ໃນຕອນເຊົ້າຂອງວັນທີ 25 ຕຸລາ 2019, ກຳມະບານຮາກຖານ ພະແນກ ຖວທ ແຂວງສະຫວັນນະເຂດ ໄດ້ມີການເປີດກອງປະຊຸມໃຫຍ່ຄັ້ງທີ VI ຂັ້ນຂອງຕົນຂື້ນຢ່າງເປັນທາງການ ທີ່ຫ້ອງປະຊຸມຂອງພະແນກດັ່ງກ່າວ ໂດຍການເຂົ້າຮ່ວມຂອງ ສະຫາຍ ນາງ ພົມມາ ທອງເພັງ ຮອງປະທານຄະນະບໍລິຫານງານສະຫະພັນກຳມະບານແຂວງ,ມີ ສະຫາຍ ຈັນທະໜອມ ພິລາວົງ ຄະນະພັກຮາກຖານພະແນກ ຖວທ ແຂວງ, ຄະນະກຳມະບານຮາກຖານພະແນກ ຖວທ ແລະ ກຳມະບານຮາກຖານອ້ອມຂ້າງ ຕະຫຼອດຮອດສະມາຊິກກຳມະບານພາຍໃນຂອງຕົນ ເຂົ້າຮ່ວມຈຳນວນ 99 ສະຫາຍ, ຍິງ 39 ສະຫາຍ.

ໃນກອງປະຊຸມ ສະຫາຍ ມົງກຸດເພັດ ວົງພະຈັນ ຮອງປະທານກຳມະບານຮາກຖານພະແນກ ຖວທ ແຂວງ( ຊຸດເກົ່າ ), ກໍ່ໄດ້ຂື້ນຜ່ານບົດລາຍງານການເມືອງ ພາກທີ I ວ່າດ້ວຍການສະຫຼຸບຕີລາຄາສະພາບການເຄື່ອນໄຫວວຽກງານຂອງກຳມະບານຮາກຖານພະແນກ ຖວທ ແຂວງ ໃນໄລຍະ 4 ປີຜ່ານມາ ນັບແຕ່ປີ 2015-2018 ແລະ ພາກທີ II ວ່າດ້ວຍທິດທາງແຜນການຂອງກຳມະບານຮາກຖານພະແນກ ຖວທ ແຂວງແຕ່ ປີ2019 ຮອດ 2023 ຢ່າງຮອບດ້ານ. ໂດຍຍົກໃຫ້ເຫັນເຖິງຄາດໝາຍສູ້ຊົນ ທີ່ຈະສ້າງໃຫ້ກໍາມະບານຮາກຖານພະແນກ ຖວທ ໃຫ້ກາຍເປັນສະຫະພັນກຳມະບານ ທີ່ມີຮາກຖານຈຳນວນໜຶ່ງຂຶ້ນກັບ ພ້ອມທັງເສີມຂະຫຍາຍບົດບາດໃນການປົກປ້ອງສິດ, ຜົນປະໂຫຍດຂອງສະມາຊິກກຳມະບານໃຫ້ໄດ້ຢ່າງທົ່ວເຖິງ ເພື່ອປະກອບສ່ວນໃຫ້ແກ່ການສ້າງໜ່ວຍພັກເຂັ້ມແຂງຮູ້ນຳພາຮອບດ້ານໃຫ້ປະກົດຜົນເປັນຈິງ. ນອກນີ້ໃນພິທີຍັງໄດ້ມີການມອບ-ຮັບໃບຍ້ອງຍໍຂັ້ນສູນກາງສະຫະພັນກຳມະບານລາວ ໃຫ້ແກ່ສະຫາຍທີ່ມີຜົນງານດີເດັ່ນໃນໄລຍະ 4 ປີຜ່ານມາ ຈຳນວນ 24 ສະຫາຍ, ຍິງ 7 ສະຫາຍ, ມອບໃບຍ້ອງຍໍຂັ້ນສະຫະພັນກໍາມະບານແຂວງ ຈຳນວນ 71 ສະຫາຍ, ຍິງ 28 ສະຫາຍ, ໃບສັນລະເສີນຂັ້ນຫົວໜ້າພະແນກ ຖວທ ແຂວງ ຈຳນວນ41 ສະຫາຍ, ຍິງ 21 ສະຫາຍ ແລະ ຮັບຮອງເອົາກຳມະບານຮາກຖານ ພະແນກ ຖວທ ແຂວງເປັນກຳມະບານຮາກຖານ 5 ເປັນເຈົ້າດ້ວຍການມອບໃບຢັ້ງຢືນພ້ອມດ້ວຍທຸງໄຊຢ່າງສົມກຽດ.

ຊຶ່ງໃນວາລະກອງປະຊຸມຍັງໄດ້ມີການໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະປະທານ ກຳມະບານຮາກຖານຊຸດໃໝ່ ຈາກຈຳນວນຜູ້ສະໝັກ 11 ສະຫາຍ, ຍິງ 3 ສະຫາຍ, ເລືອກໄດ້ 9 ສະຫາຍ, ຍິງ 1 ສະຫາຍ, ໂດຍຜ່ານກອງປະຊຸມຄັ້ງປະຖົມມະລຶກເຫັນດີໃຫ້ສະຫາຍ ມົງກຸດເພັດ ວົງພະຈັນ ເປັນປະທານກຳມະບານຮາກຖານ ( ຊຸດໃໝ່ ), ສະຫາຍ ຄຳແສນ ໄຊຍະລິນ ເປັນຮອງປະທານ, ທັງເປັນປະທານກວດກາ, ສະຫາຍ ນາລະເທເວດ ອຳມາລາທິທາດາ ເປັນຮອງປະທານ ແລະ ອີກ 6 ສະຫາຍເປັນກຳມະການ, ມາໃນຕອນທ້າຍຂອງກອງປະຊຸມ ສະຫາຍ ນາງ ພົມມາ ທອງເພັງ ກໍ່ຍັງໄດ້ໂອ້ລົມ ແລະ ໃຫ້ທິດຊີ້ນຳຕໍ່ ຄະນະປະທານກຳມະບານຮາກຖານຊຸດໃໝ່ ຕື່ມອີກວ່າ: ຕ້ອງໄດ້ເອົາໃຈໃສ່ ໃນການສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ຖັນແຖວສະມາຊິກກຳມະບານທີ່ຢູ່ໃນຄວາມຮັບຜິດຊອບຂັ້ນຂອງຕົນ ໃຫ້ມີຄວາມເຊື່ອໝັ້ນຕໍ່ການນຳພາຂອງພັກ, ລະບຽບກົດໝາຍຂອງລັດໃຫ້ເປັນປົກກະຕິ, ເປັນເຈົ້າຕົນເອງເຂົ້າໃນການປັບປຸງການ ຈັດຕັ້ງໃຫ້ມີຄວາມເຂັ້ມແຂງ, ມີຄວາມເປັນເອກະພາບພາຍໃນ ສອດຄ່ອງກັບໜ້າທີ່ວຽກງານທີ່ຕົນຮັບຜິດຊອບ ພ້ອມທັງເອົາໃຈໃສ່ໃນການບຳລຸງກໍ່ສ້າງພະນັກງານໃຫ້ເປັນລະບົບ ແລະ ຕໍ່ເນື່ອງເພື່ອຮັບຮອງເອົາການຊັບຊ້ອນປ່ຽນແທນໃນອານາຄົດ.

ສະຫະພັນກຳມະບານແຂວງສະຫວັນນະເຂດ
ຂ່າວ -ພາບ:ວັນນະເລດ ມະນີວົງ.
savannakhet medialaos