ພະນັກງານ ກຳມະກອນຕ່າງໆ ບໍ່ມີຄວາມເຂົ້າໃຈໃນການປ້ອງກັນ, ການລະງັບເຫດຈາກນ້ອຍໄປຫາໃຫຍ່, ການການເກັບມ້ຽນວັດຖຸໄວໄຟອື່ນໆທີ່ບໍ່ຖຶກຕ້ອງ

ໃນພິທີ ທ່ານ ຮທ ລັດດາວອນ ໄຊຍະວົງ ພະນັກງານວິຊາການພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ ກໍ່ໄດ້ອະທິບາຍທິດສະດີເບື້ອງຕົ້ນໃນການປ້ອງກັນ, ການຊ່ວຍເຫຼືອຕົນເອງ ແລະຄົນອື່ນໃນຍາມເກີດອັກຄີໄພ, ຍົກໃຫ້ເຫັນຊະນິດໄຟຕ່າງໆ, ອົງປະກອບຂອງໄຟ ແລະ ການນຳໃຊ້ບັ້ງມອດໄຟໃຫ້ຖືກຕ້ອງຕາມແຕ່ລະຊະນິດຂອງໄຟ ພ້ອມທັງລົງປະຕິບັດຕົວຈິງໃນການດັບມອດໄຟທີ່ເກີດຈາກແກັສຮົ່ວດ້ວຍມືເປົ່າ, ການດັບມອດໄຟຈາກສາຍແກັສຫຼຸດ, ການໃຊ້ບັ້ງມອດໄຟເຂົ້າມອດໄຟຈາກເຕົາແກັສ ແລະ ມອດໄຟຈາກນ້ຳມັນ, ສາທິດການໃຊ້ລົດດັບເພິງ, ການໃຊ້ນ້ຳເຂົ້້າມອດໄຟໃນກໍລະນີຕ່າງໆ ທັງນີ້ກໍ່ເພື່ອເຮັດໃຫ້ພະນັກງານ, ກຳມະກອນ ມີຄວາມຮູ້ພື້ນຖານໃນການປ້ອງກັນສະກັດກັ້ນອັກຄີໄພ, ມີຄວາມຮັບຜິດຊອບເປັນເຈົ້າການ ເມື່ອມີໄຟໄໝ້ເກີດຂື້ນສາມາດແກ້ໄຂໄດ້ຢ່າງທັນການມີຜົນເສຍຫາຍນ້ອຍທີ່ສຸດ ພ້ອມກັນນີ້ກໍ່ໄດ້ມີການຊ້ອມອົບພະຍົບໃນກໍລະນີເກີດເຫດອັກຄີໄພເພື່ອກວດກາຈຳນວນພົນຢູ່ຈຸດເຕົ້າໂຮມຂອງບໍລິສັດດັ່ງກ່າວຕື່ມອີກ.

ພາບ-ຂ່າວ : ປກສ ແຂວງ
savannakhet medialaos