ກອງປະຊຸມອົງການປົກຄອງ ແຂວງ ໄຊຍະບູລີ ປະຈໍາ 9 ເດືອນ ແລະ ທິດທາງແຜນການ 3 ເດືອນທ້າຍປີ 2019, ໄດ້ໄຂຂຶ້ນໃນຕອນເຊົ້າຂອງວັນທີ 29 ຕຸລາ ປີນີ້, ທີ່ສະໂມສອນ ຫ້ອງວ່າການແຂວງ, ໂດຍການເປັນປະທານຂອງ ທ່ານ ເພັງນິລັນ ຄໍາພັນເພັງ ຮອງເຈົ້າແຂວງ ໄຊຍະບູລີ, ເຂົ້າຮ່ວມມີ ເຈົ້າເມືອງ, ຮອງເຈົ້າເມືອງ, ຫົວໜ້າ, ຮອງຫົວໜ້າພະແນກການ, ກົມກອງ ແລະ ລັດວິສາຫະກິດອ້ອມຂ້າງແຂວງເຂົ້າຮ່ວມ 60 ກວ່າຄົນ.
ທ່ານ ເພັງນິລັນ ຄໍາພັນເພັງ ຮອງເຈົ້າແຂວງ ໄຊຍະບູລີ ໄດ້ກ່າວໄຂກອງປະຊຸມຄັ້ງນີ້ວ່າ:

ກອງປະຊຸມດັ່ງກ່າວຈະດຳເນີນໄປເປັນເວລາ 2 ວັນເຕັມ ແລະ ຈະໄດ້ພ້ອມກັນ ສະຫຼຸບຕີລາຄາຄືນ ແລະ ກວດກາຜົນໄດ້ຮັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 9 ເດືອນ, ຄາດຄະເນ 3 ເດືອນທ້າຍປີ 2019, ວຽກງານທີ່ປີ່ນອ້ອມຂອງອົງການປົກຄອງແຂວງ ແລະ ແຜນວຽກຈຸດສຸມ ປີ 2020 ທີ່ໃກ້ຈະມາເຖິງນີ້ ແລະ ນິຕິກຳໃຕ້ກົດໝາຍຈໍານວນໜຶ່ງ, ທັງເປັນການຊຸກຍູ້ຂະບວນການໃຫ້ແກ່ການເລີ່ມຕົ້ນກອງປະຊຸມໃຫຍ່ 3 ຂັ້ນຂອງພັກ ທີ່ກຳລັງດຳເນີນຂຶ້ນໃນປະຈຸບັນ, ພ້ອມນີ້ກອງປະຊຸມຍັງຈະໄດ້ຮັບຟັງຮ່າງບົດສະຫຼຸບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 9 ເດືອນຜ່ານມາ, ຄາດຄະເນ 3 ເດືອນທ້າຍປີ 2019, ແຜນວຽກຈຸດສຸມ ປີ 2020 ແລະ ວຽກງານທີ່ປີ່ນອ້ອມຈໍານວນໜຶ່ງ, ພ້ອມດຽວກັນຜູ້ເຂົ້າຮ່ວມຍັງຈະໄດ້ປະກອບຄໍາຄິດ-ຄໍາເຫັນ ຕໍ່ຮ່າງນິຕິກຳໃຕ້ກົດໝາຍ ເພື່ອນໍາສະເໜີຕໍ່ສະພາປະຊາຊົນແຂວງຮັບຮອງ, ເຊິ່ງປະກອບມີ 3 ຫົວຂໍ້ ຄື:

ຮ່າງຂໍ້ຕົກລົງວ່າດ້ວຍການສ້າງຕັ້ງ ແລະ ຄຸ້ມຄອງກອງທຶນສົ່ງເສີມກະສິກຳຂອງ ແຂວງໄຊຍະບູລີ ແລະ ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ພັດທະນາຊົນລະປະທານ, ຮ່າງຂໍ້ຕົກລົງວ່າດ້ວຍການຄຸ້ມຄອງຜັງເມືອງ ແລະ ສິ່ງປຸກສ້າງ ຈາກພະແນກໂຍທາທິການ ແລະ ຂົນສົ່ງແຂວງ, ໂອກາດດັ່ງກ່າວ ທ່ານຮອງເຈົ້າແຂວງຍັງໄດ້ຮຽກຮ້ອງມາຍັງບັນດາທ່ານຜູ້ແທນກອງປະຊຸມສຸມໃສ່ຄົ້ນຄວ້າປະກອບຄຳຄິດ-ຄຳເຫັນໃສ່ບັນດາເນື້ອທີ່ໄດ້ນຳເຂົ້າມາຄົ້ນຄວ້າປຶກສາຫາລືໃນຄັ້ງນີ້ ໃຫ້ມີຄວາມໝາຍເລິກເຊິ່ງ ແລະ ມີຄວາມເປັນເອກະພາບກັນ.

ໂດຍ: ອຸ່ນເຮືອນ ໂພທິລັກ.
Medialaos xayaboury