ກອງປະຊຸມໃຫຍ່ຄັ້ງທີ VII ສະຫະພັນແມ່ຍິງໜ່ວຍພະແນກ ຍທຂ ໄດ້ຈັດຂື້ນໃນວັນທີ29ຕຸລາ 2019 ນີ້ຢູ່ທີ່ຫ້ອງປະຊຸມພະແນກ ຍທຂ ແຂວງໄຊຍະບູລີ ໂດຍການເປັນປະທານຂອງ ສະຫາຍ ນາງ ວຽງຄອນ ສະຫວັດໄພ ປະທານສະຫະພັນແມ່ຍິງໜ່ວຍພະແນກ ຍທຂ ເຂົ້າຮ່ວມເປັນກຽດມີ ສະຫາຍ ນາງ ຄຳຜີວ ພັນທະວົງ ວ່າການປະທານສະຫະພັນແມ່ຍິງແຂວງ ສະຫາຍ ບຸນທະວີ ໂພທິລັກ ຮອງຫົວໜ້າພະແນກ ຍທຂ ມີແຂກຖືກເຊີນ ພ້ອມດ້ວຍເອື້ອຍນ້ອງແມ່ຍິງໜ່ວຍພາຍໃນພະແນກເຂົ້າຮ່ວມ.

ໃນກອງປະຊຸມ ສະຫາຍ ນາງວຽງຄອນ ສະຫວັດໄພ ປະທານສະຫະພັນແມ່ຍິງ່ວຍພະແນກ ຍທຂ ໄດ້ຂື້້ນຜ່ານບົດລາຍງານການເມືອງທັງສອງພາກໂດຍຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ເຊິ່ງບາງຕອນສະຫາຍໄດ້ກ່າວວ່າ: ໃນໄລຍະຜ່ານມາຄະນະສະຫະພັນແມ່ຍິງ ແລະ ສະມາຊິກແມ່ຍິງທຸກສະຫາຍ ໄດ້ເອົາໃຈໃສ່ຄົ້ນຄ້ວາເຊື່ອມຊຶມແນວທາງນະໂຍບາຍຂອງພັກ ລະບຽບກົດໝາຍຂອງລັດ ພ້ອມກັນນັ້ນກໍ່ໄດ້ນໍາພາເປີດຂະບວນການແຂ່ງຂັນ 3 ດີ ແລະ ກວດກາການຈັດຕັ້ງປະຕິບັດ ຂໍ້ແຂ່ງຂັນ 3 ດີ ເປັນແຕ່ລະໄລຍະ ເຮັດໃຫ້ສະມາຊິກສະຫະພັນແມ່ຍິງພາຍໃນໜ່ວຍໄດ້ຮັບການຍ້ອງຍໍນາມມະຍົດໜ່ວຍແມ່ຍິງ 3 ດີ ແລະ ບຸກຄົນດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ3 ດີໄດ້ຮັັບໃບຍ້ອງຍໍຈາກສູນກາງສະຫະພັນແມ່ຍິງລາວ ແລະ ຄັດເລືອກບຸກຄົນ 3ດີໄດ້ຄື:

ພົນລະເມືອງດີ 32 ສະຫາຍເທົ່າກັບ 100%, ພັດທະນາດີ 32 ສະຫາຍ, 3ດີປະເພດ I ມີ 32ສະຫາຍ, ໜ່ວຍສະຫະພັນແມ່ຍິງພະແນກ ຍທຂ ຍັງຮັກສາໄດ້ໜ່ວຍແມ່ຍິງ 3 ດີ ນອກນີ້ ເອືອຍນ້ອງແມ່ຍິງຍັງສ້າງເງິນຄັງລວມໄດ້ທັງໝົດ 16 ລ້ານກ່ວາກີບ ຈາກນັ້ນກອງປະຊຸມຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍຊຸດໃໝ່ ບົນພື້ນຖານຖືກຕ້ອງສອດຄ່ອງກັບມາດຖານເງື່ອນໄຂກຳນົດໄວ້ ເຊິ່ງມີຜູ້ສະມັກ 5 ສະຫາຍ, ເລືອກເອົາ 3 ສະຫາຍ, ກອງປະຊຸມຄັ້ງປະຖົມມະລຶກ ເຫັນດີເປັນເອກະສັນກັນເລືອກເອົາ ສະຫາຍນາງ ເພັດສະຫວັດ ຂັນແກ້ວ ເປັນປະທານສະຫະພັນແມ່ຍິງໜ່ວຍພະແນກ ຍທຂ ສະຫາຍນາງ ສະນຽນ ພອນມະນີ ເປັນຮອງປະທານ ທັງເປັນປະທານກວດກາ ແລະ ສະຫາຍນາງ ດາວມະນີ ສົມພັນ ເປັນຄະນະ.

ຂ່າວ: ບຸນທີ ແສງຈັນທະລາ.
Medialaos xayaboury