ເມືອງນອງຈັດພິທີ ການແຂ່ງຂັນເຮືອຊ່ວງປະຈຳປີ ພສ 2562 ຂຶ້ນຢ່າງມ່ວນຊື່ນ

0
193

ໃນວັນທີ 26-27 ຕຸລາ 2019ນີ້ ເມືອງນອງໄດ້ຈັດພິທີ ການແຂ່ງຂັນເຮືອຊ່ວງປະຈໍາປີພສ 2562 ຂຶ້ນຢ່າງເປັນທາງການ ຢູລຽບສາຍເຊລະນອງ ຈຸດທາງໂຄ້ງຂົວຫ້ວຍລະພົງ ເທສະບານເມືອງນອງ ແຂວງສະຫວັນນະເຂດ ໃຫ້ກຽດເປັນປະທານຄະນະກຳມະການຈັດງານຄັ້ງນີ້ມີ ທ່ານ ລຳແກ້ວ ແສງໜູທອງ ເຈົ້າເມືອງໆນອງ, ມີບັນດາທ່ານໃນກຳມະການຂອງເມືອງ, ພະນັກງານ-ລັດຖະກອນ, ອຳນາດການປົກຄອງບ້ານນອງວິໄລຕະຫຼອດຮອດ ປະຊາຊົນໃນທົ່ວເມືອງເຂົ້າຮ່ວມຢ່າງເປັນຂະບວນ ພິເສດຍັງມີການນຳຂອງເມືອງຕະໂອ້ຍ, ເມືອງຕຸ້ມລານ ແຂວງສາລະວັນ ແລະ 3 ໂຕເມືອງຂອງເຂດພູດອຍ ຄື: ເມືອງພີນ, ເມືອງເຊໂປນ, ເມືອງວິລະບູລີ ແລະການນໍາຂອງແຂວງ ຈໍານວນໜຶ່ງກໍ່ໄດ້ເຂົ້າຮ່ວມນຳ.

ໃນພິທີ ທ່ານ ແຕງອ່ອນ ຈັນທະລະນອງ ຮອງເຈົ້າເມືອງໆນອງ ຮອງປະທານກຳມະການຈັດງານ ກໍ່ໄດ້ຂຶ້ນກ່າວຈຸດປະສົງຂອງການຈັດງານດັ່ງກ່າວນີ້ວ່າ: ເພື່ອເປັນການສົ່ງເສີມ ອະນຸລັກຮັກສາເສີມຂະຫຍາຍປະເພນີອັນດີງາມໂດຍສະເພາະກໍ່ແມ່ນການແຂ່ງຂັນເຮືອຊ່ວງໃຫ້ມີການສືບທອດຕໍ່ໆໄປ, ທັງເປັນການສ້າງຄວາມສາມັກຄີພົບປະແລກປ່ຽນຖອດຖອນບົດຮຽນເຊິ່ງກັນ ແລະ ກັນລະຫວ່າງການນຳຂອງເມືອງຕ່າງໆທີ່ເຂົ້າມາຮ່ວມກໍ່ຄືມວນຊົນ, ທັງນີ້ກໍ່ເພື່ອເປັນການໂຄສະນາດຶງດູດນັກທ່ອງທ່ຽວທາງພາຍໃນ ແລະ ຕ່າງປະເທດໃຫ້ເຂົ້າມາທ່ຽວຊົມຮູ້ຈັກເມືອງນອງໃຫ້ນັບມື້ນັບຫຼາຍຂຶ້ນ. ຈາກນັ້ນກໍ່ໄດ້ຮັບຊົມການສະແດງສິນລະວັນນະຄະດີ ຂັບລຳທ້ອງຖິ່ນ ຈາກປະຊາຊົນບ້ານ ນອງວິໄລ , ສຳລັບການແຂ່ງຂັນເຮືອຊ່ວງປີນີ້: ມີສີພາຍໃນທົ່ວເມືອງນອງເຂົ້າຮ່ວມທັງໝົດ 15 ຄະນະ, ຂະໜາດ 15 ສີພາຍລົງມາ, ມີສີພາຍຍິງ 5 ຄະນະ ໂດຍໄດ້ຈັດແບ່ງອອກເປັນ 6 ສາຍ, ຍິງ 2 ສາຍ.

ໃນແຕ່ລະສາຍແຂ່ງຂັນພົບກັນໝົດເພື່ອຄັດເລືອກເຂົ້າຮອບຮອງຊະນະເລີດ ແລະຊິງຊະນະເລີດຕາມລຳດັບ, ສ່ວນຜົນຂອງການແຂ່ງຂັນເຮືອຊ່ວງປະຈຳປີ ພສ 2562 ນີ້ ຊິງຊະນະເລີດອັນດັບ 1 ໄດ້ແກ່ ເຮືອງຊ່ວງຍິງ ຊາວໜຸ່ມແມ່ຍິງ ບ້ານ ນອງວິໄລໄດ້ຮັບຂັນລາງວັນພ້ອມເງິນ 1.500.000ກີບ, ທີ2ໄດ້ແກ່ ທິມແມ່ຍິງຫ້ອງການສຶກສາເມືອງ ໄດ້ຮັບລາງວັນເປັນເງິນ 1.000.000 ກີບ, ທີ3 ຊາວໜຸ່ມແມ່ຍິງ ມສ ນອງ ຮັບຂອງຂວັນລາງວັນ 800.000 ກີບ. ປະເພດເຮືອຊ່ວງຊາຍ ທີ1 ໄດ້ແກ່ ຊາວໜຸ່ມບ້ານ ນອງວິໄລ ໄດ້ຮັບຂັນ1ໜ່ວຍພ້ອມເງິນລາງວັນ 2 ລ້ານກີບ.ທີ2 ໄດ້ແກ່ ມສ ນອງວິໄລ ຮັບເງິນລາງວັນ 1.500.000 ກີບ, ທີ3 ແມ່ນຫ້ອງວ່າການປົກຄອງເມືອງນອງ ຮັບຂອງຂວັນລາງວັນເປັນເງິນ 1ລ້ານກີບ.ໂອກາດດັ່ງກ່າວ: ທ່ານ ລຳແກ້ວ ແສງໜູທອງ ເຈົ້າເມືອງໆນອງ ກໍ່ໄດ້ເປັນກຽດມອບຮັບຂັນລາງວັນ ແລະ ເງິນສົດໃຫ້ແຕ່ລະທີມຂອງສີພາຍເຮືອຊ່ວງຢ່າງສົມກຽດ.

savannakhet medialaos