ພິທີ ວາງສີລາລືກ ໂຄງການກໍ່ສ້າງ ໂຮງຮຽນນາຍສິບທະຫານທ້ອງຖິ່ນ ແຂວງໄຊສົມບູນ ທີ່ໄດ້ທຶນຊ່ວຍເຫລືອລ້າຈາກລັດຖະບານຫວຽດນາມ ໄດ້ຈັດຂື້ນໃນຕອນເຊົ້າຂອງວັນທີ 29 ຕຸລາ 2019 ນີ້, ທີ່ກອງບັນຊາການທະຫານແຂວງ, ເຂົ້າຮ່ວມ ຝ່າຍລາວ ມີທ່ານ ພົຕ ສີດາລຼໍ່ ຈົງເຕັ່ງເຈຍຊາ, ຮອງຫົວໜ້າກົມໃຫຍ່ເສນາທິການ ກອງທັບປະຊາຊົນລາວ, ທ່ານ ພອຍຄຳ ຮຸ່ງບຸນຍວງ, ຮອງເລຂາພັກແຂວງ-ຮອງເຈົ້າແຂວງໄຊສົມບູນ, ທ່ານ ຄຳເຜີຍ ແກ້ວກິນນາລີ, ຮອງປະທານຄະນະກຳມະການ ຮ່ວມມືລາວ-ຫວຽດນາມ, ມີສະພາປະຊາຊົນແຂວງ, ພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ, ຝ່າຍຫວຽດນາມ ເຂົ້າຮ່ວມ ມີທ່ານ ພົນຈັດຕະວາ ເຈີນ ຫວໍ ຢູງ, ຫົວໜ້າການເມືອງກອງບັນຊາການທະຫານເຂດ 4 ກອງທັບປະຊາຊົນຫວຽດນາມ, ທ່ານ ພົນຈັດຕະວາ ຮ່າເຕີນ ຕ໋ຽນ, ຮອງກອງບັນຊາການທະຫານເຂດ 4 ກອງທັບປະຊາຊົນຫວຽດນາມ, ຫົວໜ້າຄຸ້ມຄອງໂຄງການ, ທ່ານ ພັອ ຕ່າວ ວັນ ຖາຍ, ຫົວໜ້າທູດທະຫານກະຊວງປ້ອງກັນປະເທດຫວຽດນາມ ປະຈຳຢູ່ ສປປລາວ ພ້ອມດ້ວຍຄະນະ ແລະ ມີຕາງໜ້າບໍລິສັດຜູ່ຮັບເໝົາກໍ່ສ້າງ ເຂົ້າຮ່ວມ.

ກ່ອນເຂົ້າສູ່ພິທີ ຢ່າງເປັນທາງການ ບັນດາຜູ່ແທນ ທັງສອງປະເທດ ໄດ້ຮັບຊົມການສະແດງສິລະປະ-ວັນນະດີ ບັນດາບົດຟ້ອນ ແລະ ບົດເພງ ຈາກໜ່ວຍສີລະປະກອງບັນຊາການທະຫານ ແຂວງ ຊຶ່ງເຕັມໄປດ້ວຍບັນຍາກາດເບີກບານມ່ວນຊື່ນ ແລະ ມີຄວາມໝາຍ-ຄວາມສຳຄັນ. ຫລັງຈາກນັ້ນ ທ່ານ ພົນຈັດຕະວາ ຮ່າເຕີນ ຕ໋ຽນ, ຮອງກອງບັນຊາການທະຫານເຂດ 4 ກອງທັບປະຊາຊົນຫວຽດນາມ, ຫົວໜ້າຄຸ້ມຄອງໂຄງການ ຂຶ້ນລາຍງານໂດຍຫຍໍ້ກ່ຽວກັບໂຄງການ ດັ່ງກ່າວ. ຊຶ່ງແມ່ນບໍລິສັດ ໂກ້ເອໂກ້ ເປັນຜູ່ຮັບເໝົາກໍ່ສ້າງ, ໄລຍະເວລາໃນການປະຕິບັດໂຄງການແມ່ນ ນັບແຕ່ປີ 2019 ຫາ 2022, ງົບປະມານໃນການກໍ່ສ້າງທັງໝົດ 153.881.000.000 ດົ້ງ (ໜຶ່ງຮ້ອຍຫ້າສິບສາມຕື້ ແປດຮ້ອຍແປດສິບເອັດລ້ານ ດົ້ງ ) ໃນນັ້ນປະກອບມີທຶນຊ່ວຍເຫລືອລ້າຂອງລັດຖະບານຫວຽດນາມ 152.110.385.000 ດົ້ງ (ໜຶ່ງຮ້ອຍຫ້າສິບສອງຕື້ ໜຶ່ງຮ້ອຍສິບລ້ານ ສາມແສນແປດສິບຫ້າພັນ ດົ້ງ), ທຶນສົມທົບຂອງຝ່າຍລັດຖະບານລາວ 1.770.615.000 ດົ້ງ (ໜຶ່ງຕື້ ເຈັດຮ້ອຍເຈັດສິບລ້ານ ຫົກແສນສິບຫ້າພັນ ດົ້ງ) ໂຄງການດັ່ງກ່າວນີ້ ເປັນໂຄງການທີ່ຊ່ວຍເຫລືອລ້າ ທີ່ບໍ່ຫວັງຜົນຂອງລັດຖະບານ ແລະ ກອງທັບປະຊາຊົນຫວຽດນາມ ທີ່ມອບໃຫ້ເປັນຂອງຂວັນກອງທັບປະຊາຊົນລາວ, ເພື່ອເພີ່ມພູນສາຍພົວພັນ ມິດຕະພາບທີ່ຍິ່ງໃຫຍ່ ສາມັກຄີພິເສດ ໃຫ້ໝັ້ນຄົງທະນົງແກ່ນ ຕະຫລອດໄປ. ຄະນະດຽວກັນ ຕາງໜ້າຝ່າຍລາວ ແລະ ສສ ຫວຽດນາມ ໄດ້ຂື້້ນເວທີ ຊ້ວນດິນ ວາງສີລາລຶກ ໂຄງການກໍ່ສ້າງໂຮງຮຽນນາຍສິບທະຫານທ້ອງຖິ່ນ ແຂວງໄຊສົມບູນຢ່າງເປັນທາງ.

MediaLaos Xaysomboun
ພາບ: ພາພອນ ນະວົງໄຊ; ຂ່າວ: ສຸກສັນ ອ້ວນລິທິກຸນ